ସିମୁଳିଆ, ୨୪ା୧୦(ସନ୍ତୋଷ କୁମାର ନାୟକ)-ଏବେ ଶିକ୍ଷାଦାନ କରି ପିଲାମାନଙ୍କୁ ଶିକ୍ଷିତ କରୁଛନ୍ତି। ଜୀବନର ଅନ୍ତିମ ସମୟରେ ଅଙ୍ଗଦାନ ସହ ତାଙ୍କ ଶରୀରକୁ ମଧ୍ୟ ବିଜ୍ଞାନ ବିଭାଗର ଛାତ୍ରୀଛାତ୍ରଙ୍କୁ ଦାନ କରିବାକୁ ଇଚ୍ଛା ରଖିଛନ୍ତି ବାଲେଶ୍ୱର ଜିଲା ସିମୁଳିଆ ବ୍ଲକର ୬୦ବର୍ଷୀୟା ଶିକ୍ଷୟିତ୍ରୀ କୁନ୍ତଳା ଜେନା। ତାଙ୍କର ଏଭଳି ମନୋଭାବ ଅନ୍ୟମାନଙ୍କ ଲାଗି ଉଦାହରଣ ପାଲଟିଛି। କୁନ୍ତଳାଙ୍କ ଘର ସିମୁଳିଆ ବ୍ଲକ ବାଙ୍ଗରଖଡ଼ିଗଡ଼ିଆ ପଞ୍ଚାୟତର ବଣା ଗ୍ରାମରେ।
୧୯୮୭ ମସିହାରେ ସିଟି ପାସ୍୍ କରି ସେ ମୟୂରଭଞ୍ଜ ଜିଲା କପ୍ତିପଦା ବ୍ଲକ ହଳଦିଆସାହି ପ୍ରାଥମିକ ବିଦ୍ୟାଳୟରେ ଶିକ୍ଷୟିତ୍ରୀ ଭାବେ ଯୋଗ ଦେଇଥିଲେ। ପରେ ଧପଡ଼ା କଲୋନୀ ସ୍କୁଲ, ବନ୍ଧମାଳ ପ୍ରାଥମିକ ବିଦ୍ୟାଳୟ, ସିମୁଳିଆ ଓ ପରେ ବାଲେଶ୍ୱର ଜିଲା ସିମୁଳିଆ ବ୍ଲକର ଝାଟିଆ ପ୍ରାଥମିକ, ବେଲଗଡ଼ିଆ ପ୍ରାଥମିକ ଓ ବର୍ତ୍ତମାନ ବାଉରିପଦା ନୋଡ଼ାଲ ଉପ୍ରା ବିଦ୍ୟାଳୟରେ ସହକାରୀ ଶିକ୍ଷୟିତ୍ରୀ ରୂପେ ଅଛନ୍ତି। ଆସନ୍ତା ଫେବୃୟାରୀରେ ସେ ଅବସର ନେବେ। ତାଙ୍କ ସ୍ବାମୀ ଅର୍ଜୁନ ଯେନା ଜଣେ ଅବସରପ୍ରାପ୍ତ ସରକାରୀ କର୍ମଚାରୀ ହୋଇଥିବାବେଳେ ପୁଅ ଅଜିତ, ଅମରଜିତ, ଝିଅ ଅନିମା ଓ ଅସୀମା ସମସ୍ତେ ଉଚ୍ଚ ଶିକ୍ଷିତ ହେବା ସହିତ ସ୍ବାବଲମ୍ବୀ ମଧ୍ୟ। ତେବେ ଶରୀର ଦାନ ପାଇଁ ପାରିବାରିକ ସମ୍ମତି ସମ୍ପର୍କରେ ଶିକ୍ଷୟିତ୍ରୀ କୁନ୍ତଳା କୁହନ୍ତି ପ୍ରଥମେ ପିଲାମାନେ ଅରାଜି ହେଉଥିଲେ। ତେବେ ଏ ସମ୍ପର୍କରେ ବୁଝାଇ ଦେବା ପରେ ପିଲାମାନଙ୍କର କୌଣସି ଅଭିଯୋଗ ନ ଥିବା ସେ କହିଛନ୍ତି।
