ବଇଣ୍ଡା,୨୪।୧୧(ଡି.ଏନ.ଏ.)-କିଶୋରନଗର ବ୍ଲକ ବାମୁର ରେଞ୍ଜରେ କିଛିଦିନ ହେବ ହାତୀ ଉପଦ୍ରବ ଲାଗି ରହିଛି। ବିଶେଷ କରି ରେଢାଖୋଲ ବନାଞ୍ଚଳରୁ ୨୨ଟି ହାତୀ ଏହି ରେଞ୍ଜକୁ ପଳାଇ ଆସି ବ୍ୟାପକ ଫସଲ ନଷ୍ଟ କରୁଛନ୍ତି। କଦଳୀମୁଣ୍ଡା ପଞ୍ଚାୟତ ଭେଜିଡ଼ିହ ଗ୍ରାମରେ ଶୁକ୍ରବାର ଓ ଶନିବାର ରାତିରେ ହାତୀମାନେ ଧାନ କିଆରିରେ ପଶି ଫସଲ ନଷ୍ଟ କରିବାସହ ବିଭିନ୍ନ ଗଛ ଡାଳ ଭାଙ୍ଗି ଦେଇଛନ୍ତି। ଭେଜିଡ଼ିହ ଗ୍ରାମର କନ୍ଦୁରୀ ଦେହୁରି, ଭଜମନ ପ୍ରଧାନ, ଅଲେଖ ଭୋଇ, ସୁଦାମ ଭୋଇ ପ୍ରମୁଖଙ୍କ ୧୦ ଏକରରୁ ଊର୍ଦ୍ଧ୍ୱ ଫସଲ ନଷ୍ଟ କରିଥିବା ସେମାନେ ଅଭିଯୋଗ କରିଛନ୍ତି। ଏହାକୁ ନେଇ ଚାଷୀମାନେ ଚିନ୍ତିତ ହୋଇପଡ଼ିଛନ୍ତି। ବନ ବିଭାଗ ପକ୍ଷରୁ ହାତୀ ଘଉଡ଼ାଇବା ପାଇଁ ପଦକ୍ଷେପ ନିଆଯାଉ ନ ଥିବାବେଳେ ହାତୀ ଉପଦ୍ରବ ରୋକିବା ପାଇଁ ଏକ ସ୍ଥାୟୀ ପ୍ରତିକାର କରିବା ପାଇଁ ସାଧାରଣରେ ଦାବି ହୋଇଛି। ତୁରନ୍ତ ବନବିଭାଗର ଉଚ୍ଚ ପଦାଧିକାରୀ ଦୃଷ୍ଟି ଦେଇ ପଦକ୍ଷେପ ନେବାସହ କ୍ଷତିଗ୍ରସ୍ତଙ୍କୁ ସରକାରୀ ସହାୟତା ଯୋଗାଇ ଦେବା ପାଇଁ ଦାବି ହୋଇଛି।
