ବାରିପଦା ଅଫିସ/ରାସଗୋବିନ୍ଦପୁର(ଡି.ଏନ୍.ଏ.),୧୪।୨: ମୟୂରଭଞ୍ଜ ଜିଲା ରାସଗୋବିନ୍ଦପୁର ଥାନା ଅନ୍ତର୍ଗତ ରଙ୍ଗଜାମ ଗ୍ରାମରେ ଶୁକ୍ରବାର ଏକ ଅଭାବନୀୟ ଘଟଣା ଘଟିଛି। ପୁଅଙ୍କ ଟାଙ୍ଗିଆ ଚୋଟରେ ବାପାଙ୍କ ମୃତ୍ୟୁ ଘଟିଛି। ସାମାନ୍ୟ ପାରିବାରିକ କଳହକୁ ନେଇ ହତ୍ୟାକାଣ୍ଡ ଘଟିଥିବା କୁହାଯାଉଛି। ମୃତକ ହେଲେ ରାବଣ ସରେନ(୫୫)।
ସୂଚନାନୁଯାୟୀ, ରାବଣଙ୍କ ପୁଅ ରମେଶ ଗତ ୨ ବର୍ଷ ଧରି ଗୁଜରାଟରେ କାମ କରିଆସୁଥିଲେ। ପ୍ରାୟ ୨ ମାସ ତଳେ ରମେଶ ଘରକୁ ଆସି ରହିଥିଲେ। ଏହି ସମୟରେ ସେ ମାନସିକ ବିକାରଗ୍ରସ୍ତ ହୋଇଯାଇଥିଲେ। ଫଳରେ ଘରେ ସବୁବେଳେ କଳହ ଲାଗି ରହୁଥିଲା। ସକାଳେ ମଧ୍ୟ ବାପାପୁଅଙ୍କ ମଧ୍ୟରେ ବଚସା ହୋଇଥିଲା। ଏଥିରେ ରମେଶ ଉତ୍କ୍ଷିପ୍ତ ହୋଇ ବାପା ରାବଣଙ୍କୁ ଟାଙ୍ଗିଆ ସାହାଯ୍ୟରେ ହାଣି ଦେଇଥିଲେ। ଫଳରେ ରାବଣ ଘଟଣାସ୍ଥଳରେ ମୃତ୍ୟୁ ଘଟିଥିଲା। ଖବର ପାଇ ରାସଗୋବିନ୍ଦପୁର ପୋଲିସ ମୃତଦେହ ଜବତ କରିବା ସହ ହତ୍ୟାକାରୀ ପୁଅଙ୍କୁ ଗିରଫ କରିଛି। ହତ୍ୟାକାଣ୍ଡରେ ବ୍ୟବହୃତ ଟାଙ୍ଗିଆକୁ ମଧ୍ୟ ଜବତ କରିଛି। ଏ ନେଇ ରାସଗୋବିନ୍ଦପୁର ଥାନାରେ ମାମଲା ନଂ(୨୩/୨୦) ରୁଜୁ ହୋଇଛି।
