ସମ୍ବଲପୁର,୨୮।୩(ବ୍ୟୁରୋ)-ଲକ୍ଡାଉନ ଘୋଷଣା ହେବା ପରେ ସମ୍ବଲପୁର ଜିଲାରେ ଦୋକାନ ବଜାରଗୁଡିକ ବନ୍ଦ ରହିଛି। ମହାନଗର ନିଗମ ପକ୍ଷରୁ ଶୁକ୍ରବାରଠାରୁ କିରାନା ସାମଗ୍ରୀ ଏବଂ ଔଷଧ ହୋମ ଡେଲିଭରି ଆରମ୍ଭ ହୋଇଛି । ହୋମଭେରି ନାମରେ ଏକ ପୋର୍ଟାଲ ପ୍ରଶାସନ ପକ୍ଷରୁ ଆରମ୍ଭ ହୋଇଛି। ଏଥିରେ ରିଟେଲର୍ ଓ ଡିଲରମାନଙ୍କୁ ରଖାଚଯାଇଛି । ଜଣେ ଗ୍ରାହକ ନିଜ ସାମଗ୍ରୀ ତାଲିକା ଦେଇ ଅଡର୍ ଦେଇପାରିବ । ନିକଟସ୍ଥ ରିଟେଲର୍ ଗ୍ରାହକଙ୍କୁ ସେବା ଯୋଗାଇ ଦେବ । କିଛି ଦିନ ହେବ ଲକ୍ ଡାଉନ ପରେ ଆଳୁ, ପିଆଜ ଦର ବୃଦ୍ଧି ହୋଇଛି । ଏହାକୁ ନେଇ ବିଭିନ୍ନ ସ୍ଥାନରେ ଉତ୍ତେଜନା ପ୍ରକାଶ ପାଇବା ସହ ଅଭିଯୋଗ ହୋଇଥିଲା । ଏବେ ପ୍ରଶାସନ ପକ୍ଷରୁ ଆଳୁ ଓ ପିଆଜ ପାଇଁ ସ୍ବତନ୍ତ୍ର ଭାବେ ବିକ୍ରି କରିବାକୁ ବ୍ୟବସ୍ଥା କରାଯାଇଛି । ପିଡିଏସ୍ ସାମଗ୍ରୀ ଭଳି ଡିଲର୍ ଓ କେତେକ ଏସ୍ଏଚ୍ଜି ଗ୍ରୁପଙ୍କୁ ଏଥିରେ ନିୟୋଜିତ କରାଯିବ । ସେମାନେ ହେଲସେଲ୍ ଦରଠାରୁ ମାତ୍ର ୫ ପ୍ରତିଶତ ଲାଭ ରଖି ବିକ୍ରି କରିବେ । ଯଦି ଅଧିକ ଦରରେ ବିକ୍ରି କଲେ ଅଭିଯୋଗ ଆସିଲେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ଏଭଳି ନିୟମ ପ୍ରତ୍ୟେକ ରିଟେଲର୍ ମାନଙ୍କୁ ମଧ୍ୟ ପାଳନ କରିବାକୁ ହେବ । ଏହାକୁ ନିୟନ୍ତ୍ରଣ କରିବା ପାଇଁ ମହାନଗର ନିଗମ ପକ୍ଷରୁ ୭ଟି ଇନ୍ଫେର୍ସମେଣ୍ଟ ଟିମ୍ ଗଠନ କରାଯାଇଛି । ସେମାନେ ବିଭିନ୍ନ ସ୍ଥାନରେ ଚଢ଼ାଉ କରି ସ୍ଥିତି ପରୀକ୍ଷା କରିବେ । ଏହାସହ ରାଜ୍ୟ ବାହାର ନାଗପୁର, ପଶ୍ଚିମବଙ୍ଗ ଭଳି ରାଜ୍ୟ ଗୁଡିକରୁ ଆସୁଥିବା ସାମଗ୍ରୀ କିପରି ଭାବେ ଜିଲାରେ ପହଞ୍ଚତ୍ବ ଜିଲାପ୍ରଶାସନ ବ୍ୟବସ୍ଥା କରିଛି। ଶୁକ୍ରବାର କ୍ଷେତରାଜପୁରକୁ ମାତ୍ର ୨ ଟ୍ରକରେ ୫ଶହ କୁଇଣ୍ଟାଲ ଆଳୁ ଆସିଥିଲା । ଦିନକରେ ଜିଲାରେ ମୋଟ ପ୍ରାୟ ୧୫ଶହ କୁଇଣ୍ଟାଲ ଆଳୁର ଆବଶ୍ୟକତା ରହିଛି । ତେଣୁ ଆବଶ୍ୟକତା ଅନୁସାରେ ଆଳୁ, ପିଆଜ ଆଣି ଏଫ୍ସିଆଇ ଗୋଦାମରେ ରଖିବା ପାଇଁ ନିର୍ଦ୍ଦେଶ ଦିଆଯାଇଛି । ପନିପରିବା ଦର ନିୟନ୍ତ୍ରଣ ରଖିବା ପାଇଁ ମହାନଗର ନିଗମକୁ ପ୍ରଶାସନ ନିର୍ଦ୍ଦେଶ ଦେଇଛି । ସାମାଜିକ ଦୂରତା ରଖି ପନିପରିବା ଦୋକାନ ଖୋଲିବା ସହ ଦର ନିୟନ୍ତ୍ରଣ ରଖିବା ପାଇଁ ପଦକ୍ଷେପ ଗ୍ରହଣ କରିବାକୁ ମହାନଗର ନିଗମ ଓ ପୋଲିସ ପକ୍ଷରୁ ପଦକ୍ଷେପ ଗ୍ରହଣ କରାଯାଇଛି। ଉତ୍ତରାଞ୍ଚଳ ପୋଲିସ ଡିଆଇଜି ହିମାଂଶୁ ଲାଲ ଓ ସମ୍ବଲପୁର ଏସ୍ପି ବିଶାଲ୍ କନୱର ସିଂ ବଜାରକୁ ଯାଇ ଲୋକମାନଙ୍କୁ ସଚେତନ କରାଉଛନ୍ତି ।
