ଶ୍ରୀନଗର/ନୂଆଦିଲ୍ଲୀ,୧୦ା୮: ଅନୁଚ୍ଛେଦ ୩୭୦ ଉଚ୍ଛେଦ ପରେ ଜମ୍ମୁ-କଶ୍ମୀରରେ ଉତ୍ତେଜନା ଓ ହିଂସା ଏଡ଼ାଇବା ପାଇଁ ଜାରି ହୋଇଥିବା କଟକଣାକୁ ପ୍ରଶାସନ ପକ୍ଷରୁ ଧୀରେ ଧୀରେ ଉଠାଇ ଦିଆଯାଉଛି। ଏଥିଯୋଗୁ ଉପତ୍ୟକାରେ ସ୍ଥିତି ସ୍ବାଭାବିକ ହେବାରେ ଲାଗିଛି। ଶୁକ୍ରବାର କଡ଼ା ସୁରକ୍ଷା ବ୍ୟବସ୍ଥା ମଧ୍ୟରେ ମୁସ୍ଲିମ୍ ସମ୍ପ୍ରଦାୟର ଲୋକେ ପ୍ରାର୍ଥନା କରିଛନ୍ତି। କାଁ ଭାଁ କେତୋଟି ସ୍ଥାନରେ ଅପ୍ରୀତିକର ଘଟଣାକୁ ଛାଡ଼ିଦେଲେ ମୋଟାମୋଟି ଭାବେ ଉପତ୍ୟକାକୁ ଶାନ୍ତି ଫେରୁଛି ବୋଲି କୁହାଯାଇପାରେ।
କିଛିଦିନ ହେଲା ଘରେ ଆବଦ୍ଧ ଥିବା କଶ୍ମୀରୀମାନେ ଏବେ ପଦାକୁ ଗୋଡ଼ କାଢ଼ିଛନ୍ତି। ଶୁକ୍ରବାର ନମାଜ ପାଠ ଥିବାରୁ ସ୍ଥାନୀୟ ମସ୍ଜିଦଗୁଡ଼ିକରେ କଟକଣା କୋହଳ କରାଯାଇଥିଲା। ବହୁସଂଖ୍ୟକ ଲୋକ ସାମୂହିକ ନମାଜ ପାଠ କରିଥିଲେ। ମଙ୍ଗଳବାରଠାରୁ କଶ୍ମୀରରେ ଥିବା ଜାତୀୟ ସୁରକ୍ଷା ପରାମର୍ଶଦାତା (ଏନ୍ଏସ୍ଏ) ଅଜିତ ଡୋଭାଲଙ୍କ ନିର୍ଦ୍ଦେଶକ୍ରମେ ଏହି ନିଷ୍ପତ୍ତି ନିଆଯାଇଛି। ଡୋଭାଲ ବରିଷ୍ଠ ପୋଲିସ ଅଧିକାରୀଙ୍କ ସହ ଶ୍ରୀନଗରର ଇଦ୍ଘା ସମେତ କେତେକ ଗୁରୁତ୍ୱପୂର୍ଣ୍ଣ ସ୍ଥାନ ପରିଦର୍ଶନ କରିଥିଲେ। ପରେ ସେ ରାଜ୍ୟପାଳ ସତ୍ୟପାଲ ମଲିକଙ୍କୁ ଭେଟି ସ୍ଥିତି ସମ୍ପର୍କରେ ଆଲୋଚନା କରିଥିଲେ। ବିଭିନ୍ନ ସହରରେ ଦୋକାନ ବଜାରଗୁଡ଼ିକ ଖୋଲିବାରେ ଲାଗିଛି। ଅଗଷ୍ଟ ୫ରୁ ଜାରି ହୋଇଥିବା ୧୪୪ ଧାରାକୁ ଶୁକ୍ରବାର ଜମ୍ମୁ ଜିଲା ପ୍ରଶାସନ ହଟାଇଦେଇଛି। ଶନିବାରଠାରୁ ସ୍କୁଲ, କଲେଜ ଓ ଅନ୍ୟ ଶିକ୍ଷାନୁଷ୍ଠାନ ଖୋଲିବା ପାଇଁ ଜିଲାପାଳ ସୁଷମା ଚୌହାନ ନିର୍ଦ୍ଦେଶ ଦେଇଛନ୍ତି। ଉତ୍ତର କଶ୍ମୀରର ସୋପୋରରେ ସୁରକ୍ଷା ବଳକୁ ଟେକାମାଡ଼ ହୋଇଥିବା ଜଣାପଡ଼ିଛି। କୌଣସି ପ୍ରକାର ଅଘଟଣକୁ ଏଡ଼ାଇବା ପାଇଁ ପ୍ରାୟ ସବୁ ସମ୍ବେଦନଶୀଳ ସ୍ଥାନରେ ସୁରକ୍ଷା କର୍ମୀ ପୂର୍ବଭଳି ମୁତୟନ ରହିଛନ୍ତି। ଅନ୍ୟପକ୍ଷରେ ୩୭୦ ଉଚ୍ଛେଦ ପ୍ରତିବାଦରେ ଦିଲ୍ଲୀରେ କଶ୍ମୀରୀମାନେ ବିକ୍ଷୋଭ ପ୍ରଦର୍ଶନ କରିଛନ୍ତି। ଜମ୍ମୁ-କଶ୍ମୀରରୁ ଆସି ଦିଲ୍ଲୀ-ଏନ୍ସିଆର୍ରେ ରହୁଥିବା ଛାତ୍ର ଓ କର୍ମଚାରୀମାନେ ଯନ୍ତରମନ୍ତର ରୋଡ୍ରେ ମୁହଁରେ କଳାପଟି ବାନ୍ଧି ଓ ହାତରେ ପ୍ଲାକାର୍ଡ ଧରି କେନ୍ଦ୍ର ବିରୋଧୀ ସ୍ଲୋଗାନ ଦେଇଛନ୍ତି। ଉପତ୍ୟକାରେ ଯୋଗାଯୋଗର ମାଧ୍ୟମ ବିଚ୍ଛିନ୍ନ ହୋଇଥିବାରୁ ୫ ଦିନ ହେଲା ସେମାନେ ନିଜ ପରିବାର ସହ ଫୋନ୍ରେ କଥା ହୋଇପାରି ନ ଥିବା ଦିଲ୍ଲୀ ୟୁନିଭର୍ସିଟି, ଜାମିଆ ମିଲିଆ ଇସ୍ଲାମିଆ ଏବଂ ଜେଏନ୍ୟୁ ଛାତ୍ରୀଛାତ୍ର ଅଭିଯୋଗ କରିଛନ୍ତି।
