ଲାଞ୍ଜିଗଡ଼,୧୪।୮(ଡି.ଏନ.ଏ.): କଳାହାଣ୍ଡି ଜିଲା ଲାଞ୍ଜିଗଡ ପଞ୍ଚାୟତ ସମିତି ସଭାଗୃହରେ ବ୍ଲକ ଅଧ୍ୟକ୍ଷ ଇଂ.ଫକୀର ମୋହନ ମାଝିଙ୍କ ସଭାପତିତ୍ୱରେ ଲାଞ୍ଜିଗଡ ପଞ୍ଚାୟତ ସମିତି ବୈଠକ ବୁଧବାର ଅନୁଷ୍ଠିତ ହୋଇଥିଲା। ବୈଠକରେ ବ୍ଲକର ୨୬ଟି ପଞ୍ଚାୟତରୁ ସରପଞ୍ଚ ଏବଂ ସମିତି ସଭ୍ୟମାନେ ଯୋଗଦେଇଥିଲେ। ପ୍ରଥମେ ବୈଠକରେ ବେଦାନ୍ତ ପକ୍ଷରୁ ନିର୍ମାଣ ହେଉଥିବା ନନ୍ଦଘରକୁ ନେଇ ହୋହାଲ୍ଲା ହୋଇଥିଲା। ବ୍ଲକରେ ଥିବା ଅଙ୍ଗନଓ୍ବାଡି କେନ୍ଦ୍ରଗୁଡିକୁ ବ୍ଲକ ତରଫରୁ ନିର୍ମାଣ କରାଯାଇଥିଲା। ବେଦାନ୍ତ କମ୍ପାନୀ ପୁରୁଣା ଅଙ୍ଗନଓ୍ବାଡି କୋଠାଗୁଡାକୁ ରଙ୍ଗବେରଙ୍ଗ କରି ନନ୍ଦଘର ବୋଲି ନାମ ଦେଇଛି ଓ ବଡବଡ ଅକ୍ଷରରେ ବେଦାନ୍ତ ଲେଖି ଲୋଗୋ ଲଗାଇଛି । ବିନା ପଞ୍ଚାୟତ ସମିତି ଅନିମୋଦନରେ ଏହା କାହିଁକି କରାଯାଉଛି ବୋଲି ସମିତି ସଭ୍ୟମାନେ ବିରୋଧ କରିଥିଲେ। ଲାଞ୍ଜିଗଡ ପଞ୍ଚାୟତ ସମିତିରେ ଥିବା ସମିତି ସଭ୍ୟମାନଙ୍କୁ କମ୍ପାନୀ ଅଣଦେଖା କରୁଛି। ଏହାକୁ ବରଦାସ୍ତ କରାଯିବ ନାହିଁ ବୋଲି ପୂର୍ବତନ ବ୍ଲକ ଉପାଧ୍ୟକ୍ଷ ତଥା କୋମର୍ଦ୍ଧା ସମିତିସଭ୍ୟ ଜଗଦିଶ ବେନିଆ ଚେତାବନୀ ଦେଇଥିଲେ। ସେହିପରି ବ୍ଲକରେ ଥିବା ଆରଡି ବିଭାଗ ଯନ୍ତ୍ରୀ, ପିଡବ୍ଲ୍ୟୁଡି ଯନ୍ତ୍ରୀ, ଏମଆଇ ଡିଭିଜନ ଯନ୍ତ୍ରୀ ରହିବା ପାଇଁ ଘର ତିଆରି ହୋଇଛି । ହେଲେ ସେମାନେ ବ୍ଲକରେ ନ ରହି ଭବାନୀପାଟଣାରେ ରହୁଛନ୍ତି । ଫଳରେ ସେମାନଙ୍କୁ ଦେଖା କରିବା ପାଇଁ ଅନେକ ଅସୁବିଧାର ସମ୍ମୁଖିନ ହେବାକୁ ପଡୁଛି ବୋଲି ସଭ୍ୟମାନେ ଅଭିଯୋଗ କରିଥିଲେ । ସମିତି ବୈଠକରେ ସମସ୍ତ ବିଭାଗ କର୍ମଚାରୀ ଉପସ୍ଥିତ ରହି ନିଜ ବିଭାଗରେ ଚାଲିଥିବା ଉନ୍ନୟନମୂଳକ କାମ ଉପରେ ଉପସ୍ଥାପନା କରିବା କଥା । କିନ୍ତୁ ବନବିଭାଗ, ଆଇଟିଡିଏ, ପିଡବ୍ଲ୍ୟୁଡ ଓ ବିଦ୍ୟୁତ ବିଭାଗ ବୈଠକରେ ଯୋଗଦେଇ ନ ଥିଲେ। ଏହାକୁ ନେଇ ଗୃହରେ ଅସନ୍ତୋଷ ସୃଷ୍ଟି ହୋଇଥିଲା। ବୈଠକରେ ଲାଞ୍ଜିଗଡ ବିଧାୟକ ପ୍ରଦିପ ଦିଶାରୀ ଯୋଗଦେଇ ଅନେକ ଉନ୍ନୟନମୂଳକ କାମର ସମିକ୍ଷା କରିଥିଲେ। ବିଡିଓ ମୁନିନ୍ଦ୍ର ହୋନାଗାଁ, ଏବିଡିଓ ବିଭୁତି ଭୁଷଣ ଶତପଥୀ, ଆସିଷ୍ଟାଣ୍ଡ ଇଞ୍ଜିନିୟର ବିଶ୍ୱନାଥ ପାଥ୍ର, ସିଡିପିଓ କୁସୁମ କୁମାରୀ ପ୍ରହରାଜ, ଜିପିଇଓ ଧର୍ମେନ୍ଦ୍ର ପ୍ରଧାନ, ଏସିଓ ଶଙ୍କର୍ଷଣ ସାହୁ ପ୍ରମୁଖ ଉପସ୍ଥିତ ଥିଲେ।
