କାବୁଲ: ଆଫଗାନିସ୍ତାନର ତାଲିବାନ୍ ଶାସନରେ ମହିଳାମାନେ ଶିକ୍ଷା ଓ ସାର୍ବଜନୀନ ଜୀବନରୁ ଦୂରେଇ ଯାଇଛନ୍ତି। ନାରୀ ସ୍ବାଧୀନତା ଉପରେ ଅଙ୍କୁଶ ଲାଗିଥିବାରୁ ସେମାନେ ନିଃସଙ୍ଗ ହୋଇପଡ଼ିଛନ୍ତି। ନିଃସଙ୍ଗତା ଦୂର ସହ ଜ୍ଞାନ ଆହରଣ ତଥା ଉଚିତ୍ ଢଙ୍ଗରେ ସମୟ ଅତିବାହିତ କରିବା ପାଇଁ ଆଫ୍ଗାନର ମହିଳା ଅଧିକାର କର୍ମୀମାନେ ନିଜସ୍ବ ଉଦ୍ୟମରେ କାବୁଲରେ ବୁଧବାର ଏକ ଲାଇବ୍ରେରି ଖୋଲିଛନ୍ତି। ଏହାକୁ ବିଭିନ୍ନ ମହଲରେ ପ୍ରଶଂସା କରାଯାଇଛି।
୨୦୨୦ ଅଗଷ୍ଟ ୧୫ରେ ଇସ୍ଲାମିକ ତାଲିବାନ୍ ଆଫଗାନିସ୍ତାନ ଦଖଲ ପରେ ମହିଳାଙ୍କ ସ୍ବାଧୀନତା ଛଡ଼ାଇ ନେଇଥିଲା। ମହିଳାମାନେ ଆପାଦମସ୍ତକ ପୋଷାକ ପରିଧାନ କରି କେବଳ ଜଣେ ପୁରୁଷ ସମ୍ପର୍କୀୟଙ୍କ ସହ ପଦାକୁ ଗୋଡ଼ କାଢ଼ିପାରିବେ ବୋଲି ତାଲିବାନ୍ ଫତଓ୍ବା ଜାରି କରିଥିଲା। ତାଲିବାନ୍ ଶାସକ ଗତ ମାର୍ଚ୍ଚରେ ଛାତ୍ରୀଙ୍କ ଉଚ୍ଚଶିକ୍ଷା ପାଇଁ ସ୍କୁଲ ଖୋଲାଯିବ ବୋଲି ପ୍ରତିଶ୍ରୁତି ଦେଇଥିଲେ। କିନ୍ତୁ ନିଜ ପ୍ରତିଶ୍ରୁତିରୁ ଓହରିଯିବା ପରେ ସବୁ ଉଚ୍ଚ ବିଦ୍ୟାଳୟରେ ତାଲା ଝୁଲୁଛି। ଏସବୁକୁ ଦୃଷ୍ଟିରେ ରଖି କେତେଜଣ ମହିଳା ନିଜସ୍ବ ଉଦ୍ୟମରେ ପାଠାଗାର ଆରମ୍ଭ କରିଛନ୍ତି। ଲାଇବ୍ରେରୀରେ ଉପନ୍ୟାସ, ଛବିଳ ବହି, ରାଜନୀତି, ଅର୍ଥନୀତି, ବିଜ୍ଞାନ ଆଦି ଉପରେ ୧ ହଜାରରୁ ଊର୍ଦ୍ଧ୍ୱ ପୁସ୍ତକ ରହିଛି। ବହିଗୁଡ଼ିକରୁ ଅଧିକାଂଶ ଶିକ୍ଷକ, କବି ଓ ଲେଖକମାନେ କ୍ରିଷ୍ଟାଲ ବାୟାତ୍ ଫାଉଣ୍ଡେଶନକୁ ଦାନ କରିଛନ୍ତି। ଆଫ୍ଗାନ ମହିଳାଙ୍କ ଅଧିକାର ପାଇଁ ଲଢ଼େଇ କରୁଥିବା ଏହି ସଙ୍ଗଠନର ଅନ୍ୟତମ ସଦସ୍ୟା ତଥା ଲାଇବ୍ରେରି ପ୍ରତିଷ୍ଠାତା ଝୁଲିଆ ପାର୍ସୀ କହିଛନ୍ତି, ଦୁଇଟି ଉଦ୍ଦେଶ୍ୟ ରଖି ଆମେ ପାଠାଗାର ଖୋଲିଛୁ। ପ୍ରଥତଃ ଯେଉଁ ଝିଅମାନେ ସ୍କୁଲ ଯାଇପାରୁନାହାନ୍ତି ସେମାନେ ଏଠାକୁ ଆସି ବିଭିନ୍ନ ବିଷୟରେ ଅଧ୍ୟୟନ କରିପାରିବେ। ଦ୍ୱିତୀୟତଃ ତାଲିବାନ୍ ସରକାରର ବର୍ବରତା ଭୟରେ ଚାକିରି ଛାଡ଼ି ଘରେ ବିରକ୍ତିବୋଧ ଅନୁଭବ କରୁଥିବା ମହିଳାମାନେ ମଧ୍ୟ ପଠନର ସୁଯୋଗ ପାଇପାରିବେ।
