ପୁରୀ ଅଫିସ,୬ା୫: ଚଳିତ ବର୍ଷ ବଡ଼ଦାଣ୍ଡରେ ମହାପ୍ରଭୁଙ୍କ ତିନିରଥ ଗଡ଼ିବା ନେଇ ସଂଶୟ ଦେଖାଦେଇଛି। ମଙ୍ଗଳବାର ଦିନତମାମ୍ର ଘଟଣା ଚିତ୍ର ସମସ୍ତଙ୍କ ମନରେ ଏଭଳି ଭାବିବାକୁ ସୁଯୋଗ ସୃଷ୍ଟି କରିଛି। ସୋମବାର ସନ୍ଧ୍ୟାରେ ଶ୍ରୀମନ୍ଦିର ପ୍ରଶାସନ ସହ ଆଲୋଚନା ପରେ ମଙ୍ଗଳବାର ସକାଳୁ ମହାରଣା ସେବକମାନେ ରଥଖଳାରେ ପହଞ୍ଚତ୍ଥିଲେ। ରଥ ନିର୍ମାଣ ଲାଗି ଆବଶ୍ୟକ ସରଞ୍ଜାମ ସହ ସେମାନେ ପ୍ରସ୍ତୁତ ମଧ୍ୟ ରହିଥିଲେ। କେବଳ ଶ୍ରୀମନ୍ଦିର ପ୍ରଶାସନ ନିର୍ଦ୍ଦେଶକୁ ଅପେକ୍ଷା କରିଥିଲେ। ସନ୍ଧ୍ୟା ହେଲା ସିନା ହେଲେ ରଥ ନିର୍ମାଣ ନେଇ କୌଣସି ନିର୍ଦ୍ଦେଶ ଆସିଲାନି। ଶେଷରେ ରଥଖଳାରୁ ଫେରିଗଲେ ମହାରଣା ସେବକ ଓ ଭୋଇ ସେବକ। ଶ୍ରୀମନ୍ଦିରର ପ୍ରଶାସନର ଏଭଳି ବିଳମ୍ବିତ ନିଷ୍ପତ୍ତି ରଥଯାତ୍ରା ବନ୍ଦ ସମ୍ଭାବନାକୁ ବଢ଼ାଇ ଦେଇଛି ବୋଲି ଭକ୍ତଙ୍କ ମହଲରେ ଚର୍ଚ୍ଚା ହେଉଛି।
ରଥ ନିର୍ମାଣ ସଂକ୍ରାନ୍ତରେ ଆଲୋଚନା ଲାଗି ସୋମବାର ଶ୍ରୀମନ୍ଦିର ପରିଚାଳନା କମିଟି ବୈଠକ ବସିଥିଲା। ଏଥିରେ କେନ୍ଦ୍ର ଏବଂ ରାଜ୍ୟ ସରକାରଙ୍କ ଗାଇଡ୍ଲାଇନ୍କୁ ପୁଙ୍ଖାନୁପୁଙ୍ଖ ତର୍ଜମା କରାଯାଇଥିଲା। ଶେଷରେ ରଥ ନିର୍ମାଣ ଆରମ୍ଭ କରିବା ନେଇ ସମସ୍ତେ ସହମତି ହେବା ପରେ ରାଜ୍ୟ ସରକାରଙ୍କୁ ସୁପାରିସ କରିଥିଲେ। ଅନ୍ୟପକ୍ଷରେ ସୋମବାର ସନ୍ଧ୍ୟାରେ ଶ୍ରୀମନ୍ଦିର ପ୍ରଶାସନ ତିନି ରଥର ମୁଖ୍ୟ ମହାରଣା ବିଜୟ କୁମାର ମହାପାତ୍ର, କୃଷ୍ଣଚନ୍ଦ୍ର ମହାରଣା, ନରସିଂହ ମହାପାତ୍ର ଏବଂ ଭୋଇ ସର୍ଦ୍ଦାର ରବି ଭୋଇଙ୍କୁ ଡାକି ଆଲୋଚନା କରିଥିଲା। ରଥ ନିର୍ମାଣ ପାଇଁ ପ୍ରସ୍ତୁତ ରହିବାକୁ ପରାମର୍ଶ ଦିଆଯାଇଥିଲା। ସରକାରଙ୍କଠାରୁ ଅନୁମତି ମିଳିବା ମାତ୍ରେ କାମ ଆରମ୍ଭ ହେବ ବୋଲି ସେମାନଙ୍କୁ କୁହାଯାଇଥିଲା। ତେଣୁ ମଙ୍ଗଳବାର ସକାଳୁ ମୁହଁରେ ମାସ୍କ ବାନ୍ଧି ଆବଶ୍ୟକ ସରଞ୍ଜାମ ସହ ରଥଖଳାରେ ପହଞ୍ଚତ୍ଥିଲେ ମହାରଣା ସେବକ। ରଥଖଳାରେ ଅପେକ୍ଷା କରିଥିଲେ ପ୍ରଶାସନର ନିର୍ଦ୍ଦେଶକୁ। ମଝିରେ ମଝିରେ ମୁଖ୍ୟ ମହାରଣାମାନେ ମନ୍ଦିର ପ୍ରଶାସନ କାର୍ଯ୍ୟାଳୟକୁ ଯାଉଥିଲେ। କିନ୍ତୁ କୌଣସି ନିର୍ଦ୍ଦେଶ ଆସିଲା ନାହିଁ। ଶେଷରେ ସନ୍ଧ୍ୟାରେ ମୁଖ୍ୟ ମହାରଣା ଶ୍ରୀମନ୍ଦିର କାର୍ଯ୍ୟାଳୟକୁ ଯାଇ ନୀତି ପ୍ରଶାସକଙ୍କୁ ସାକ୍ଷାତ କରିଥିଲେ। ମାତ୍ର କୌଣସି ଅନୁମତି ଆସି ନ ଥିବା ଶୁଣି ମହାରଣା ସେବକମାନେ ନିଜ ନିଜ ଘରକୁ ଫେରିଯାଇଥିଲେ।
ଏ ସମ୍ପର୍କରେ ନନ୍ଦିଘୋଷ ରଥର ମୁଖ୍ୟ ମହାରଣା ବିଜୟ କୁମାର ମହାପାତ୍ର କହିଛନ୍ତି, ଶ୍ରୀମନ୍ଦିର ପ୍ରଶାସନ ସହ ଆଲୋଚନା ପରେ ରଥ ନିର୍ମାଣ କରିବା ପାଇଁ ଆସିଥିଲୁ। ରାଜ୍ୟ ସରକାରଙ୍କଠାରୁ ଅନୁମତି ମିଳିବା ପରେ ମନ୍ଦିର ପ୍ରଶାସନ ନିର୍ଦ୍ଦେଶ ପାଇ କାମ ଆରମ୍ଭ କରିଥାନ୍ତୁ। ରଥଖଳାରେ ସକାଳୁ ସନ୍ଧ୍ୟା ପର୍ଯ୍ୟନ୍ତ ସମସ୍ତ ମହାରଣା ସେବକ ଅପେକ୍ଷା କରି ରହିଲେ। ହେଲେ କୌଣସି ନିର୍ଦ୍ଦେଶ ଆସିଲା ନାହିଁ ବୋଲି ମହାପାତ୍ର କହିଛନ୍ତି। ବୁଧବାର ରଥ ଖଳାକୁ ଆସିବେ କି ପ୍ରଶ୍ନରେ ସେ କହିଥିଲେ, ମଙ୍ଗଳବାର ଦିନତମାମ୍ ବସି ବସି ଫେରିଲୁ, ପୁଣି ଯିବୁ କେମିତି ବୋଲି ପାଲଟା ପ୍ରଶ୍ନ କରିଥିଲେ? ଅନ୍ୟପକ୍ଷରେ ଶ୍ରୀମନ୍ଦିର ନୀତି ପ୍ରଶାସକ ଜିତେନ୍ଦ୍ର କୁମାର ସାହୁଙ୍କୁ ପଚାରିବାରୁ ସରକାରଙ୍କ ଅନୁମତିକୁ ଅପେକ୍ଷା କରାଯାଇଛି। ଅନୁମତି ମିଳିଲେ ରଥ ନିର୍ମାଣ କାର୍ଯ୍ୟ ଆରମ୍ଭ ହେବ ବୋଲି କହିଛନ୍ତି। ଜୁନ୍ ୨୩ରେ ରଥଯାତ୍ରା । ଏଥିଲାଗି ଗତମାସ ୨୬ ତାରିଖ ଅକ୍ଷୟ ତୃତୀୟାରେ ଶ୍ରୀମନ୍ଦିର ପରିସରରେ ରଥ ନିର୍ମାଣ ଅନୁକୂଳ ହୋଇଥିଲା। ହେଲେ ଲକ୍ଡାଉନ କଟକଣା ଯୋଗୁ ନିର୍ମାଣ କାର୍ଯ୍ୟ ବନ୍ଦ ରହିଛି। ଇତିମଧ୍ୟରେ ୯ଦିନ ଗଡ଼ିଗଲାଣି। ଆଉ ମାତ୍ର ୪୪ଦିନ ଥିବାବେଳେ ଏ ପର୍ଯ୍ୟନ୍ତ ରଥ ନିର୍ମାଣ ଆରମ୍ଭ ହେଲା ନାହିଁ । ତେଣୁ ଏ ବର୍ଷ ମହାପ୍ରଭୁଙ୍କ ରଥଯାତ୍ରା ବନ୍ଦ ହେବା ନେଇ ସମ୍ଭାବନା ବଢ଼ୁଛି ବୋଲି ବୁଦ୍ଧିଜୀବୀ ମହଲରେ ଚର୍ଚ୍ଚା ହେଉଛି।
