ସୋନପୁର,୧୩।୧୧(ନି.ପ୍ର.)-କାର୍ତ୍ତିକ ପୂର୍ଣ୍ଣିମା ଉପଲକ୍ଷେ ସୋନପୁର ସହର ନିକଟସ୍ଥ ମହାନଦୀର ଲଙ୍କେଶ୍ୱରୀ ଗଣ୍ଡ ନିକଟରେ ରାଜ୍ୟସ୍ତରୀୟ ନୌକାଚାଳନା ପ୍ରତିଯୋଗିତା ଅନୁଷ୍ଠିତ ହୋଇଯାଇଛି। ଏଥିରେ ମୋଟ ୪୮ଟି ଦଳ ଭାଗ ନେଇଥିଲେ। ଗୋଟିଏ ଡଙ୍ଗାରେ ଦୁଇଜଣ ଲେଖାଏ ପ୍ରତିଯୋଗୀ ରହିଥିଲେ। ଭାଗବତ ପାଠାଗାର ତେନ୍ତୁଳିଘାଟ ପକ୍ଷରୁ ମଙ୍ଗଳବାର ଅପରାହ୍ନ ଅଢେଇଟାରୁ ସାଢେ ୪ଟା ପର୍ଯ୍ୟନ୍ତ ଆୟୋଜିତ ଏହି ପ୍ରତିଯୋଗିତା ବେଶ ଚିତ୍ତାକର୍ଷକ ହୋଇଥିଲା । ଏଥିରେ ସୋନପୁର ତେନ୍ତୁଳିଘାଟର ଅଭି ବେହେରା ଓ କିଶୋର ନାଏକ ପ୍ରଥମ, ସମ୍ବଲପୁର ସହର ଦଳେଇପଡାର ବିଶ୍ୱନାଥ ଦଣ୍ଡସେନା ଓ ବିକାଶ ସାହୁ ଦ୍ୱିତୀୟ ଏବଂ ବରଗଡ ଜିଲା ଗଣ୍ଡତୁରୁମର ସଦାନନ୍ଦ ପାଣ୍ଡେ ଓ ମହେନ୍ଦ୍ର ବାଗ ତୃତୀୟ ସ୍ଥାନ ଅଧିକାର କରିଥିଲେ। ପରେ ପୁରସ୍କାର ବିତରଣ ଉତ୍ସବ ଆୟୋଜିତ ହୋଇ କୃତି ପ୍ରତିଯୋଗୀଙ୍କୁ ପୁରସ୍କୃତ କରାଯାଇଥିଲା । ଏହି ଉତ୍ସବରେ ଅତିରିକ୍ତ ଜିଲାପାଳ ଶରତ ଚନ୍ଦ୍ର ପଣ୍ଡା ମୁଖ୍ୟ ଅତିଥି ଭାବେ ଯୋଗଦେଇ ଓଡିଶାର ନୌବାଣିଜ୍ୟ ପରମ୍ପରାକୁ ଉଜ୍ଜୀବିତ କରି ରଖିବା ତଥା ଦୀର୍ଘ ୫୬ବର୍ଷ ଧରି ମହାନଦୀରେ ପାରମ୍ପରିକ ନୌକାଚାଳନା ପ୍ରତିଯୋଗିତା ଆୟୋଜନ କରି ଆସୁଥିବାରୁ ଆୟୋଜକଙ୍କୁ ପ୍ରଶଂସା କରିଥିଲେ। ସମ୍ମାନିତ ଅତିଥିଭାବେ ଓଡିଶା ଗାନ୍ଧୀବାଦୀ ଫୋରମର ଡ. ରୀନା ରାଉତରାୟ, ବରିଷ୍ଠ ଆଇନଜୀବୀ ବିଥିକା ମହାନ୍ତି, ଅଭିମନ୍ୟୁ କୁଶଳ, କଇରୁ ସ୍ବାଇଁ, ପ୍ରକାଶ ସାହୁ, ଶ୍ରୀବତ୍ସ ମଲ୍ଳିକ, ଓଡିଶା ଅଣଗେଜେଟେଡ କର୍ମଚାରୀ ସଂଘର ରାଜ୍ୟ ସଭାପତି ଜ୍ୟୋତିରଞ୍ଜନ ପଟ୍ଟନାୟକ, ପୁରୁଷୋତ୍ତମ ପାଣିଗ୍ରାହୀ ଓ ଚକ୍ରାୟୁଧ ନାଏକ ଅତିଥିଭାବେ ଯୋଗ ଦେଇଥିଲେ । ପ୍ରଥମ, ଦ୍ୱିତୀୟ ଓ ତୃତୀୟ ପୁରସ୍କାର ଭାବରେ ଯଥାକ୍ରମେ ୫ ହଜାର, ୨ ହଜାର ଓ ଦେଢ ହଜାର ଟଙ୍କା ପ୍ରଦାନ କରା ଯାଇଥିଲା। ଓଡିଶାର ସମ୍ବଲପୁର, ବରଗଡ, ବୌଦ୍ଧ, ବଲାଙ୍ଗୀର ଓ ଅନୁଗୋଳ ଜିଲାର ପ୍ରତିଯୋଗୀମାନେ ଏହି ପ୍ରତିଯୋଗିତାରେ ଅଂଶଗ୍ରହଣ କରିଥିଲେ ।
