ଢେଙ୍କାନାଳ ଅଫିସ, ୫।୪-ରାଜ୍ୟରେ କରୋନା ଆକ୍ରାନ୍ତଙ୍କ ସଂଖ୍ୟା ବୃଦ୍ଧି ସମସ୍ତଙ୍କ ପାଇଁ ସତର୍କ ଘଣ୍ଟି ବଜାଇଛି। ସତର୍କତା, ସଚେତନତା, ସାମାଜିକ ଦୂରତ୍ୱ ହିଁ ଏହି ମହାମାରୀ କବଳରୁ ରକ୍ଷା କରିପାରିବ। ଉଭୟ ଗ୍ରାମାଞ୍ଚଳ ଏବଂ ସହରାଞ୍ଚଳରେ ସଚେତନତା ସୃଷ୍ଟି କରିବା ଦିଗରେ ସ୍ବେଚ୍ଛାସେବୀଙ୍କ ଭୂମିକା ଗୁରୁତ୍ୱପୂର୍ଣ୍ଣ। ସେମାନଙ୍କ ନିଷ୍ଠା, ଦଳଗତ କାର୍ଯ୍ୟ କରୋନା ବିରୋଧୀ ଲଢ଼େଇରେ କାମରେ ଆସିବ ବୋଲି କହିଛନ୍ତି ଜିଲାପାଳ ଭୂମେଶ ଚନ୍ଦ୍ର ବେହେରା। ଜିଲା କାର୍ଯ୍ୟାଳୟ ଓସ୍ୱାନ ହଲରେ ଶନିବାର ଭିଡିଓ କନ୍ଫରେନ୍ସ ମାଧ୍ୟମରେ ଜିଲାର ଏନ୍ଜିଓ କର୍ମକର୍ତ୍ତାଙ୍କ ସହ ଆଲୋଚନା କରିବା ଅବସରରେ ଜିଲାପାଳ ଏପରି ଆହ୍ବାନ ଦେଇଛନ୍ତି।
ଏପରି ସଙ୍କଟ ପରିସ୍ଥିତିରେ ପରିବେଶ ସଫାସୁତରା ରଖିବା, ଅସହାୟଙ୍କୁ ଆବଶ୍ୟକ ସହାୟତା ଯୋଗାଇବା, ସେମାନଙ୍କ ମନୋବଳ ବୃଦ୍ଧି କରିବା, ସାମାଜିକ ଦୂରତା ବଜାୟ ରଖିବା ଦିଗରେ ସଚେତନ କରାଇବା, ଫେରନ୍ତା ଶ୍ରମିକଙ୍କୁ ଚିହ୍ନଟ, ଅପପ୍ରଚାର କରୁଥିବା ବ୍ୟକ୍ତିଙ୍କ ଉପରେ ନଜର ରଖିବା ଗୁରୁତ୍ୱପୂର୍ଣ୍ଣ। ଏହାକୁ ସ୍ବେଚ୍ଛାସେବୀମାନେ ଭଲ ଭାବେ ତୁଲାଇପାରିବେ ବୋଲି ଜିଲାପାଳ ଆଶାବ୍ୟକ୍ତ କରିଥିଲେ। କରୋନା ରୋଗୀଙ୍କ ଚିକିତ୍ସା ଲାଗି ଗ୍ରାମାଞ୍ଚଳରେ ୨୧୨ ଏବଂ ସହରାଞ୍ଚଳରେ ୭ଟି ଅସ୍ଥାୟୀ ଚିକିତ୍ସା କେନ୍ଦ୍ର ଖୋଲାଯାଇଛି। କରୋନା ସନ୍ଦିଗ୍ଧ ଲଜ୍ଜାବୋଧ ନ କରି ନିଜେ ଆଗକୁ ଆସିବା ଉଚିତ ବୋଲି ଜିଲାପାଳ ପରାମର୍ଶ ଦେଇଛନ୍ତି। ଲକ୍ଡାଉନ ନିୟମ ଉଲ୍ଲଂଘନକାରୀଙ୍କ ଉପରେ କାର୍ଯ୍ୟାନୁଷ୍ଠାନ, ସାମାଜିକ ଦୂରତ୍ୱ ରକ୍ଷା ନ କଲେ ସାପ୍ତାହିକ ହାଟକୁ ସ୍ଥାନାନ୍ତର କିମ୍ବା ବନ୍ଦ କରିବାକୁ ଜିଲାପାଳ ନିର୍ଦ୍ଦେଶ ଦେଇଛନ୍ତି। ବୈଠକରେ ଅତିରିକ୍ତ ଜିଲାପାଳ ଭବେଶ କୁମାର ନାୟକ(ପ୍ରଶାସନ), ଅତିରିକ୍ତ ଜିଲାପାଳ ସୌଦାମିନୀ ସେଠି(ରାଜସ୍ବ), ପିଡି ଡିଆରଡିଏ ନରୋତ୍ତମ ବେହେରା, ସୂଚନା ଓ ଲୋକସମ୍ପର୍କ ଅଧିକାରୀ ରଞ୍ଜନ କୁମାର ରାଉତ ପ୍ରମୁଖ ଉପସ୍ଥିତ ଥିଲେ।
