ରୂପ୍ସା, ୧୯।୬(ଡି.ଏନ.ଏ.)-ଦକ୍ଷିଣପୂର୍ବ ରେଳପଥର ଖଡ଼ଗପୁର ଡିଭିଜନ୍ ଅନ୍ତର୍ଗତ ବାଲେଶ୍ୱର ଜିଲା ହଳଦୀପଦା ରେଳ ଷ୍ଟେଶନ ଗମନାଗମନ କ୍ଷେତ୍ରରେ ଗୁରୁତ୍ୱ ବହନ କରିଆସୁଛି। ୬୦ବର୍ଷ ପୂର୍ବରୁ ଏହି ଷ୍ଟେଶନ ସ୍ଥାପନ ହୋଇଥିଲେ ବି ଏଯାବତ୍ ଏହାର ସାମଗ୍ରିକ ବିକାଶ ହୋଇପାରିନାହଁି। ପ୍ରତିମାସ ଏହି ଷ୍ଟେଶନରୁ ପ୍ରାୟ ୩ଲକ୍ଷ ଟଙ୍କା ରାଜସ୍ବ ଆଦାୟ ହେଉଥିଲେ ବି ଯାତ୍ରୀଙ୍କ ସୁବିଧା ଲାଗି ରେଳ ବିଭାଗ କର୍ତ୍ତୃପକ୍ଷ ଅଣଦେଖା କରୁଥିବା ଅଭିଯୋଗ ହୋଇଛି। ଏହାର ପ୍ରତିବାଦରେ ହଳଦୀପଦା ପ୍ରଗତିମଞ୍ଚ ପକ୍ଷରୁ ଆସନ୍ତା ଜୁଲାଇ ୮ ତାରିଖରେ ରେଳରୋକୋ ଆନ୍ଦୋଳନ କରାଯିବ ବୋଲି ଚେତାବନୀ ଦିଆଯାଇଛି।
ହଳଦୀପଦା, ରାଇସୁଆଁ, ନଗ୍ରମ, ଓଡ଼ଙ୍ଗୀ, କୁରାଢ଼ିହା, ଚଷାଖଣ୍ଡ, ବାହାବଳପୁର, ଦୁବୁଲାଗଡ଼ି ଆଦି ପଞ୍ଚାୟତର ସହସ୍ରାଧିକ ଯାତ୍ରୀ ଏହି ଷ୍ଟେଶନରୁ ଟ୍ରେନ୍ ଯୋଗେ ଯାତାୟାତ କରିଥାନ୍ତି। ଏଠାରେ ହାଓଡ଼ାରୁ ଜଳେଶ୍ୱର ପର୍ଯ୍ୟନ୍ତ ଆସୁଥିବା ମେମୋ ଟ୍ରେନ୍କୁ ବାଲେଶ୍ୱର ପର୍ଯ୍ୟନ୍ତ ସମ୍ପ୍ରସାରଣ, ଭଞ୍ଜପୁର-ରୂପ୍ସା ପାାସେଞ୍ଜର ଟ୍ରେନ୍କୁ ବାଲେଶ୍ୱର ପର୍ଯ୍ୟନ୍ତ ଚଳାଚଳ, ୨୫୯ ନଂ. ନିଧିପଣ୍ଡା ଗଳାପୋଲର ଉନ୍ନତୀକରଣ, ଷ୍ଟେଶନ ପରିସରରେ ଏଟିଏମ୍ ସ୍ଥାପନ, ରିଜର୍ଭେଶନ୍ ଟିକେଟ କାଉଣ୍ଟର ଖୋଲାଯିବା, ଖଣ୍ଡାହାର ରେଲୱେ ବ୍ରିଜ୍ଠାରେ ହାଇଲେଭଲ୍ ବ୍ରିଜ୍୍ ନିର୍ମାଣ କରିବା ଆଦି ଦାବି ପ୍ରତି ବିଭାଗୀୟ କର୍ତ୍ତୃପକ୍ଷ ଗୁରୁତ୍ୱ ଦେଉନାହାନ୍ତି। ଏ ସମ୍ପର୍କରେ ବାରମ୍ବାର ଉଚ୍ଚ ଅଧିକାରୀଙ୍କୁ ଦାବିପତ୍ର ଦିଆଯାଇଥିଲେ ହେଁ ଆନୁଷଙ୍ଗିକ ବ୍ୟବସ୍ଥା କରାଯାଇନାହଁି। ଏହାର ପ୍ରତିବାଦରେ ଆସନ୍ତା ଜୁଲାଇ ୮ ତାରିଖ ପୂବର୍ର୍ାହ୍ନ ସାଢେ ୬ରୁ ସାଢେ ୯ଟା ପର୍ଯ୍ୟନ୍ତ ରେଳରୋକୋ କରାଯିବ ବୋଲି ମଞ୍ଚର ସଭାପତି ରବୀନ୍ଦ୍ର ନାଥ ମହାନ୍ତି, ଉପସଭାପତି ବୃହସ୍ପତି ସାହୁ, ବରିଷ୍ଠ ନାଗରିକ ସୁଦର୍ଶନ ନାୟକ, କୋଷାଧ୍ୟକ୍ଷ ଚୈତନ୍ୟ ପ୍ରସାଦ ସାହୁ, ସମ୍ପାଦକ ବୀରେନ୍ଦ୍ର କୁମାର ନନ୍ଦ ପ୍ରମୁଖ ଖଡ଼ଗପୁର ଡିଭିଜନ୍ର ରେଲୱେ ମ୍ୟାନେଜରଙ୍କ ସମେତ ବାଲେଶ୍ୱର ଜିଲାପାଳ, ଆରକ୍ଷୀ ଅଧୀକ୍ଷକ, ଷ୍ଟେଶନ ମ୍ୟାନେଜର ପ୍ରମୁଖଙ୍କୁ ଲିଖିତ ଭାବେ ଅବଗତ କରାଇଛନ୍ତି।
ପ୍ରଗତିମଞ୍ଚ ସଭାପତି ମହାନ୍ତି କହିଛନ୍ତି, ଷ୍ଟେଶନର ବିକାଶ ହେଉ ନ ଥିବାରୁ ଗତ ୨୦୧୭ ଓ ୨୦୧୮ରେ ରେଳରୋକୋ ଆନ୍ଦୋଳନ ଡାକରା ଦିଆଯାଇଥିଲା। ବାରମ୍ବାର ତ୍ରିପାକ୍ଷିକ ଆଲୋଚନା ହୋଇ ପ୍ରତିଶ୍ରୁତି ପୂରଣ ଦିଗରେ ବିଭାଗୀୟ ଅଧିକାରୀ ପଦକ୍ଷେପ ନେବେ ବୋଲି ପ୍ରତିଶ୍ରୁତି ଦେଇଥିଲେ। ଏ ଯାବତ୍ ତାହା ପୂରଣ ହୋଇନାହଁି।
ଷ୍ଟେଶନରେ ବିଭିନ୍ନ ସମସ୍ୟାର ସମାଧାନ ପାଇଁ ପୂର୍ବରୁ ଉଚ୍ଚ କର୍ତ୍ତୃପକ୍ଷଙ୍କ ଦୃଷ୍ଟି ଆକର୍ଷଣ କରାଯାଇଛି ବୋଲି ହଳଦୀପଦା ଷ୍ଟେଶନ ମ୍ୟାନେଜର ପ୍ରକାଶ କରିଛନ୍ତି।
