ଶ୍ରୀନଗର/ନୂଆଦିଲ୍ଲୀ, ୭ା୮(ପି.ଟି./ଆଇଏଏନ୍ଏସ୍): ସମ୍ବିଧାନ ଅନୁଚ୍ଛେଦ ୩୭୦ ଉଚ୍ଛେଦ ପରେ ଜମ୍ମୁ-କଶ୍ମୀରର ପୂର୍ବତନ ମୁଖ୍ୟମନ୍ତ୍ରୀ ଫାରୁକ୍ ଅବ୍ଦୁଲ୍ଲା ମଙ୍ଗଳବାର କେନ୍ଦ୍ର ସରକାରଙ୍କ ଉପରେ ବର୍ଷିଛନ୍ତି। ଶ୍ରୀନଗରସ୍ଥିତ ତାଙ୍କ ବାସଭବନରେ ଖବରଦାତାଙ୍କୁ ସମ୍ବୋଧିତ କରି ଫାରୁକ୍ କହିଛନ୍ତି, କେନ୍ଦ୍ର ଆମକୁ ହତ୍ୟା କରିବାକୁ ଚାହୁଁଛି। ଲୋକଙ୍କୁ ଜେଲ୍ରେ ଭର୍ତ୍ତି କରାଯାଉଛି। ପୁଅ ଓମାର ଅବ୍ଦୁଲ୍ଲାଙ୍କୁ ମଧ୍ୟ ବନ୍ଦୀ କରାଯାଇଛି। ଆମେ ଗ୍ରେନେଡ୍ ଫିଙ୍ଗିବା ବା ଟେକାମାଡ଼ କରିବା ଲୋକ ନୋହୁଁ। ମୋ ଭାରତ ସମସ୍ତଙ୍କ ପାଇଁ ଗଣତାନ୍ତ୍ରିକ ଓ ଧର୍ମନିରପେକ୍ଷ। ଆମେ ଶାନ୍ତିପୂର୍ଣ୍ଣ ଉପାୟରେ ପରିବର୍ତ୍ତନ ଚାହୁଁଛୁ। କେନ୍ଦ୍ର ସରକାର ଯାହା କରୁଛନ୍ତି, ତାହା ଅଗଣତାନ୍ତ୍ରିକ। ଆମକୁ ଗୃହବନ୍ଦୀ ରଖାଯାଇଥିବାବେଳେ ପ୍ରକୃତ ସ୍ଥିତିକୁ ନେଇ ସ୍ବରାଷ୍ଟ୍ରମନ୍ତ୍ରୀ ଅମିତ୍ ଶାହ ମିଛ କହୁଛନ୍ତି ବୋଲି ନ୍ୟାଶନାଲ କନ୍ଫରେନ୍ସ (ଏନ୍ସି) ଅଧ୍ୟକ୍ଷ ଫାରୁକ୍ ଅଭିଯୋଗ କରିଛନ୍ତି। ଫାରୁକ୍ଙ୍କ ମନ୍ତବ୍ୟ ପରେ ଲୋକ ସଭାରେ ବିରୋଧୀ ସଦସ୍ୟମାନେ ସରକାରଙ୍କୁ ଘେରିଥିବାବେଳେ ଶାହ ଏହାକୁ ଖଣ୍ଡନ କରିଛନ୍ତି। ଶାହ କହିଛନ୍ତି, ଫାରୁକ୍ଙ୍କୁ ଅଟକ ରଖାଯାଇନାହିଁ କିମ୍ବା ଗିରଫ କରାଯାଇନାହିଁ। ସେ ସ୍ବଇଚ୍ଛାରେ ତାଙ୍କ ଘରେ ଅଛନ୍ତି। ଫାରୁକ୍ ତାଙ୍କ ଘରୁ ବାହାରିବାକୁ ନ ଚାହିଁଲେ ତାଙ୍କୁ କ’ଣ ବନ୍ଧୁକମୁନରେ ବାହାରକୁ ଅଣାଯିବ ବୋଲି ଶାହ ପ୍ରଶ୍ନ କରିଛନ୍ତି।
