ହାଟଡିହୀ,୨୩ା୪(ଡି.ଏନ୍.ଏ.) : କରୋନା ସାଙ୍ଗକୁ ହାତୀ ଭୟ ଏବେ ଲୋକଙ୍କୁ ଚିନ୍ତାରେ ପକାଇଛି। କେନ୍ଦୁଝର ଜିଲା ହାଟଡିହୀ ବ୍ଲକ ସୋସୋ ଅଞ୍ଚଳରେ ଏକ ଦନ୍ତା ମାତିଥିବାରୁ ଅଞ୍ଚଳବାସୀ ଭୟଭୀତ ହୋଇପଡ଼ିଛନ୍ତି। ଏଥିସହ ହାତୀଟି ସ୍ଥାନୀୟ ଅଞ୍ଚଳରେ ବ୍ୟାପକ କ୍ଷୟକ୍ଷତି କରିଚାଲିଛି। ବାଡ଼ିବଗିଚାରେ ପଶି ପନିପରିବା ନଷ୍ଟ କରୁଥିବାରୁ ଚାଷୀ ବ୍ୟାପକ କ୍ଷତି ସହିଛନ୍ତିି। ଅନ୍ୟପକ୍ଷରେ ହଦଗଡ଼ ବନ ବିଭାଗ ପକ୍ଷରୁ ହାତୀ ଘଉଡ଼ାଇବା ପାଇଁ ଉଦ୍ୟମ କରାଯାଇଛି। ପୂର୍ବରୁ ଏହି ଅଞ୍ଚଳରେ ହାତୀ ଆକ୍ରମଣରେ ୩ ଜଣଙ୍କ ମୃତ୍ୟୁ ଘଟିସାରିଛି। ବୁଧବାର ହାତୀଟି ଗିରିଶ ନାୟକ, ପ୍ରଣବ ମହାନ୍ତି, ବିପିନ ରାଉତଙ୍କ ବାଡ଼ିରେ ପଶି ପନିପରିବା ଖାଇବା ସହ ଦଳିଚକଟି ନଷ୍ଟ କରିଦେଇଛି। ଫଳରେ ସନ୍ଧ୍ୟା ହେଲେ ଲୋକେ ତାଟିକବାଟ ପକାଇ ଦେଉଛନ୍ତି। ହାତୀ ଉପଦ୍ରବ ଭୟରେ କେହି ବାହାରକୁ ବାହାରୁ ନାହାନ୍ତି। ତେବେ କ୍ଷତିପୂରଣ ପାଇଁ ଚାଷୀ ବୈଲୋଚନ ନାୟକ, ମମି ନାୟକ, ଦୀନବନ୍ଧୁ ପଣ୍ଡିତ, ପ୍ରୀତିଲତା ନାୟକ, ସୋନୁ ରାଉତ, କୈଳାସ ନାୟକ, ଅଶୋକ ମହାନ୍ତି, ଭରତ ରାଉତ, ବାବାଜୀ ରାଉତ ପ୍ରମୁଖ ଦାବି କରିଛନ୍ତି।
