କେସିଙ୍ଗା, ୧୮।୭ (ଡି.ଏନ୍.ଏ): କେନ୍ଦ୍ର ଆର ରାଏଜ୍ ସରକାର ଗରିବ୍ ଦୁଖି, ଭୂମିହୀନ, ବାସହୀନମାନକୁ ଆବାସ ଯୋଜନାରେ ଘର ଯୁଗେଇ ଦେଉଛନ୍। ହେଲେ ଅନେକ ଜାଗାରେ ସରକାରୀ ବାବୁମାନକର ଖାମ୍ଖିଆଲି ମନ୍ଭାବ ଲାଗି ଅନେକ୍ ଗରିବ୍ ଦୁଖି ଯୋଜନାର ଲାଭ ପାଏବାରୁ ବଁଚିତ୍ ହେଉଛନ୍। ଏନ୍ତା ଗୁଟେ ଉଦାହରନ୍ ଦେଖ୍ବାକେ ମିଲିଛେ କଳାହାଣ୍ଡି ଜିଲା କେସିଙ୍ଗା ବ୍ଲକ କନ୍ତେଶିର ପଁଚେତ୍ ଅଧୀନ ଗେଟିପଡ଼ାରେ।
ସୂଚନା ଅନ୍ସାରେ ଗେଟିପଡ଼ାର ବାସିନ୍ଦା ହେଉଛନ୍ ନିସାହା ବିଧବା ମହିଲା ଗୁଞ୍ଜି ଚନ୍ଦନ(୬୮)। ସେ ଚଲତି ବଛର ଜାନୁୟାରୀ ମାସେ ଆପ୍ନେ ନଟ ଚନ୍ଦନକୁଁ ହରେଇ ଏହେଦେ ନିସାହା ଜୀବନ୍ ବିତଉଛନ୍। ହେଲେ ତାକର ୩ଟା ପୁଓ ବି ରହିଛନ୍। ବଡ଼ପୁଓ ୩ ବଛର ହେଲା ମାନ୍ସିକ ରୋଗ୍ରେ ପୀଡ଼ିତ ହେଇ କେନ୍ଆଡ଼େ ପଲେଇଯାଇଛନ୍। ସେନ୍ତା ବାକି ଦୁଇ ପୁଓ ଉତ୍ତର ଚନ୍ଦନ(୫୬) ଆର ମଚିନ ଚନ୍ଦନ(୫୧) କେନ୍ତେଶିର ଗଁାରେ ନିଜର ପରିବାର ଧରି ରହୁଛନ୍। ଜାଗାଠାନ୍ ଅଭାବୁ ଦୁଇ ବୁଢ଼ାବୁଢ଼ି ଗଁାନୁ ଖଁଡ଼େ ଦୂରେ ଥିବାର ଗେଟିପଡ଼ାରେ ଗୁଟେ ଝାଟିମାଟିର କୁରିଆ କରି ଆଏଜ୍କେ ୪୦ ବଛର ହେଲା ରହିଆସୁଥିଲେ। ହେଲେ ନଟ ଚାଲିଗଲା ଉତାରୁ ଏହେଦେ ଗୁଞ୍ଜି ଏକଲା ହେଇଯାଇଛନ୍। ଗେଟିପଡ଼ାରେ ରହିଥିବାର ତାକର କୁରିଆର ଅବସ୍ତା ଗୁଟେ ଗାଈ ଗୁହାଲ ଠାନୁ ବି ଆହୁରି ହୀନ୍। ଇଆଡ଼େ ସରକାରୀ ସାହାଯ୍ କହେଲେ ଗୁଞ୍ଜି ମାସିକ୍ ପାଉଥିବାର ୫ଶହ ଟଁକା ଭତା ଆର ୫ କେ.ଜି. ଚାଉଲ ନ ସାହାଭରସା। ବେଲବୁଡ଼ଲେ ବିଜଲିବତୀ ଅଭାବୁ ପଡ଼ାଟା ଅଁଧାର ଗିଲ୍ଗିଲ୍ ହେଇଯାଉଛେ। ସେନ୍ତା ପଡ଼ାର ଅଲପ ଦୂରେ ଝାର ଜଂଗଲ ଲାଗି ଜୀବ୍ଜଁତୁକର ଆକ୍ରମନ୍ ଭଏ ବି ରହୁଛେ। କେସିଙ୍ଗା ତହସିଲ ତରଫୁ ଗଲା ୨୦୦୦ ସାଲେ ନଟ ଚନ୍ଦନ ୪ ଡେସିମିଲ ଜାଗାର ପଟ୍ଟା ପାଇଛନ୍। ହେଲେ ପରଶାସନ୍ ଆଏଜ୍ତକ ସେ ଜାଗା ଚିନ୍ହଁଟ କରି ହିତାଧିକାରୀକୁଁ ଜମିର ଦଖଲ ନାଇଁଦେଇ। ସେନ୍ତା ଏସ୍ଇସିସି ତାଲିକାରେ ନଁା ଥିଲେ ବି ଗୁଞ୍ଜି ଆବାସ ଯୋଜନାରେ ଘରଖଁଡ଼େ ପାଏବାରୁ ବଁଚିତ୍ ହେଇ ରହିଛନ୍। ଖାଲି ଗୁଞ୍ଜି ନୁହଁନ୍ ଗେଟିପଡ଼ାର ଅଖଣ୍ଡ ସାହୁ, ବୈଦେହୀ ମାଝିକଁର ଲେଖେଁ ଅନେକ ଗରିବ୍ ହିତାଧିକାରୀ ସରକାରୀ ଯୋଜନାରେ ୪ ଡେସିମିଲ ଜାଗା ପାଇଥିଲେ ବି ଆବାସ ଯୋଜନାରୁ ବଁଚିତ୍ ହେଇ ରହିଛନ୍। ଇ ବାବ୍ଦେ ଥାନୀୟ ସରପଁଚ୍ ଜିତେନ୍ଦ୍ର ବ୍ରହ୍ମାକୁଁ ପଚରାଲାରୁ ପରକୁତରେ ସେ ଆବାସ ଯୋଜନାର ଲାଗି ହକ୍ଦାର ଆଏ ବଲି କହିଥିଲେ। ସେନ୍ତା ଇ ବାବ୍ଦେ କେସିଙ୍ଗା ବିଡିଓ ଭୀମସେନ ଶବରକୁଁ ପଚରାଲାରୁ ମୁଇଁ ଘଟନାର ତଦଁତ୍ କରି ପଦକ୍ଷେପ ନେମି ବଲି ସେ କହିଥିଲେ।
