ଲଖନପୁର,୨୪।୫(ଡି.ଏନ୍.ଏ) ମହାମାରୀ କରୋନାକୁ ନେଇ ସାରାଦେଶରେ ୪ର୍ଥ ପର୍ଯ୍ୟାୟ ଲକ୍ଡାଉନ ଜାରି ରହିଛି। ଏହାର ପ୍ରଭାବ କଳକାରଖାନା ଉପରେ ପଡିଛି । ଏଥିରେ କାର୍ଯ୍ୟ କରୁଥିବା ଶ୍ରମିକମାନେ ଯେମିତି ପ୍ରଭାବିତ ନ ହେବେ ଏଥିପାଇଁ ସରକାର କେତେକ ନିର୍ଦ୍ଦେଶନାମା ଜାରି କରିଛନ୍ତି । ତେବେ ଓପିଜିସିରେ କାର୍ଯ୍ୟରତ ଠିକା ଶ୍ରମିକଙ୍କ କ୍ଷେତ୍ରରେ ଏହାର ବ୍ୟତିକ୍ରମ ଦେଖାଦେଇଛି ।
ଖାଇବାକୁ ନ ମିଳିବାରୁ ୬ଜଣ ଠିକା ଶ୍ରମିକ ଶନିବାର ଓପିଜିସିରୁ ବାହାରି ନିଜ ଘର ଉତ୍ତରପ୍ରଦେଶ ଯିବା ପାଇଁ ୧୦ କିଲୋମିଟର ଚାଲି ଚାଲି ଲଖନପୁର ନିକଟ ବେହେରାଗୁଡାରେ ପହଞ୍ଚିଥିଲେ। ଏ ସମ୍ପର୍କରେ ଖବର ପାଇ କେତେକ ଗଣମାଧ୍ୟମ ପ୍ରତିନିଧି ସେଠାରେ ପହଞ୍ଚି ଶ୍ରମିକମାନଙ୍କୁ ପଚରାଉଚରା କରିଥିଲେ। ପରେ ଏ ନେଇ ସେମାନେ ଜିଲା ପ୍ରଶାସନ ଓ ଜିଲା ଶ୍ରମ ବିଭାଗର ଦୃଷ୍ଟି ଆକର୍ଷଣ କରିଥିଲେ। ଏହା ଜାଣିବା ପରେ ଜିଲା ଶ୍ରମ ଅଧିକାରୀ କୃଷ୍ଣମୋହନ ରାଉତ ଓପିଜିସି କର୍ତ୍ତୃପକ୍ଷଙ୍କ ସହିତ ଆଲୋଚନା କରିଥିଲେ । ଓପିଜିସିର ବରିଷ୍ଠ ଅଧିକାରୀ ପି.କେ ପାତ୍ରଙ୍କ ନିର୍ଦ୍ଦେଶକ୍ରମେ ବିଜିଆର ଠିକାସଂସ୍ଥାର ଏକ ଗାଡି ଯାଇ ଶ୍ରମିକମାନଙ୍କୁ ଅଧା ରାସ୍ତାରୁ ଫେରାଇ ଆଣିଛି। ଶ୍ରମିକମାନେ ଏବେ ପମ୍ପହାଉସ ଲେବର କ୍ୟାମ୍ପରେ ହିଛନ୍ତି। ସେମାନେ ନିଜ ଘର ଉତରପ୍ରଦେଶ ଯିବା ପାଇଁ ସୁବିଧା ସୁଯୋଗ ଯୋଗାଇ ଦିଆଯିବ ବୋଲି ଜିଲା ଶ୍ରମ ଅଧିକାରୀ ରାଉତ କହିଛନ୍ତି ।
ଉଲ୍ଲେଖଯୋଗ୍ୟ, ଓପିଜିସିରେ କାର୍ଯ୍ୟରତ ବିଜିଆର୍ ଏନର୍ଜି ନାମକ ଠିକାସଂସ୍ଥା ଅଧୀନରେ ରହିଥିବା ସବକଣ୍ଟ୍ରାକ୍ଟର ଏଭି କନ୍ଷ୍ଟକଶନରେ ଏହି ଶ୍ରମିକମାନେ କାର୍ଯ୍ୟ କରୁଥିଲେ। ଲକ୍ଡାଉନରେ ଶ୍ରମିକମାନେ ବସିରହିବା ଫଳରେ ସବ୍କଣ୍ଟ୍ରାକ୍ଟର ସେମାନଙ୍କୁ ଖାଇବାକୁ ଦେଇ ନ ଥିଲେ। ଭୋକ ଉପବାସରେ ୧୫ଦିନ ରହିବା ପରେ ସେମାନେ ନିଜ ଘରକୁ ଯିବା ପାଇଁ ଚାହିଁଥିଲେ । ଏ ନେଇ ଲଖନପୁର ବ୍ଲକ, ତହସିଲ, ପଞ୍ଚାୟତ କାର୍ଯ୍ୟାଳୟ ଓ ଥାନାକୁ ଯାଇ ନିରାଶ ହେବା ପରେ ଚାଲି ଚାଲି ଯିବା ପାଇଁ ସ୍ଥିର କରିଥିଲେ । ଏ ସମ୍ପର୍କରେ ଠିକାସଂସ୍ଥା ଜାଣିଥିଲେ ମଧ୍ୟ ଶ୍ରମିକମାନଙ୍କୁ ଯିବା ପାଇଁ ବାରଣ କରି ନ ଥିଲେ । ଫଳରେ ଶ୍ରମିକମାନେ ଘର ଅଭିମୁଖେ ଚାଲି ଚାଲି ବାହାରିଥିବୋଲି ସେମାନେ ଅଭିଯୋଗ କରିଛନ୍ତି ।
