ଧରାକୋଟ,୨୮ା୪(ଡି.ଏନ.ଏ.)- ଧରାକୋଟ ଥାନା ଚମ୍ପାପଲ୍ଲି ଗ୍ରାମରେ ବ୍ୟାପକ ଚୋରାମଦ ପ୍ରସ୍ତୁତି ଚାଲିଥିବାବେଳେ ବାରମ୍ବାର ପୋଲିସ ଓ ଅବକାରୀ ବିଭାଗର ଚଢ଼ାଉ ଜାରି ରହିଛି। ମାତ୍ର ମଦ ପ୍ରସ୍ତୁତକାରୀ ଭୃକ୍ଷେପ କରୁ ନ ଥିବା ଜଣାପଡିଛି। ମଙ୍ଗଳବାର ଭୋରରୁ ଆସିକା ଏସଡିପିଓ ସୂର୍ଯ୍ୟମଣି ପ୍ରଧାନଙ୍କ ନେତୃତ୍ୱରେ ଧରାକୋଟ ଥାନାଧିକାରୀ ଶହଦେବ ମହାପାତ୍ର ଓ ଜିଲା ଅବକାରୀ ବିଭାଗର ବରିଷ୍ଠ କର୍ମକର୍ତ୍ତା ଚଢ଼ାଉ କରି ୫ହଜାର ଲିଟରରୁ ଊର୍ଦ୍ଧ୍ୱ ଦେଶୀ ପୋଚ ନଷ୍ଟ କରିବା ସହ ୧୦୦ ଲିଟର ଦେଶୀ ରନ୍ଧାମଦ ଜବତ କରିଛନ୍ତି। ଚମ୍ପାପଲ୍ଲୀ ଗ୍ରାମର ଗୋପାଳ ନାଇକ ଓ ବିନୋଦ ନାଇକଙ୍କୁ ମଦ ପ୍ରସ୍ତୁତ ଅଭିଯୋଗରେ ଗିରଫ କରାଯାଇ ମାମଲା ନଂ.୬୪, ୬୫/୨୦ରେ କୋର୍ଟଚାଲାଣ କରାଯାଇଛି। ଯଦି ନ ସୁଧୁରନ୍ତି, ଏଣିକି କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଆସିକା ଏସ୍ଡିପିଓ କହିଛନ୍ତି।
