କଟକ ଅଫିସ,୩୧ା୧୦- ଆସନ୍ତା ନଭେମ୍ବର ୮ରୁ ଆରମ୍ଭ ହେବ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ(ବିସିସିଆଇ)ର ଘରୋଇ ସୟଦ ମୁସ୍ତାକ ଅଲ୍ଲୀ ଟି୨୦ ଟୁର୍ନାମେଣ୍ଟ। ଓଡ଼ିଶା ଗ୍ରୁପ-ଇରେ ସ୍ଥାନ ପାଇଥିବା ବେଳେ ସୁରଟରେ ସମସ୍ତ ମ୍ୟାଚ୍ ଖେଳାଯିବ। ଏଥିପାଇଁ ବୁଧବାର ଓଡ଼ିଶା କ୍ରିକେଟ ଆସୋସିଏଶନ(ଓସିଏ) ପକ୍ଷରୁ ଦଳ ଘୋଷଣା କରାଯାଇଛି। ଦଳର ଅଧିନାୟକ ଦାୟିତ୍ୱକୁ ଫେରିଛନ୍ତି ଅଭିଜ୍ଞ ଗୋବିନ୍ଦ ପୋଦ୍ଦାର। ଉଇକେଟ କିପର ବ୍ୟାଟ୍ସମ୍ୟାନ ପ୍ରବୀଣ ଲୋହାଙ୍କୁ ନୂଆ ମୁହଁ ଭାବେ ଦଳରେ ସାମିଲ କରାଯାଇଛି। ଧଳା ବଲରେ ପ୍ରଦର୍ଶନକୁ ଭିତ୍ତିକରି ଦଳ ଗଠନ ହୋଇଛି ବୋଲି ଓସିଏ ପକ୍ଷରୁ କୁହାଯାଇଛି । ଏହି ଭିତ୍ତିରେ ବାଦ ପଡ଼ିଛନ୍ତି ଅନୁରାଗ ଷଡ଼ଙ୍ଗୀ। ଅନୁରାଗଙ୍କ ପ୍ରଦର୍ଶନ ଆଶାନୁରୂପ ଭଲ ନାହିଁ ବୋଲି ଚୟନ କମିଟି ଅଧ୍ୟକ୍ଷ ବିଷ୍ଣୁଦେବ ମହାନ୍ତି କହିଛନ୍ତି । ଉଇକେଟ କିପର ତଥା ଧୁଆଁଧାର ବ୍ୟାଟ୍ସମ୍ୟାନ ରାଜେଶ ଧୂପରଙ୍କୁ ପୁର୍ନବାର ଦଳରେ ସାମିଲ କରାଯାଇଛି । ଶୁଭ୍ରାଂଶୁ ଶେଖର ସେନାପତିଙ୍କୁ ଉପଅଧିନାୟକ ଦାୟିତ୍ୱରେ ରଖାଯାଇଛି । ଏହାଛଡ଼ା ଗତ ବିଜୟ ହଜାରେ ଟ୍ରଫିରେ ଦଳରୁ ବାଦ ପଡ଼ିଥିବା ବିପ୍ଳବ ସାମନ୍ତରାୟ ଟି୨୦ ଦଳକୁ ପ୍ରତ୍ୟାବର୍ତ୍ତନ କରିଛନ୍ତି । ଅଙ୍କିତ ଯାଦବ, ସନ୍ଦୀପ ପଟ୍ଟନାୟକ, ଅଭିଷେକ ରାଉତ, ଅରବିନ୍ଦ ସିଂ ସ୍ଥାନ ବଜାୟ ରଖିଛନ୍ତି । ସ୍ପିନ ବୋଲିଂ ଦାୟିତ୍ୱ ପପୁ ରାୟ ଓ ଶୁଭମ ନାୟକଙ୍କ ଉପରେ ଥିବା ବେଳେ ରାଜେଶ ମହାନ୍ତି, ସୂର୍ଯ୍ୟକାନ୍ତ ପ୍ରଧାନ, ଦେବବ୍ରତ ପ୍ରଧାନ, ଆଶୁତୋଷ ଦାସ ପେସ୍ ଆକ୍ରମଣ ସମ୍ଭାଳିବେ। ଦଳ ଭଲ ପ୍ରଦର୍ଶନ କରିବାର ଆଶା ରହିଛି ବୋଲି ଚୟନ କମିଟି ଅଧ୍ୟକ୍ଷ ମହାନ୍ତି କହିଛନ୍ତି ।
ଓଡ଼ିଶା ଦଳ: ଗୋବିନ୍ଦ ପୋଦ୍ଦାର(ଅଧିନାୟକ), ଶୁଭ୍ରାଂଶୁ ଶେଖର ସେନାପତି (ଉପଅଧିନାୟକ), ବିପ୍ଳବ ସାମନ୍ତରାୟ, ଅରବିନ୍ଦ ସିଂ, ଅଭିଷେକ ରାଉତ, ସନ୍ଦୀପ ପଟ୍ଟନାୟକ, ସୂର୍ଯ୍ୟକାନ୍ତ ପ୍ରଧାନ, ରାଜେଶ ମହାନ୍ତି, ଦେବବ୍ରତ ପ୍ରଧାନ, ଅଙ୍କିତ ଯାଦବ, ପପୁ ରାୟ, ପ୍ରବୀଣ ଲୋହା(ଉଇକେଟ କିପର), ରାଜେଶ ଧୂପର(ଉଇକେଟ କିପର), ଶୁଭମ ନାୟକ, ଆଶୁତୋଷ ଦାସ । ରଶ୍ମୀ ରଞ୍ଜନ ପରିଡ଼ା-କୋଚ୍, ଶୁଭକାନ୍ତ ସାହୁ-ଫିଜିଓ, ମନୋଜ କୁମାର ବିଶ୍ୱାଳ-ଟ୍ରେନର, ସଂଗ୍ରାମ କୁମାର ଗୁମାନ ସିଂ-ମ୍ୟାନେଜର ।
ଓଡ଼ିଶାର ମ୍ୟାଚ୍ସୂଚୀ
ତାରିଖ ବିପକ୍ଷ
ନଭେମ୍ବର ୮ ଝାଡ଼ଖଣ୍ଡ
ନଭେମ୍ବର ୯ ଦିଲ୍ଲୀ
ନଭେମ୍ବର ୧୧ ସିକିମ୍
ନଭେମ୍ବର ୧୨ ଜମ୍ମୁ-କଶ୍ମୀର
ନଭେମ୍ବର ୧୪ ସୌରାଷ୍ଟ୍ର
ନଭେମ୍ବର ୧୫ ଗୁଜୁରାଟ
