ଲଣ୍ଡନ,୨୬ା୫: ଲକ୍ଡାଉନ ହଟାଯିବା ପରେ ମଧ୍ୟ ମଧୁମେହ ରୋଗୀଙ୍କୁ ଘର ଭିତରେ ରହିବାକୁ ପଡ଼ିପାରେ। କାରଣ କରୋନା ସଂକ୍ରମଣର ଅଧିକ ଆଶଙ୍କା ଥିବା ବର୍ଗରେ ସେମାନେ ରହିଛନ୍ତି। ଏପରି କି ସେମାନଙ୍କ ମୃତ୍ୟୁ ହେବାର ଆଶଙ୍କା ଅଧିକ ବୋଲି ଗବେଷକମାନେ କହିଛନ୍ତି।
ବ୍ରିଟେନର ନ୍ୟୁ ଆଣ୍ଡ ଏମାର୍ଜିଂ ରେସ୍ପିରେଟୋରି ଭାଇରସ୍ ଥ୍ରେଟ୍ସ ଆଡଭାଇଜରି ଗ୍ରୁପ୍ର ଚେୟାରମ୍ୟାନ ପ୍ରଫେସର ପିଟର ହୋର୍ବେ କହିଛନ୍ତି ଯେ, ମଧୁମେହ ରୋଗୀଙ୍କୁ ସବୁଠାରୁ ଅସୁରକ୍ଷିତ ଗୋଷ୍ଠୀ ଭାବେ ବିବେଚନା କରାଯାଉଛି। ସେମାନଙ୍କ ସ୍ବାସ୍ଥ୍ୟ ସମୀକ୍ଷା ସବୁବେଳେ କରାଯିବା ଉଚିତ। ଗତ ସପ୍ତାହରେ ବ୍ରିଟେନର ହସ୍ପିଟାଲଗୁଡ଼ିକରେ କରୋନାରେ ପ୍ରାଣ ହରାଇଥିବା ପ୍ରତି ତିନି ଜଣଙ୍କ ମଧ୍ୟରୁ ଜଣେ ମଧୁମେହରେ ଆକ୍ରାନ୍ତ ଥିଲେ। ଏହାକୁ ବିଶେଷଜ୍ଞମାନେ ଗମ୍ଭୀରତାର ସହ ଅନୁଧ୍ୟାନ କରୁଛନ୍ତି। ଏ ସମ୍ପର୍କରେ ଅକ୍ସଫୋର୍ଡ ବିଶ୍ୱବିଦ୍ୟାଳୟର ନୁଫିଲ୍ଡ ଡିପାର୍ଟମେଣ୍ଟ ଅଫ୍ ମେଡିସିନ ଅନ୍ତର୍ଗତ ଏମାର୍ଜିଂ ଇନ୍ଫେକ୍ସିଅସ୍ ଡିଜିଜ୍ ଆଣ୍ଡ ଗୋବାଲ୍ ହେଲ୍ଥର ପ୍ରଫେସରମାନେ ବର୍ତ୍ତମାନ ବିଭିନ୍ନ ଦେଶର ସରକାରୀ ପରାମର୍ଶଦାତାଙ୍କ ସହ ଆଲୋଚନା କରୁଛନ୍ତି ବୋଲି ଦୈନିକ ଟେଲିଗ୍ରାଫ୍ ରିପୋର୍ଟ କରିଛି।
ଲକ୍ଷଣ ଦୃଷ୍ଟିରୁ ମଧୁମେହ ରୋଗୀମାନେ ବର୍ତ୍ତମାନ ‘ଅତ୍ୟଧିକ ଅସୁରକ୍ଷିତ’ ପରିବର୍ତ୍ତେ ‘ଅସୁରକ୍ଷିତ’ ଶ୍ରେଣୀଭୁକ୍ତ ହୋଇଛନ୍ତି, ଯେଉଁମାନେ କି ସବୁଠାରୁ ଅଧିକ ପ୍ରଭାବିତ ଗୋଷ୍ଠୀ। ଏବେ ଯେକୌଣସି ପରିସ୍ଥିତିରେ ସେମାନେ ଘରେ ରହିବା ଉଚିତ ବୋଲି ସେମାନଙ୍କ ଡାକ୍ତରଙ୍କଠାରୁ ପରାମର୍ଶ ପାଉଛନ୍ତି। ମଧୁମେହ ରୋଗୀଙ୍କ ଉପରେ ମହାମାରୀ କରୋନାର ପ୍ରଭାବକୁ ନେଇ ଅଧିକ ଅନୁସନ୍ଧାନ ଆବଶ୍ୟକ କି ନାହିଁ ତାହା ବୈଜ୍ଞାନିକମାନେ ଆଲୋଚନା ଚଳାଇଛନ୍ତି। ସରକାରୀ ପରିସଂଖ୍ୟାନରୁ ଜଣାପଡ଼ିଛି ଯେ, କରୋନା ସଂକ୍ରମଣରେ ଟାଇପ୍-୧ ମଧୁମେହ ରୋଗୀଙ୍କ ମୃତ୍ୟୁ ଘଟିବା ଆଶଙ୍କା ଅନ୍ୟ ରୋଗୀଙ୍କ ତୁଳନାରେ ସାଢ଼େ ୩ ଗୁଣ ଅଧିକ। ସେହିପରି ଟାଇପ୍-୨ ମଧୁମେହ ରୋଗୀମାନେ ପ୍ରାୟତଃ ମୋଟା ଏବଂ ଅଧିକ ଓଜନିଆ। କରୋନାରେ ଏହି ବର୍ଗର ରୋଗୀଙ୍କ ମୃତ୍ୟୁ ଆଶଙ୍କା ୨ଗୁଣ ବୋଲି ଜଣାପଡ଼ିଛି।
‘ଡାଇବେଟିସ୍ ୟୁକେ’ର ନୀତି ନିର୍ଦ୍ଦେଶକ ବ୍ରିଜେଟ୍ ଟର୍ନର କହିଛନ୍ତି, ସମସ୍ତ ମଧୁମେହ ରୋଗୀଙ୍କୁ ଗୋଟିଏ ଉପାୟରେ ଚିକିତ୍ସା କରାଯାଇପାରିବ ନାହିଁ। କାରଣ ଅନେକ ପ୍ରକାରର ମଧୁମେହ ରୋଗ ଅଛି। ଏପରି ପରିସ୍ଥିତିରେ ସମସ୍ତଙ୍କ ପାଇଁ ସମାନ ନିୟମ ପ୍ରୟୋଗ କରିବା ଠିକ୍ ନୁହେଁ।
ସବୁଠାରୁ ଅଧିକ ପ୍ରଭାବିତ କରୋନା ରୋଗୀଙ୍କ ମଧ୍ୟରେ ମେଦବହୁଳତା ଏକ ଗୁରୁତ୍ୱପୂର୍ଣ୍ଣ କାରଣ ବୋଲି ଜଣାପଡିଛି। ସାଧାରଣତଃ ମେଦବହୁଳ ବ୍ୟକ୍ତିମାନେ ଟାଇପ୍-୨ ମଧୁମେହର ଶିକାର ହୋଇଥାନ୍ତି। ଚଳିତ ମାସ ପ୍ରାରମ୍ଭରେ ପ୍ରାୟ ୫ ଲକ୍ଷ ବ୍ରିଟେନବାସୀଙ୍କୁ ନେଇ ହୋଇଥିବା ଏକ ଅଧ୍ୟୟନରୁ ଜଣାପଡିଛି ଯେ, କରୋନା ସଂକ୍ରମଣ ଯୋଗୁ ମୋଟା ଲୋକ ଡାକ୍ତରଖାନାରେ ଭର୍ତ୍ତି ହେବାର ସମ୍ଭାବନା ଦୁଇଗୁଣ ଅଧିକ। ଏକ ଆକଳନ ଅନୁଯାୟୀ ବ୍ରିଟେନରେ ପ୍ରାୟ ୪୦ ଲକ୍ଷ ମଧୁମେହ ରୋଗୀ ଅଛନ୍ତି।
