ନ୍ୟୁୟର୍କ/ନୂଆଦିଲ୍ଲୀ,୬।୨: ପୃଥିବୀର ସqବୁଠାରୁ ମହଙ୍ଗା ଦେଶ ତାଲିକାରେ ଏକ ନମ୍ବର ସ୍ଥାନରେ ସ୍ବିଜରଲାଣ୍ଡ ରହିଛି। ଅପରପକ୍ଷରେ ଶସ୍ତା ଦେଶ ତାଲିକାରେ ତୃତୀୟ ସ୍ଥାନରେ ଭାରତ ରହିଛି। ଆମେରିକାର ବିଜନେସ୍ ମାଗାଜିନ୍ ସିଓ ଓ୍ବାଲର୍ଡ ପକ୍ଷରୁ ଏ ସମ୍ପର୍କିତ ଏକ ରିପୋର୍ଟ ପ୍ରକାଶ ପାଇଛି। ପୃଥିବୀର ୧୩୨ଟି ଦେଶରେ ସର୍ଭେ କରାଯାଇ ଏହି ରିପୋର୍ଟ ପ୍ରକାଶ ପାଇଛି। ମହଙ୍ଗା ଦେଶ ତାଲିକାରେ ଦ୍ୱିତୀୟ ସ୍ଥାନରେ ନରଓ୍ବେ ରହିଥିବାବେଳେ ତୃତୀୟ ସ୍ଥାନରେ ଆଇସ୍ଲାଣ୍ଡ୍ ରହିଛି। ସେହିପରି ଶସ୍ତା ଦେଶ ତାଲିକାରେ ପ୍ରଥମ ସ୍ଥାନରେ ପାକିସ୍ତାନ ଥିବାବେଳେ ଦ୍ୱିତୀୟ ସ୍ଥାନରେ ଆଫଗାନିସ୍ତାନ ରହିଛି। ସର୍ଭେ ପାଇଁ ଲୋକଙ୍କ ବାସଗୃହର ଭଡ଼ା, କିଣାଯାଉଥିବା ତେଜରାତି ସାମଗ୍ରୀ ଏବଂ ରେଷ୍ଟୁରାଣ୍ଟ୍ରେ ମିଳୁଥିବା ଖାଦ୍ୟ ପଦାର୍ଥର ଦାମକୁ ଆଧାର ଭାବେ ଗ୍ରହଣ କରାଯାଇଥିଲା। ଏହା ସହିତ ପୋଷାକ, ପରିବହନ ଭଡ଼ା ଏବଂ ଇଣ୍ଟରନେଟ୍ ଦାମକୁ ମଧ୍ୟ ଅଧ୍ୟୟନ ପରିସରଭୁକ୍ତ କରାଯାଇଥିଲା। ଏଥିରେ ସ୍ବିଜରଲାଣ୍ଡକୁ ସର୍ବାଧିକ ୧୨୨ ପଏଣ୍ଟ ମିଳିଥିବାବେଳେ ପାକିସ୍ତାନକୁ ସର୍ବନିମ୍ନ ୨୧.୯୮ ଏବଂ ଭାରତକୁ ୨୪.୫୮ ପଏଣ୍ଟ ମିଳିଥିଲା।
