ବାରଙ୍ଗ,୨୬।୯(ଡି.ଏନ.ଏ.): ନନ୍ଦନକାନନ ପ୍ରାଣୀ ଉଦ୍ୟାନରେ ହର୍ପିସ ଭୂତାଣୁ ସଂକ୍ରମିତ ଦ୍ୱାରା ଗତ ଏକ ମାସରେ ୪ଟି ହାତୀଙ୍କର ମୃତ୍ୟୁ ହୋଇଥିଲା। ଏହି ଘଟଣାରେ କେନ୍ଦ୍ରୀୟ ଚିଡ଼ିଆଖାନା କର୍ତ୍ତୃପକ୍ଷ(ସିଜେଡ୍ଏ)ର ଏସ୍.ପି ଯାଦବ ଓ ଜାତୀୟ ହର୍ପିସ ପ୍ରୋଜେକ୍ଟର ମୁଖ୍ୟ ଆସାମର ଗୌରାଙ୍ଗ ମହୋତଙ୍କୁ ନେଇ ଗଠିତ ଦୁଇଜଣିଆ ଟିମ ବୁଧବାର ପ୍ରାଣୀ ଉଦ୍ୟାନକୁ ପରିଦର୍ଶନ କରି ଘଟଣାର ତଦନ୍ତ କରିଛନ୍ତି। ହର୍ପିସ ଭୁତାଣୁ ଦ୍ୱାରା ହାତୀଙ୍କର ମୃତ୍ୟୁ ହୋଇଥାଏ। ତେବେ ଚିଡ଼ିଆଖାନା ଇତିହାସରେ ଏହା ପ୍ରଥମ ଘଟଣା ବୋଲି କେନ୍ଦ୍ରୀୟ ଦଳ କହିଛନ୍ତି। ଏହି ହାତୀ ମୃତ୍ୟୁ ଘଟଣା ଆମକୁ ଏକ ଶିକ୍ଷା ଦେଇଛି ବୋଲି ସେମାନେ କହିଛନ୍ତି। ଏହି ଦଳ ଗୁରୁବାର ନନ୍ଦନକାନନ ଓ ଚନ୍ଦକା ଅଭୟାରଣ୍ୟ ଯିବାର କାର୍ଯ୍ୟକ୍ରମ ରହିଥିବା ସୂଚନା ମିଳିଛି। ନନ୍ଦନକାନନରେ ହୋଇଥିବା ଅଲୋଚନାରେ ନନ୍ଦନକାନନ ନିର୍ଦ୍ଦେଶକ ଶଶି ପଲ, ଉପନିର୍ଦ୍ଦେଶକ ଜୟନ୍ତ କୁମାର ଦାସ, ଏସିଏଫ୍ ଅଞ୍ଜନ କୁମାର ମହାନ୍ତି, ଏସିଏଫ୍ ଅଶୋକ କୁମାର ଦାସଙ୍କ ସମେତ ନନ୍ଦନକାନନ ଡାକ୍ତରମାନେ ଉପସ୍ଥିତ ଥିଲେ।
ଅନ୍ୟପକ୍ଷେ ନନ୍ଦନକାନନ ପଶୁପକ୍ଷୀ ସୁରକ୍ଷା କମିଟି ପକ୍ଷରୁ ବୁଧବାର ନନ୍ଦନକାନନ ଗେଟକୁ ୧ଘଣ୍ଟା ପାଇଁ ବନ୍ଦ କରାଯାଇଥିଲା। ଜଟଣୀ ବିଧାୟକ ସୁରେଶ କୁମାର ରାଉତରାୟ, ତପନ କୁମାର ଚକ୍ରବର୍ତ୍ତୀଙ୍କ ନେତୃତ୍ୱରେ ଏକ ପ୍ରତିବାଦ ସଭା କରାଯାଇଥିଲା। ନନ୍ଦନକାନନ ମୁଖ୍ୟ ଫାଟକକୁ ବନ୍ଦ କରାଯାଇଥିଲା। ଦାରୁଠେଙ୍ଗଠାରେ ହୋଇଥିବା ଡମ୍ପିଂୟାର୍ଡ ଯୋଗୁ ନନ୍ଦନକାନନରେ ୪ହାତୀ ସହିତ ପଶୁପକ୍ଷୀମାନେ ମରୁଥିବାର ଅଭିଯୋଗ ହୋଇଥିଲା। ନୂତନ ଜୀବଜନ୍ତୁ ଆସିବା, ପଶୁପକ୍ଷୀମାନଙ୍କର ସୁରକ୍ଷା ଆଦି ୮ଦଫା ଦାବି ନେଇ ସୁରକ୍ଷା କମିଟିର ସଦସ୍ୟମାନେ ଗେଟ ଆଗରେ ବିକ୍ଷୋଭ କରିଥିଲେ। ବୁକିଂ କାଉଣ୍ଟର ଓ ପ୍ରବେଶ ପଥ ଫାଟକକୁ ବନ୍ଦ କରିବାରୁ ଆସିଥିବା ଯାତ୍ରୀମାନେ ଟିକେଟ କରି ନ ପାରି ଅପେକ୍ଷା କରିଥିବାବେଳେ କେତକ ଯାତ୍ରୀ ଫେରିଯାଇଥିଲେ। ପରେ ଉପନିର୍ଦ୍ଦେଶକ ଜୟନ୍ତ କୁମାର ଦାସ ସେମାନଙ୍କ ଦାବିପତ୍ର ଗ୍ରହଣ କରିଥିଲେ। ଏହାପରେ ଗେଟ ଖୋଲିଥିଲା।
