ଆରଡି, ୨ା୭(ଡି.ଏନ.ଏ.)-ବଙ୍ଗୋପସାଗରରେ ଲଘୁଚାପ ଅବପାତ ରୂପ ନେବା ପରେ ଚାନ୍ଦବାଲି ଜିଲାରେ ଲଗାଣବର୍ଷା ଲାଗି ରହିଛି। ଚାନ୍ଦବାଲି ବ୍ଲକରେ ସର୍ବାଧିକ ବର୍ଷା ହୋଇଛି। ମଙ୍ଗଳବାର ଅମାବାସ୍ୟା ଯୋଗୁ ସମୁଦ୍ର ଅତ୍ୟନ୍ତ ଜୁଆରିଆ ରହିଛି। ମୁହାଣ ଦେଇ ବୈତରଣୀକୁ ଅଧିକ ଜୁଆର ପାଣି ପଶିିଛି। ଏ ନେଇ ବୈତରଣୀ ଓ ସାଳନ୍ଦୀ ମିଶ୍ରଣସ୍ଥଳ ସନ୍ନିକଟ ନଦୀକୂଳବାସୀ ଆତଙ୍କିତ ହୋଇପଡିଛନ୍ତି। ଆରଡି ପଞ୍ଚାୟତ ଶୀତଳପୁର ଗାଁକୁ ସାଳନ୍ଦୀ ନଦୀରେ ଆସିଥିବା ଜୁଆର ପାଣି ମାଡି ଯାଇଛି। ଲୁଣିପାଣି ମାଡିବାରୁ ଖରିଫ ଫସଲ ଗୁରୁତର ବାଧାପ୍ରାପ୍ତ ହେବା ଆଶଙ୍କା ଦେଖାଦେଇଛି।
ଶୀତଳପୁର ଗାଁ ଦାଣ୍ଡରେ ବର୍ଷା ଓ ଜୁଆର ପାଣି ଲହଡ଼ି ଭାଙ୍ଗୁଥିବା ଏବଂ ଗାଁ ରାସ୍ତା ବୁଡି ରହିଥିବାରୁ ମଙ୍ଗଳବାର ଛାତ୍ରୀଛାତ୍ର ବିଦ୍ୟାଳୟକୁ ଯାଇପାରି ନାହାନ୍ତି। ଜୁଆର ପାଣି ଛାଡିବାକୁ ୪ରୁ ୫ ଦିନ ଲାଗିବ ବୋଲି ଲୋକେ ଆଶଙ୍କା ପ୍ରକାଶ କରିଛନ୍ତି। ଅନ୍ୟପକ୍ଷେ ନଦୀରେ ଥିବା କୁମ୍ଭୀର ଆକ୍ରମଣ ଭୟ ଯୋଗୁ ଲୋକମାନେ ନଦୀକୂଳ ରାସ୍ତାରେ ଯିବାକୁ ଡରୁଛନ୍ତି। କୁମ୍ଭୀର ଆକ୍ରମଣରୁ ରକ୍ଷା ପାଇବା ଲାଗି ପାରମ୍ପରିକ ବିଶ୍ୱାସ ଅନୁଯାୟୀ ଲୋକେ ନଦୀ କୂଳରେ ଡଙ୍ଗା ବାନ୍ଧି ରଖିଥିବା କହିଛନ୍ତି। ଏଥର ଲୁଣା ପାଣି ଦାରୁ ଗାଁକୁ ରକ୍ଷା କରିବା ଲାଗି ଗତ ଜାନୁୟାରୀରେ ସାଳନ୍ଦୀ ନଦୀ କୂଳରେ ଲୁଣାବନ୍ଧ ନିର୍ମାଣ ଆରମ୍ଭ ହୋଇଥିଲା ା ଶୀତଳପୁର ଗାଁ ନିକଟରେ ନଦୀବନ୍ଧରେ ମୁଠାଏ ମାଟି ପଡି ନ ଥିବାରୁ ଏବେ ଜୁଆର ପାଣି କ୍ଷତି ଘଟାଇଥିବା ଗ୍ରାମବାସୀ ଅଭିଯୋଗ କରିଛନ୍ତି। ପ୍ରତିବର୍ଷ ଏଭଳି ସମସ୍ୟା ସୃଷ୍ଟି ହେଉଥିଲେ ମଧ୍ୟ ପ୍ରଶାସନ କେବଳ ବାଲିବସ୍ତା ପକାଇ ଅସ୍ଥାୟୀ ପଦକ୍ଷେପ ନେଉ ନ ଥିବାରୁ ଏହାର ସ୍ଥାୟୀ ପ୍ରତିକାର ହୋଇପାରୁ ନାହିଁ ା ଏଥର ବର୍ଷାଦିନ ଆରମ୍ଭରୁ ଜୁଆର ପାଣି ଗ୍ରାମବାସୀଙ୍କ ଆଖିରୁ ନିଦ ହଜାଇଛି ବୋଲି ଗ୍ରାମର ଅଧିବାସୀ ପ୍ରଦୀପ ନାୟକ କହିଛନ୍ତି। ଆରଡି ସରପଞ୍ଚ ଅରବିନ୍ଦ ପାଢୀଙ୍କୁ ପଚାରିବାରୁ ଗ୍ରାମବାସୀଙ୍କ ସହ ଆଲୋଚନା ପରେ ବାଲିବସ୍ତା ପକାଯିବା ଭଳି ପଦକ୍ଷେପ ନିଆଯିବ ବୋଲି କହିଛନ୍ତି।
