ଖଇରା, ୩୦।୫(ଡି.ଏନ.ଏ.)-ପୁରୀ ଜଗନ୍ନାଥ ସଂସ୍କୃତ ବିଶ୍ୱବିଦ୍ୟାଳୟର ଉପଶାସ୍ତ୍ରୀ ଓ ଶାସ୍ତ୍ରୀ ପରୀକ୍ଷା ଫଳ ବୁଧବାର ପ୍ରକାଶ ପାଇଛି। ଶାସ୍ତ୍ରୀ (+୩)ରେ ଖଇରା ବ୍ଲକ ଅଧୀନ ଅଲିପୁର ଶ୍ୟାମରାଈ ସଂସ୍କୃତ ମହାବିଦ୍ୟାଳୟ ଶେଷବର୍ଷ ଛାତ୍ରୀ ଅନୁପମା ମହାରଣା ସାହିତ୍ୟ ସମ୍ମାନରେ ଟପ୍ପର ହୋଇଛନ୍ତି। ସେ ୨୧ଶହ ନମ୍ବରରୁ ୧୩୮୪ନମ୍ବର ରଖି ଏହି ଯୋଗ୍ୟତା ହାସଲ କରିଛନ୍ତି। ଅନୁପମା କୁହନ୍ତି, ସେ ସକାଳ ଓ ରାତିରେ ପଢ଼ାପଢ଼ି କରୁଥିଲେ। ଆର୍ଥତ୍କ ପରିସ୍ଥିତି ସ୍ବଚ୍ଛଳ ନ ଥିବାରୁ ସନ୍ଧ୍ୟାରେ ତୃତୀୟ ଓ ଚତୁର୍ଥଶ୍ରେଣୀ ପିଲାଙ୍କୁ ଟ୍ୟୁଶନ କରୁଥିଲେ। ଭବିଷ୍ୟତରେ ଜଣେ ସଫଳ ଶିକ୍ଷକ ହେବା ପାଇଁ ସେ ଲକ୍ଷ୍ୟ ରଖିଥିବା କହିଛନ୍ତି। ଅଧ୍ୟାପକ ଉମାକାନ୍ତ ନାୟକ ତାଙ୍କୁ ପ୍ରତ୍ୟେକ ବିଷୟରେ ଗାଇଡ଼୍ କରୁଥିଲେ। ଏଣୁ ସଫଳତାର ମୁଖ୍ୟ ଶ୍ରେୟ ଅଧ୍ୟାପକ ନାୟକଙ୍କୁ ଦେଇଛନ୍ତି। ଏହାସହ ବାପା ନିରଞ୍ଜନ ମହାରଣା, ମା’ ନିରୁପମା ତଥା ଅନ୍ୟ ଅଧ୍ୟାପିକା ଓ ଅଧ୍ୟାପକଙ୍କ ଆଶୀର୍ବାଦରୁ ଏହି ସଫଳତା ମିଳିଥିବା ସେ କହିଛନ୍ତି। ପାଠପଢ଼ା ସହ ସଂସ୍କୃତରେ ବକ୍ତୃତା ଦେବାକୁ ସେ ପସନ୍ଦ କରିଥାନ୍ତି। ଖଇରା ବ୍ଲକ ଝିଙ୍କିରିଆ ପଞ୍ଚାୟତ ଅଧୀନ ମୁସ୍ତଫାବାଦ ଗ୍ରାମର ଅନୁପମାଙ୍କ ବାପା ନିରଞ୍ଜନ ବଢ଼େଇ କାଠ କାମ କରି ଜୀବିକାନିର୍ବାହ କରିଥାନ୍ତି।
