ନୂଆଦିଲ୍ଲୀ,୨୨।୧: ସାଧାରଣତନ୍ତ୍ର ଦିବସରେ ଭାରତରେ ବଡ଼ ଧରଣର ଆତଙ୍କବାଦୀ ଆକ୍ରମଣ ପାଇଁ ପାକିସ୍ତାନ ଗୋଇନ୍ଦା ସଂସ୍ଥା ଆଇଏସ୍ଆଇ ଷଡ଼ଯନ୍ତ୍ର ରଚିଛି। ଏନେଇ ଭାରତୀୟ ଗୋଇନ୍ଦା ବିଭାଗ ପକ୍ଷରୁ ସତର୍କ ସୂଚନା ଜାରି ହୋଇଛି। ସୁରକ୍ଷାକୁ ଦୃଷ୍ଟିରେ ରଖି ବିଏସ୍ଏଫ୍ ପକ୍ଷରୁ ଭାରତ-ପାକିସ୍ତାନ ସୀମାରେ ଅପରେଶନ୍ ଥଣ୍ଡା ପବନ’ ଆରମ୍ଭ ହୋଇଛି। ସୀମାରେ ୧୫ ଦିନ ପାଇଁ ହାଇ ଆଲର୍ଟ ଜାରି କରାଯାଇଛି। ୬ଟି ଉପାୟରେ ଆତଙ୍କବାଦୀ ଆକ୍ରମଣ ଲାଗି ଆଇଏସ୍ଆଇ ବ୍ଲୁପ୍ରିଣ୍ଟ୍ ପ୍ରସ୍ତୁତ କରିଥିବା ଗୋଇନ୍ଦା ବିଭାଗ ପକ୍ଷରୁ ରିପୋର୍ଟ ଜାରି ହୋଇଛି। ପ୍ରଥମତଃ ଅସ୍ତ୍ର ବିରତି ଉଲ୍ଲଂଘନ ଆଳରେ ଆଫଗାନୀ ଏବଂ ତାଲିବାନୀ ଆତଙ୍କବାଦୀଙ୍କୁ ଭାରତରେ ଅନୁପ୍ରବେଶ କରାଇବା ପାଇଁ ଆଇଏସ୍ଆଇ ଯୋଜନା କରିଛି। ସେହିପରି ପାକିସ୍ତାନୀ ଡ୍ରୋନ୍ ଦ୍ୱାରା ପଞ୍ଜାବ ଏବଂ ରାଜସ୍ତାନରେ ଅସ୍ତ୍ରଶସ୍ତ୍ର ପହଞ୍ଚାଇବା ଲାଗି ମଧ୍ୟ ଊଦ୍ୟମ କରାଯିବାର ଆଶଙ୍କା ରହିଥିବା ଗୋଇନ୍ଦା ରିପୋର୍ଟରେ ଦର୍ଶାଯାଇଛି। ଅଟାରୀ ସୀମା, ହୁସୈନିବାଲା ସୀମା ଏବଂ କରତାରପୁର କରିଡୋର ଦେଇ ଆତଙ୍କବାଦୀ ଅନୁପ୍ରବେଶ କରାଯିବାର ଉଦ୍ୟମ ମଧ୍ୟ ଆଇଏସ୍ଆଇ କରିବ ବୋଲି ଆଶଙ୍କା କରାଯାଉଛି। ଜମ୍ମୁର ୧୩ଟି ଛୋଟ ନାଳ ଏବଂ ୩ ବଡ଼ ନଦୀ ପଥ ଦେଇ ଆତଙ୍କବାଦୀଙ୍କୁ ଅନୁପ୍ରବେଶ କରାଯିବା ଉଦ୍ୟମ ନେଇ ସତର୍କ ସୂଚନା ଜାରି ହୋଇଛି। ସେହିପରି ଗୁଜରାଟର ହରାମି ନାଳ ମଧ୍ୟ ଦେଇ ଲଶ୍କର-ଇ-ତୋଏବା ଆତଙ୍କବାଦୀଙ୍କୁ ଭାରତରେ ଅନୁପ୍ରବେଶ କରାଇବା ଳାଗି ଆଇଏସ୍ଆଇ ଯୋଜନା କରିଥିବା ଗୋଇନ୍ଦା ରିପୋର୍ଟରେ ପ୍ରକାଶ ପାଇଛି। ସୁରକ୍ଷା ଦୃଷ୍ଟିରୁ ଏସବୁ ସ୍ଥାନରେ ଅତିରିକ୍ତ ଯବାନଙ୍କୁ ମୁତୟନ କରାଯାଇଛି।
