ନୂଆଦିଲ୍ଲୀ,୨୧।୫: ଲୋକ ସଭା ନିର୍ବାଚନର ଫଳାଫଳ ଆସିବା ପୂର୍ବରୁ ଅଫ୍ ଏୟାର ହୋଇଯାଇଛି ‘ନମୋ ଟିଭି’। ମାର୍ଚ୍ଚ ୩୧ରୁ ଅନ୍ ଏୟାର ହୋଇଥିବା ଏହି ଚ୍ୟାନେଲରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପୁରୁଣା ଭାଷଣ ଓ ଭାଜପା ସହ ସମ୍ପର୍କିତ ସାମଗ୍ରୀକୁ ପ୍ରସାରଣ କରାଯାଉଥିଲା। ମେ ୧୭କୁ ଏହି ଚ୍ୟାନେଲର ପ୍ରସାରଣ ବନ୍ଦ ହୋଇଯାଇଥିବା ଜଣାପଡ଼ିଛି। ଏନେଇ ସୂଚନା ଦେଇଛନ୍ତି ଡାଇରେକ୍ଟ ଟୁ ହୋମ୍(ଡିଟିଏଚ୍)ର ଦୁଇ ବରିଷ୍ଠ ଅଧିକାରୀ। ନମୋ ଚ୍ୟାନେଲର ପ୍ରସାରଣ ଦୁଇ-ତିନି ଦିନ ପୂର୍ବରୁ ବନ୍ଦ ହୋଇଯାଇଛି ବୋଲି ଡିଟିଏଚ୍ ବରିଷ୍ଠ ଅଧିକାରୀ କହିଛନ୍ତି। ସେହି ସମୟରେ ଭାଜପା ସଂଚାଳିତ କରୁଥିବା ଇଣ୍ଟରନେଟର ସିଗ୍ନାଲ ମିଳିବା ବନ୍ଦ ହୋଇଯାଇଥିଲା ବୋଲି ସେ କହିଛନ୍ତି। ଅନ୍ୟ ଅଧିକାରୀଙ୍କ କହିବା ଅନୁସାରେ, ମେ ୧୭କୁ ୭ମ ପର୍ଯ୍ୟାୟ ଲୋକ ସଭା ନିର୍ବାଚନ ପ୍ରଚାର ସରିଥିବା ଯୋଗୁ ଏହାର ପ୍ରସାରଣ ବନ୍ଦ ହୋଇଥିଲା। ଏହାର ସତ୍ୟତା ଜାଣିବା ପାଇଁ ଭାଜପା ସୋସିଆଲ ମିଡିଆର ମୁଖ୍ୟ ମାଲବୀୟଙ୍କୁ ପ୍ରଶ୍ନ କରାଯାଇଥିଲା। ଯେଉଁଦିନ ସମସ୍ତ ନିର୍ବାଚନ ପ୍ରଚାର ଶେଷ ହୋଇଥିଲା ସେହି ଦିନ ପ୍ରସାରଣ ବନ୍ଦ ହୋଇଥିଲା ବୋଲି ମାଲବୀୟ କହିଛନ୍ତି। ଏଥିସହ ଭାଜପା ଡିଟିଏଚ୍କୁ ୨ ମାସ ପର୍ଯ୍ୟନ୍ତ ପ୍ରୋଗ୍ରାମ ପ୍ରସାରିତ କରିବା ପାଇଁ ନିର୍ଦ୍ଦେଶ ଦିଆଯାଇଥିବା ବେଳେ ଏଥିପାଇଁ ପ୍ରତିମାସ ୨୫ଲକ୍ଷ ଟଙ୍କା ଦିଆଯାଇଥିବା ଜଣାପଡ଼ିଛି।
