କଲମ୍ବୋ,୨୬।୪: ଇଷ୍ଟର ସନ୍ ଡେ’ରେ ଶ୍ରୀଲଙ୍କାରେ ହୋଇଥିବା ସିରିଏଲ ବୋମା ବିସ୍ଫୋରଣ ସାରା ବିଶ୍ୱକୁ ଥରାଇ ଦେଇଥିଲା। ଏଥିରେ ଶ୍ରୀଲଙ୍କା ପୋଲିସ ମଧ୍ୟ ଅଡୁଆରେ ପଡିଯାଇଥିଲା। ସନ୍ଦିଗ୍ଧଙ୍କୁ ଖୋଜିବା ଲାଗି ପୋଲିସ ପକ୍ଷରୁ ତୁରନ୍ତ କେତେଜଣଙ୍କ ଫଟୋ ଜାରି କରାଯାଇଥିଲା। ଏଥିରେ ପୋଲିସ ୩ ପୁରୁଷ ଓ ୩ ମହିଳାଙ୍କ ଫଟୋ ଜାରି କରିଥିଲା। ହେଲେ ସେଥିମଧ୍ୟରୁ ଜଣେ ମହିଳା ସନ୍ଦିଗ୍ଧଙ୍କ ନାଁ ସହ ଆମେରିକାର ଜଣେ ମହିଳାଙ୍କ ଫଟୋ ଭୁଲରେ ଲଗାଇ ଦେଇଥିଲା ପୋଲିସ। ସନ୍ଦିଗ୍ଧ ମହିଳାଙ୍କ ନାଁ ଥିଲା ଅବଦୁଲ କାଦିର ଫାତିମା ଖଜିଆ ହେଲେ ତାଙ୍କ ସ୍ଥାନରେ ଫଟୋ ଲାଗିଥିଲା ଉମାରା ମଜିଦଙ୍କର। ସେ ଆମେରିକାରେ ରହୁଥିବା ବେଳେ ତାଙ୍କ ମାତାପିତା ଶ୍ରୀଲଙ୍କାରେ ରହୁଛନ୍ତି। ଏହାକୁ ଦେଖିବା ପରେ ଉମାରା ତାଙ୍କ ଫେସବୁକ୍ ମାଧ୍ୟମରେ ଏହା ଏକ ଭୁଲ୍ ଫଟୋ ବୋଲି ଦର୍ଶାଇଥିଲେ। ଏହାପରେ ପୋଲିସ ନିଜର ଭୁଲ୍ ସ୍ବିକାର କରିଥିଲା।
