ବଲାଙ୍ଗୀର ଅଫିସ, ୧୫ା୫- ତାମିଲନାଡୁ ଓ ଆନ୍ଧ୍ରପ୍ରଦେଶରୁ ଆସିଥିବା ଦୁଇଟି ଶ୍ରମିକ ସ୍ପେଶାଲ ଟ୍ରେନ୍ ଗୁରୁବାର ବଲାଙ୍ଗୀର ରେଳଷ୍ଟେଶନ୍ରେ ପହଞ୍ଚଥିଲା। ସେଠାରୁ ବସ୍ ଯୋଗେ ବଲାଙ୍ଗୀର ଓ ଅନ୍ୟ ଜିଲା ଗୁଡିକୁ ପ୍ରବାସୀଙ୍କୁ ନିଅଯିବା ବ୍ୟବସ୍ଥା କରାଯାଇଥିଲା। ପ୍ରବାସୀଙ୍କୁ ନେଇକରି ଯିବାକୁ ଥିବା ବସ୍ ଓ ଯାନବାହନର ସୁଗମ ଯାତ୍ରା ପାଇଁ ବଲାଙ୍ଗୀର ସହରର ବିଭିନ୍ନ ରାସ୍ତା ଓ ଅଞ୍ଚଳରେ କର୍ଫ୍ୟୁ ଲଗାଯାଇଥିଲା। ସନ୍ଧ୍ୟାରେ ଗୁଣ୍ଟୁରରୁ ଆସିଥିବା ପ୍ରବାସୀଙ୍କୁ ନେଇ ଯାଉଥିବା ଏକ ବସ୍ କର୍ଫ୍ୟୁ ଲଗାଯାଇଥିବା ରାସ୍ତାରେ ନ ଯାଇ ରେଲୱେ ଷ୍ଟେଶନ୍ରୁ ଟିକ୍ରାପଡା ରାସ୍ତାରେ ବିକ୍ରମ ଛକ ଓ ସେଠାରୁ ଡେଲିମାର୍କେଟ ପଟକୁ ଯାଇଥିବା ଲୋକେ ଅଭିଯୋଗ କରିଛନ୍ତି। ଏହି କାରଣରୁ ସେଠାରେ ଭୟ ଓ ଆତଙ୍କ ବାତାବରଣ ସୃଷ୍ଟି ହୋଇଥିବା ଜଣାଇଛନ୍ତି ା ଏହି ବସ୍କୁ ଏକ ପୋଲିସ ଗାଡି ଏସକର୍ଟ କରୁଥିଲା ଓ ସାଇରନ୍ ବଜାଯାଇଥିବା ଲୋକେ କହିଛନ୍ତି। ଲୋକଙ୍କ କହିବା ମୁତାବକ ଏହି ରାସ୍ତାରେ କର୍ଫ୍ୟୁ ଲଗାଯାଇ ନ ଥିବାରୁ ସନ୍ଧ୍ୟାବେଳେ ଲୋକମାନେ ଚଲାବୁଲା କରୁଥିଲେ। ତେବେ ହଠାତ୍ ପୋଲିସ ଗାଡି ସାଇରନ୍ ବଜାଇ ପ୍ରବାସୀଙ୍କ ବସ୍କୁ ନେଉଥିବା ଦେଖି ଲୋକେ ଇତସ୍ତତଃ ଦୌଡା ଦୌଡି କରିଥିଲେ। ଏହି ବସ୍ ଯିବା ପରେ ଟିକ୍ରପଡା ଅଞ୍ଚଳ ଶୁନ୍ଶାନ୍ ହୋଇଯାଇଛି। ଲୋକଙ୍କୁ ଆଗୁଆ ସୂଚନା ନଦେଇ ଏହି ରାସ୍ତାରେ ପ୍ରବାସୀଙ୍କ ବସ୍ ନିଆଯାଇଥିବାରୁ ଲୋକେ ଅସନ୍ତୋଷ ବ୍ୟକ୍ତ କରିଛନ୍ତି। ଏନେଇ ଟାଉନ୍ ଥାନା ଅଧିକାରୀ ସଂଗ୍ରାମ କେଶରୀ ପଟ୍ଟନାୟକଙ୍କୁ ପଚରାଯିବାରୁ ଏନେଇ ସେ ପଚରାଉଚରା କରିବେ ବୋଲି କହିଛନ୍ତି।
