ତାଳଚେର, ୨୧ା୪(ନି.ପ୍ର.)- ଘର ବାହାରେ ଶୋଇଥିବାବେଳେ ଏକ ବୋଲେରୋ ମାଡ଼ିଯିବାରୁ ତାଳଚେର ପୌରାଞ୍ଚଳ ୪ ନମ୍ବର ଓ୍ବାର୍ଡର ମଲ୍ଲୀ ଦାସ(୬୨)ଙ୍କ ମୃତ୍ୟୁ ଘଟିଛି। ଗରମ ହେବାରୁ ସୋମବାର ରାତିରେ ମଲ୍ଲୀ ଘର ପାଖ ଏକ ପକ୍କା ଚଟାଣରେ ଶୋଇଥିଲେ। ରାତି ପ୍ରାୟ ସାଢେ ୧୦ଟା ବେଳେ ଏକ ବୋଲେରୋ(ନଂ. ଓଡି ୩୫ ଟି ୯୨୭୮) ଦ୍ରୁତ ଗତିରେ ଆସି ପ୍ରଥମେ ଏକ କୁକୁରକୁ ଧକ୍କା ଦେଇଥିଲା। ପରେ ସିଂହ ସାହି ଭିତରେ ପଶି ଅରାଚଣ୍ଡୀ ମନ୍ଦିର ନିକଟ ଦେଇ ଯିବା ସହ ମଲ୍ଲୀଙ୍କ ଉପରେ ମାଡ଼ି ଯାଇଥିଲା। ଗୁରୁତର ଅବସ୍ଥାରେ ତାଙ୍କୁ ପ୍ରଥମେ ଉପଖଣ୍ଡ ଡାକ୍ତରଖାନା ଓ ପରେ ଅନୁଗୋଳ ମୁଖ୍ୟ ଡାକ୍ତରଖାନାକୁ ସ୍ଥାନାନ୍ତରିତ କରାଯାଇଥିଲା। ସେଠାରେ ତାଙ୍କର ମୃତ୍ୟୁ ହୋଇଥିଲା। ବୋଲେରୋରେ ୩ ଜଣ ଯୁବକ ଥିବା ଜଣାପଡିଛି। ତାଳଚେର ପୋଲିସ ଗାଡି ସହ ଜଣେ ଯୁବକକୁ ଥାନାରେ ଅଟକ ରଖି ପଚରାଉଚରା ଚଳାଇଛି।
