କେନ୍ଦୁଝର,୧୧ା୬ (ସ୍ବ.ପ୍ର.)-କେନ୍ଦୁଝର ଜିଲା ବଡ଼ବିଲ ଅଞ୍ଚଳର ଲକ୍ଷ୍ମୀ ମୁଣ୍ଡା ନାମ୍ନୀ ଜଣେ ଅସହାୟା ମହିଳା ରୋଗଗ୍ରସ୍ତ ହୋଇ ଭୋକ ଉପାସରେ ଦିନ କାଟୁଛନ୍ତି। ସ୍ବାମୀ ମୁନା ମୁଣ୍ଡାଙ୍କ ଦେହାନ୍ତ ପରେ ସେ ଏକୁଟିଆ ହୋଇଯାଇଛନ୍ତି। ୨ ଶିଶୁଙ୍କ ସହ ବହୁ ଦୁଃଖ କଷ୍ଟରେ ସମୟ ଅତିବାହିତ କରୁଛନ୍ତି। ବିଶେଷ କରି ମହିଳା ଓ ଶିଶୁଙ୍କ ସୁରକ୍ଷା ପାଇଁ ବହୁ ଆଇନ ରହିଛି। ସେମାନଙ୍କ ଥଇଥାନ ପାଇଁ ସରକାରୀ ଓ ବେସରକାରୀ ସ୍ତରରେ ବହୁ ବ୍ୟବସ୍ଥା ମଧ୍ୟ ରହିଛି ା ଦୀର୍ଘ ୧ ମାସ ହେଲା କେନ୍ଦୁଝର ଜିଲା ମୁଖ୍ୟ ଡାକ୍ତରଖାନା ପରିସରରେ ସ୍ତ୍ରୀ ଓ ପ୍ରସୂତି ବିଭାଗ ବାରଣ୍ଡାରେ ଜଣେ ମହିଳା ତାଙ୍କର ୨ କୋମଳମତି ଶିଶୁ ସହିତ ପଡି ରହିଥିଲେ ହେଁ କାହାରି ନଜର ପଡୁ ନ ଥିବା ଏବଂ କୌଣସି ସହାୟତା ମିଳୁ ନ ଥିବାରୁ ମହିଳାଙ୍କ ପ୍ରତି ପ୍ରଶାସନର ଆଭିମୁଖ୍ୟ ଓ ସମ୍ମାନ କେତେ ତାହା ସ୍ପଷ୍ଟ ଜଣାପଡୁଛି ା ଅସହାୟ ଓ ନିଷ୍ପେଷିତ ମହିଳାଙ୍କୁ ସୁରକ୍ଷା ଦେବା ସହ ଥଇଥାନ ପାଇଁ ସ୍ବଧାର ଗୃହ ରହିଥିଲେ ହେଁ ତାଙ୍କୁ ସ୍ଥାନ ମିଳୁନାହିଁ ା ଫଳରେ ଅସୁରକ୍ଷିତ ଓ ଅସ୍ବାସ୍ଥ୍ୟକର ପରିବେଶରେ ଉକ୍ତ ମହିଳା ଦୁଇ ଶିଶୁଙ୍କ ସହିତ ଦିନ କାଟୁଛନ୍ତି।
ଉକ୍ତ ମହିଳାଙ୍କ ଘର ବଡ଼ବିଲ ଅଞ୍ଚଳରେ। ତାଙ୍କ ବାପଘର ପଳାଶପଙ୍ଗା ଅଞ୍ଚଳରେ ହୋଇଥିବା ବେଳେ ସେ ବଡବିଲରେ ବାହା ହୋଇଥିଲେ ା ତାଙ୍କର ଗୋଟିଏ ୪ ବର୍ଷର ପୁଅ ସୁରଜ ଓ ଦେଢ ବର୍ଷର ସାନ ଝିଅ ଅଛନ୍ତି। ସେ ମାନସିକ ଚାପ ଓ ଅସୁସ୍ଥ ଥିବାରୁ ଠିକ କହିପାରୁ ନ ଥିଲେ ହେଁ ସ୍ବାମୀ ମୁନାଙ୍କ ଦେହାନ୍ତ ପରେ ପରିବାର ଲୋକ ଓ ନିଜ ବାପ ଘର ଲୋକ ପଚରାଉଚୁରା କରୁ ନ ଥିଲେ। ଏଣୁ ପାଖାପାଖି ୨ ମାସ ହେଲା ଖରାବର୍ଷାରେ କେନ୍ଦୁଝର ସହରରେ ଏଣେତେଣେ ବୁଲି ଆଶ୍ରୟ ନେଉଥିବା ବେଳେ କିଛି ଦିନ ହେଲା ଜିଲା ମୁଖ୍ୟ ଡାକ୍ତରଖାନା ପରିସରରେ ଆଶ୍ରୟ ନେଇଛନ୍ତି। ଦୁଇ ଶିଶୁଙ୍କୁ ଧରି କୁଆଡେ ଯିବେ ଓ କିପରି ଚଳିବେ ସେ ନେଇ ଚିନ୍ତାରେ ରହିଛନ୍ତି। ଅସ୍ବାସ୍ଥ୍ୟକର ପରିବେଶ ତଳେ ଦୁଇ ଶିଶୁଙ୍କ ସହିତ ରହୁଥିବା ଏହି ଅସହାୟ ମହିଳାଙ୍କୁ ତୁରନ୍ତ ପ୍ରଶାସନ ସହାୟତାର ହାତ ବଢାଇ ସ୍ବଧାର ଗୃହରେ ଥଇଥାନ କରିବା ସହ ସ୍ଥାୟୀ ଥଇଥାନ ବ୍ୟବସ୍ଥା କରିବାକୁ ସାମାଜିକ କର୍ମୀ ଦେବରାଜ ଆଚାର୍ଯ୍ୟଙ୍କ ସମେତ ଅନ୍ୟମାନେ ଦାବି କରିଛନ୍ତି।
