ଢେଙ୍କାନାଳ ଅଫିସ, ୨୭।୩:ଧୀରେ ଧୀରେ ସମୂହ ସଂକ୍ରମଣ ଆଡକୁ ଗତି କରୁଛି ମହାମାରୀ କରୋନା। ଏହାର ମୁକାବିଲା କରିବା ଲାଗି ପ୍ରସ୍ତୁତିକୁ ଆହୁରି ଜୋର୍ଦାର କରିଛି ଢେଙ୍କାନାଳ ଜିଲା ପ୍ରଶାସନ। ଏ ନେଇ ଶୁକ୍ରବାର ଜିଲା କାର୍ଯ୍ୟାଳୟ ସଦ୍ଭାବନା ଗୃହରେ ଜିଲାପାଳ ଭୂମେଶ ଚନ୍ଦ୍ର ବେହେରାଙ୍କ ତତ୍ତ୍ୱାବଧାନରେ ଜରୁରୀ ବୈଠକ ଅନୁଷ୍ଠିତ ହୋଇଯାଇଛି। ବାହାରୁ ଆସି କ୍ୱାରାଣ୍ଟାଇନରେ ଥିବା ସନ୍ଦିଗ୍ଧଙ୍କ ଉପରେ ନଜର ରଖିବାକୁ ଜିଲାପାଳ ଜିଲାସ୍ତରୀୟ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି।
କ୍ୱାରାଣ୍ଟାଇନ୍ ନିୟମ ତଦାରଖ କରିବା ଲାଗି ପ୍ରତି ବ୍ଲକରେ ୨ଜଣ ଅଧିକାରୀ ନିୟୋଜିତ ହେବେ। ସେମାନେ ବିଡିଓଙ୍କ ସହ ସମନ୍ବୟ ରକ୍ଷା କରି ଜିଲାପାଳଙ୍କୁ ରିପୋର୍ଟ ଦେବେ। ଜରୁରୀ ସାମଗ୍ରୀ ଖୋଲିବା ଲାଗି ପୂର୍ବ ନିର୍ଦ୍ଧାରିତ ସମୟରେ ୨ଘଣ୍ଟା ବୃଦ୍ଧି କରାଯାଇଛି। ଏଣିକି ସକାଳ ୭ରୁ ପୂର୍ବାହ୍ନ ୧୧ ଏବଂ ଅପରାହ୍ନ ୪ଟାରୁ ୭ଟା ଯାଏ ଦୋକାନ ଖୋଲିବ। ଏଥିସହ ୫୫ନଂ. ଜାତୀୟ ରାଜପଥ ଏବଂ ଭାପୁର-ଶଙ୍କରପୁର ଦେଇ ଯାଇଥିବା ଜଗନ୍ନାଥ ସଡ଼କ ପାର୍ଶ୍ୱରେ ୬ଟି ଢାବା ଖୋଲିବାକୁ ନିଷ୍ପତ୍ତି ନିଆଯାଇଛି। ସେହିପରି ୫୫ନଂ. ଜାତୀୟ ରାଜପଥରେ ଦୁଇଟି ଗ୍ୟାରେଜ୍ ଖୋଲାଯାଇଛି। ମାଲ ପରିବହନ, ଯାନବାହନ ଚାଳକ ଓ କର୍ମଚାରୀଙ୍କ ସୁବିଧା ପାଇଁ ଏହି ନିଷ୍ପତ୍ତି ନିଆଯାଇଛି। ଢାବାରୁ କେବଳ ଖାଦ୍ୟ କିଣି ନେଇପାରିବେ। ସେଠାରେ ବସି କେହି ଖାଇପାରିବେ ନାହିଁ ବୋଲି ନିଷ୍ପତ୍ତି ହୋଇଛି। ପ୍ରଶାସନ ପକ୍ଷରୁ କଣ୍ଟ୍ରୋଲ ରୁମ୍ ନମ୍ବର ଜାରି ରଖାଯାଇଛି। ଜରୁରିକାଳୀନ ବିଭାଗ କାର୍ଯ୍ୟାଳୟର କଣ୍ଟ୍ରୋଲ ରୁମ ନଂ. ୭୭୩୫୧୭୭୬୮୮, ୦୬୭୬୨-୨୨୧୩୭୬ ଏବଂ ଟୋଲ ଫ୍ରି ନଂ. ୧୦୭୭। ସେହିପରି ଜିଲା ଚିକିତ୍ସାଳୟର କଣ୍ଟ୍ରୋଲ ରୁମ୍ ନଂ. ୦୬୭୬୨-୨୨୬୮୧୮।
ସନ୍ଦିଗ୍ଧ ବ୍ୟକ୍ତିଙ୍କ ଘରେ ଷ୍ଟିକରିଂ କରାଯାଇଛି। ପଞ୍ଚାୟତସ୍ତରୀୟ ଅଧିକାରୀ, ଆଶାକର୍ମୀ, ଅଙ୍ଗନଓ୍ବାଡି କର୍ମୀ, ଶିକ୍ଷକ, କୃଷି, ଉଦ୍ୟାନ ଏବଂ ମତ୍ସ୍ୟ ବିଭାଗ ଅଧିକାରୀ କ୍ୱାରାଣ୍ଟାଇନରେ ଥିବା ବ୍ୟକ୍ତିଙ୍କ ଉପରେ ନଜର ରଖିବେ। ଜିଲା ଏବଂ ବ୍ଲକସ୍ତରୀୟ ଅଧିକାରୀମାନେ ସଦର ମହକୁମା ଛାଡ଼ି ବାହାରକୁ ନ ଯିବାକୁ କୁହାଯାଇଛି। ଆବଶ୍ୟକ ସ୍ଥଳେ ଘରେ ରହି କାମ କରିବାକୁ ଜିଲାପାଳ ନିର୍ଦ୍ଦେଶ ଦେଇଛନ୍ତି। ଅତିରିକ୍ତ ଜିଲାପାଳ ଭବେଶ କୁମାର ନାୟକ, ପିଡି ଡିଆରଡିଏ ନରୋତ୍ତମ ବେହେରା, ଅତିରିକ୍ତ ଜିଲାପାଳ (ରାଜସ୍ବ) ସୌଦାମିନୀ ସେଠୀ, ଉପଜିଲାପାଳ ସାଫଲ୍ୟ ମଣ୍ଡିତ ପ୍ରଧାନ, ସିଡିଏମ୍ଓ ଡା. ନିରଞ୍ଜନ ମିଶ୍ର, ଜରୁରିକାଳୀନ ଅଧିକାରୀ ଶଶାଙ୍କ ଶେଖର ମିଶ୍ର ପ୍ରମୁଖ ବିଭିନ୍ନ ବିଷୟରେ ଆଲୋଚନା କରିଥିଲେ।
