ଆନନ୍ଦପୁର,୨୯। ୩(ସ୍ବ.ପ୍ର.)- କରୋନା ପାଇଁ ସମଗ୍ର ଅଞ୍ଚଳ ଲକ୍ ଡାଉନ୍। ଏହା ଦ୍ୱାରା ଶ୍ରମିକମାନେ କାମଧନ୍ଦା ନ ପାଇ ନିରାଶ ହେଉଛନ୍ତି। ଭାଇରସ୍ର ଭୟାବହତାକୁ ଦୃଷ୍ଟିରେ ରଖି ଶ୍ରମିକମାନେ ପରିସ୍ଥିତିର ମୁକାବିଲା କରିବା ପାଇଁ ପଛଘୁଞ୍ଚା ଦେଇନାହାନ୍ତି। ରବିବାର ଏଭଳି ଏକ ଘଟଣା ଆନନ୍ଦପୁର ଅଞ୍ଚଳରେ ଦେଖିବାକୁ ମିଳିଥିଲା। ଶ୍ରମିକଙ୍କର କର୍ମସ୍ଥଳରେ କାମଧନ୍ଦା ବନ୍ଦ ହୋଇଯାଇଥିବାରୁ ସେମାନେ ବାଧ୍ୟ ହୋଇ ନିଜ ଘରକୁ ଫେରିଛନ୍ତି। ଏହି ଶ୍ରମିକ ଶ୍ରେଣୀର କିଛି ପରିବାର ନିଜର କର୍ମସ୍ଥଳରୁ ଫେରିବା ସମୟରେ ଆନନ୍ଦପୁର ଠାରେ ବିଶ୍ରାମ ନେଇଥିଲେ। ସେମାନଙ୍କ ସମ୍ପର୍କରେ ସୂଚନା ପାଇ ଆନନ୍ଦପୁର ପ୍ରଶାସନ ପକ୍ଷରୁ ସହାୟତା କରାଯାଇଛି। ସୂଚନାଯୋଗ୍ୟ ମୟୁରଭଞ୍ଜ ଜିଲା ଠାକୁରମୁଣ୍ଡା ଏବଂ କରଞ୍ଜିଆ ଅଞ୍ଚଳର କେତେକ ଶ୍ରମିକ ପରିବାର ସୁଦୁର କୁଆଖିଆ ଅଞ୍ଚଳରେ ରହି କାର୍ଯ୍ୟ କରିଆସୁଥିଲେ। ସମଗ୍ର ଅଞ୍ଚଳରେ ଲକ୍ ଡାଉନ୍ ଲାଗୁ ହୋଇଥିବାରୁ ଶ୍ରମିକମାନେ ସେମାନଙ୍କ ବୃତ୍ତିରେ ଯୋଗଦେଇ ପାରି ନ ଥିଲେ। ଫଳରେ ଶନିବାର ସନ୍ଧ୍ୟା ୫ ଟା ସମୟରେ କୁଆଖିଆରୁ ଚାଲି ଚାଲି ଶ୍ରମିକ ମାନେ ସେମାନଙ୍କର ପରିବାର ସହିତ ସୁଦୁର ଠାକୁରମୁଣ୍ଡା ଏବଂ କରଞ୍ଜିଆ ଅଞ୍ଚଳକୁ ଯାତ୍ରା କରିଥିଲେ। ୨୯ ତାରିଖ ରବିବାର ସକାଳ ୭ ଟା ସମୟରେ ସେମାନେ ଆନନ୍ଦପୁରର ବାଙ୍ଖିଡି ଅଞ୍ଚଳରେ ବିଶ୍ରାମ ନେଇଥିଲେ। ସେମାନେ ଖାଇବାରେ ବହୁ ଅସୁବିଧାର ସମ୍ମୁଖୀନ ହେବା କଥା ଶୁଣିବା ପରେ ଆନନ୍ଦପୁର ପୌର ଅଧିକାରୀ ହିତାଂଶୁ ଶେଖର ସାମଲ, ତହସିଲଦାର ତପନ କୁମାର ନାୟକ ଅସହାୟ ଶ୍ରମିକମାନଙ୍କ ନିକଟରେ ପହଞ୍ଚି ଆବଶ୍ୟକ ବିସ୍କୁଟ, ବ୍ରେଡ, ପାଣି ବୋତଲର ବ୍ୟବସ୍ଥା ଗ୍ରହଣ କରିବା ସହିତ ସେମାନେ କିପରି ନିଜ ଘରେ ଖୁସିରେ ପହଞ୍ଚିବେ ସେଥିପାଇଁ ଗାଡିର ବ୍ୟବସ୍ଥା ଗ୍ରହଣ କରିଥିଲେ। ଅନ୍ୟପକ୍ଷରେ ସ୍ଥାନୀୟ ବାଙ୍ଖିଡି ଗ୍ରାମର ଲୋକମାନଙ୍କ ଦ୍ୱାରା ସେମାନଙ୍କ ପାଇଁ ରନ୍ଧା ଖାଦ୍ୟର ବ୍ୟବସ୍ଥା ଗ୍ରହଣ କରାଯାଇଥିଲା।
ଫଟୋ
