ନୂଆଦିଲ୍ଲୀ,୧୧-୭: କଳାଟଙ୍କା ବିରୋଧରେ କଡା କାର୍ଯ୍ୟାନୁଷ୍ଠାନ ଗ୍ରହଣ ଲାଗି ଭାରତ ବିଭିନ୍ନ ପଦକ୍ଷେପ ନେଉଛି। ଏହି ଧାରାରେ ସ୍ବିସ ବ୍ୟାଙ୍କରେ ଜମା କରିଥିବା ସବୁ ଭାରତୀୟଙ୍କ ପ୍ରଥମ ପର୍ଯ୍ୟାୟ ତଥ୍ୟ ସେପ୍ଟେମ୍ବରରେ ମିଳିବ ବୋଲି ଜଣା ପଡିଛି। ସେହିଭଳି ଯେଉଁ ଆକାଉଣ୍ଟଗୁଡିକ ୨୦୧୮ରେ ବନ୍ଦ ହୋଇଛି ତାର ସୂଚନା ମଧ୍ୟ ଭାରତକୁ ସୁଇଜରଲାଣ୍ଡ ପ୍ରଦାନ କରିବ। ଅଟୋମେଟିକ ଏକ୍ସଚେଞ୍ଜ ଅଫ୍ ଇନଫରମେଶନ(ଏଇଓଆଇ) ନିୟମ ମୁତାବକ ଏହି ତଥ୍ୟ ସୁଇଜରଲାଣ୍ଡ ପ୍ରଦାନ କରିବ। ତଥ୍ୟ ମଧ୍ୟରେ ସ୍ବିସ ବିତ୍ତ ପ୍ରତିଷ୍ଠାନଗୁଡିକରେ ଥିବା ଆକାଉଣ୍ଟ ନମ୍ବର, କ୍ରେଡିଟ ବାଲାନ୍ସ, କ୍ଲାଏଣ୍ଟଙ୍କ ସମସ୍ତ ପ୍ରକାରର ବିତ୍ତୀୟ ଆୟ ସାମିଲ ରହିଛି। ସେପ୍ଟେମ୍ବରରେ ପ୍ରଥମ ପର୍ଯ୍ୟାୟ ତଥ୍ୟ ପ୍ରଦାନ ପରେ ବାର୍ଷିକ ଭିତ୍ତିରେ ତଥ୍ୟ ପ୍ରଦାନ ଧାରା ଜାରି ରହିବ ବୋଲି ସୁଇଜରଲାଣ୍ଡର ଫେଡେରାଲ ଡିପାର୍ଟମେଣ୍ଟ ଅଫ୍ ଫାଇନାନ୍ସ(ଏଫ୍ଡିଏଫ୍) ପକ୍ଷରୁ କୁହାଯାଇଛି।
ଭାରତ ସୁଇଜରଲାଣ୍ଡ ମଧ୍ୟରେ ହୋଇଥିବା ଟିକସ ସଂକ୍ରାନ୍ତ ଦ୍ୱିପାକ୍ଷିକ ଚୁକ୍ତି ଅନୁସାରେ ଏଭଳି ପଦକ୍ଷେପ ନିଆଯାଇଛି। ବର୍ତ୍ତମାନ ସୁଦ୍ଧା ସ୍ବିସ କର୍ତ୍ତୃପକ୍ଷ ୧୦୦ ଭାରତୀୟ କମ୍ପାନୀ ଏବଂ ବ୍ୟକ୍ତି ବିଶେଷଙ୍କ ତଥ୍ୟ ଭାରତ ସରକାରଙ୍କୁ ପ୍ରଦାନ କରିସାରିଛି। ସେପ୍ଟେମ୍ବରଠାରୁ ସିଧାସଳଖ ସୂଚନା ଲାଭ କରିବା ନେଇ ବର୍ହିବ୍ୟାପାର ରାଷ୍ଟ୍ରମନ୍ତ୍ରୀ ଭି.ମୂରଲୀଧରନ ଲୋକସଭାକୁ ଏକ ଲିଖିତ ଉତ୍ତରରେ ସୂଚନା ଦେଇଛନ୍ତି। ସେହିଭଳି ତଦନ୍ତ ମାମଲା ସହ ଜଡିତ ଆକାଉଣ୍ଟ ସୁଚନା ମଧ୍ୟ ଅନୁରୋଧ ଦ୍ୱାରା ଭାରତ ଲାଭ କରି ପାରିବ। ଭଷ୍ଟ୍ରାଚାରରେ ଲିପ୍ତ ଥିବା ଅଭିଯୋଗ ଆସିଥିବା ବ୍ୟକ୍ତିବିଶେଷଙ୍କ ମାମଲା କ୍ଷେତ୍ରରେ ଏଭଳି ପଦକ୍ଷେପ ନିଆଯିବ ବୋଲି ମନ୍ତ୍ରୀ ସୂଚନା ଦେଇଛନ୍ତି।
