ରୋମ,୪।୫: ଲକ୍ଡାଉନରେ କୋହଳ ପରେ ବିଶ୍ୱର ଅଧିକ ଜନସଂଖ୍ୟା ବିଶିଷ୍ଟ ଦେଶରେ ଲୋକେ ଲକ୍ଷ ଲକ୍ଷ ସଂଖ୍ୟାରେ ବାହାରକୁ ବାହାରିବାର ଫଳ ଏବେ ସମସ୍ତଙ୍କୁ ଏକ ପ୍ରକାର ଚିନ୍ତାରେ ପକାଇ ଦେଇଛି। କାରଣ ବିଶେଷଜ୍ଞଙ୍କ କହିବା କଥା ହେଲା ଲକ୍ଡାଉନ କୋହଳ ହେବା ପରେ ଲୋକେ ବାହାରକୁ ଆସିଲେ। ଆଉ ରବିବାର ଭାରତ ଭଳି କିଛି ଜନସଂଖ୍ୟା ବହୁଳ ଦେଶରେ ସବୁଠାରୁ ଅଧିକ କରୋନା ସଂକ୍ରମିତଙ୍କୁ ଚିହ୍ନଟ କରାଗଲା। ଚାଇନା ପରେ ଏବେ ଭାରତରେ ଲକ୍ଡାଉନ କୋହଳ ପରେ ଗୋଟିଏ ଦିନରେ ପାଖାପାଖି ୨୬ଶହ ନୂଆ ରୋଗୀ ଚିହ୍ନଟ ହେବା ଚିନ୍ତା ଜନକ ବିଷୟ ପାଲଟି ଯାଇଛି। ସେହିପରି ବ୍ରିଟେନରେ କୋଭିଡ-୧୯ର ମୃତ୍ୟୁ ସଂଖ୍ୟା ଏବେ ଇଟାଲିର ମୃତ୍ୟୁ ସଂଖ୍ୟାକୁ ଛୁଇଁବାକୁ ଯାଉଛି ବୋଲି କୁହାଯାଉଛି। ସେହିପରି ରୁଷରେ ଗୋଟିଏ ଦିନରେ ୧୦ ହଜାର କରୋନା ସଂକ୍ରମିତ ଚିହ୍ନଟ ହେବା ଆଉ ଏକ ଚିନ୍ତା ଜନକ ବିଷୟ। ଆମେରିକାରେ ଏବେବି ଦିନକୁ ହଜାର ହଜାର ଲୋକ କରୋନା ଭାଇରସ ଦ୍ୱାରା ସଂକ୍ରମିତ ହେଉଥିବା ଖବର ଆସୁଛି। ଇଟାଲୀରେ ଲକ୍ଡାଉନ କୋହଳ କରାଯିବାର ୨୪ ଘଣ୍ଟା ମଧ୍ୟରେ ୧୭୪ ଜଣଙ୍କ ମୃତ୍ୟୁ ଖବର ସମସ୍ତଙ୍କୁ ଆଶ୍ଚର୍ଯ୍ୟ କରିଛି। ତେଣୁ ବିଶେଷଜ୍ଞମାନେ କହିଛନ୍ତି ଲକ୍ଡାଉନରେ କୋହଳ ପରେ କରୋନା ସଂକ୍ରମଣରେ ଦ୍ରୁତ ବୃଦ୍ଧି ଘଟୁଛି।
