ଜାକର୍ତ୍ତା,୧୮ା୮: ବିଶ୍ୱ ମାନଚିତ୍ରରୁ ହଜିବାକୁ ଯାଉଛି ଇଣ୍ଡୋନେସିଆ ରାଜଧାନୀ ଜାକର୍ତ୍ତା। ପରିବେଶ ବିଶେଷଜ୍ଞମାନଙ୍କ ମତରେ ଯଦି ବର୍ତ୍ତମାନ ହାରରେ ସମୁଦ୍ରର ଜଳପତ୍ତନ ବୃଦ୍ଧି ପାଏ ତେବେ ୨୦୫୦ ବେଳକୁ ଜାକର୍ତ୍ତାର ଏକ-ତୃତୀୟାଂଶ ଅଞ୍ଚଳ ଜଳମଗ୍ନ ହୋଇଯିବ। ସେଥିପାଇଁ ଇଣ୍ଡୋନେସିଆ ସରକାର ରାଜଧାନୀକୁ ଜାକର୍ତ୍ତାରୁ ଅନ୍ୟତ୍ର ହଟାଇବାକୁ ନିଷ୍ପତ୍ତି ନେଇଛନ୍ତି। ନୂଆ ରାଜଧାନୀ ସମ୍ପର୍କରେ ଖୁବ୍ ଶୀଘ୍ର ଘୋଷଣା କରାଯିବ ବୋଲି ସ୍ଥାନୀୟ ଏକ ଗଣମାଧ୍ୟମରେ ପ୍ରକାଶ ପାଇଛି। ତେବେ ଏହା ବୋର୍ନିଓ ଦ୍ୱୀପକୁ ସ୍ଥାନାନ୍ତର ହେବ ବୋଲି ଇଣ୍ଡୋନେସିଆ ରାଷ୍ଟ୍ରପତି ଜୋକୋ ଓ୍ବିଡୋଡୋ ଟୁଇଟ୍ କରିଛନ୍ତି। କୋଟିଏରୁ ଊର୍ଦ୍ଧ୍ୱ ଲୋକ ବସବାସ କରୁଥିବା ରାଜଧାନୀ ସହର ଜାକର୍ତ୍ତା ସମୁଦ୍ର ଗର୍ଭରେ ଲୀନ ହେବାକୁ ଯାଉଛି। ଯେତେବେଳେ ବନ୍ୟା ଆସେ ସେତେବେଳେ ସହରବାସୀ ଭୟରେ ଥରିବାକୁ ଲାଗନ୍ତି ବୋଲି ଜଣେ ସ୍ଥାନୀୟ ବ୍ୟକ୍ତି କହିଛନ୍ତି। ଭୂକମ୍ପ ଜୋନ୍ ତଥା ଆର୍ଦ୍ରଭୂମିରେ ନିର୍ମିତ ଏହି ରାଜଧାନୀ ସହର ନିକଟରେ ୧୩ ନଦୀ ପ୍ରବାହିତ ହେଉଛି। ସହରର କେତେକ ଅଞ୍ଚଳ ସମୁଦ୍ରପତ୍ତନ ଠାରୁ ୪ ମିଟର ତଳେ ଅବସ୍ଥିତ।
