ମୁମ୍ବାଇ, ୯।୩- ରୋଡ୍ ସେଫ୍ଟି ଓ୍ବାଲର୍ଡ ସିରିଜ ଟି୨୦ର ରବିବାର ଅନୁଷ୍ଠିତ ରୋମାଞ୍ଚକ ଦ୍ୱିତୀୟ ମ୍ୟାଚରେ ଶ୍ରୀଲଙ୍କା ଲିଜେଣ୍ଡ୍ସ ୭ ରନରେ ଅଷ୍ଟ୍ରେଲିଆ ଲିଜେଣ୍ଡ୍ସକୁ ପରାସ୍ତ କରିଛି। ପ୍ରଥମେ ବ୍ୟାଟିଂ କରିଥିବା ଶ୍ରୀଲଙ୍କା ଲିଜେଣ୍ଡ୍ସ ୨୦ ଓଭରରେ ୮ ଉଇକେଟ ହରାଇ ୧୬୧ ରନ କରିଥିଲା। ରମେଶ କାଳୁଓ୍ବିଥରାଣା ସର୍ବାଧିକ ୩୦, ଚାମରା କପୁଗେଡେରା ୨୮ ଓ ପରଭେଜ ମାହାରୁଫ ୨୦* ରନ କରିଥିଲେ। ପ୍ରତିପକ୍ଷ ଦଳର ଜାଭିଅନ ଡୋହର୍ଟି, ଜାସନ କ୍ରେଜା ଓ ବ୍ରାଡ୍ ହଜ୍ ୨ଟି ଲେଖାଏ ଏବଂ କ୍ଲିଣ୍ଟ ମ୍ୟାକକୟ ଓ ମାର୍କ କସଗ୍ରୋଭ ଗୋଟିଏ ଲେଖାଏ ଉଇକେଟ ନେଇଥିଲେ। ୧୬୨ ରନ ବିଜୟ ଲକ୍ଷ୍ୟର ପିଛା କରି ଅଷ୍ଟ୍ରେଲିଆ ଲିଜେଣ୍ଡ୍ସ ୧୯.୫ ଓଭରରେ ୧୫୪ ରନକରି ଅଲଆଉଟ ହୋଇ ଯାଇଥିଲା। ନାଥାନ ରିର୍ଡନ ୫୩ ବଲ୍ରୁ ୯ ଚୌକା ଓ ୫ ଛକା ସହାୟତାରେ ୯୬ ରନ ସ୍କୋର କରିଥିଲେ ହେଁ ଦଳକୁ ଜିତାଇପାରି ନ ଥିଲେ। ୭ ଜଣ ବ୍ୟାଟ୍ସମ୍ୟାନ ଦୁଇଅଙ୍କ ସ୍ପର୍ଶ କରିପାରି ନ ଥିଲେ। ଶ୍ରୀଲଙ୍କା ଲିଜେଣ୍ଡ୍ସ ବୋଲରଙ୍କ ମଧ୍ୟରେ ଅଧିନାୟକ ତିଳକରନେତ୍ ଦିଲସାନ ୩ଟି, ରଙ୍ଗନା ହେରାଥ ଓ ପରଭେଜ ମାହାରୁଫ ୨ଟି ଲେଖାଏ ଏବଂ ଚାମିଣ୍ଡା ଭାସ ଓ ସଚିତ୍ର ସେନାନାୟକେ ଗୋଟିଏ ଲେଖାଏ ଉଇକେଟ ନେଇଥିଲେ।
