ଚମ୍ପୁଆ, ୫ା୬(ଡି.ଏନ.ଏ.)-ଜରୁରିକାଳୀନ ଚିକିତ୍ସାରେ ପ୍ରମୁଖ ଭୂମିକା ଗ୍ରହଣ କରିଥିବା ଚମ୍ପୁଆ ଉପଖଣ୍ଡ ଚିକିତ୍ସାଳୟର ରେଡକ୍ରସ ରକ୍ତ ଭଣ୍ଡାରର ସମସ୍ୟା ବଢିବାରେ ଲାଗିଛି। ଅନେକ ସମୟରେ ଏହି ରକ୍ତଭଣ୍ଡାରରେ ରକ୍ତର ଅଭାବ ପରିଲକ୍ଷିତ ହେଉଛି। ଚମ୍ପୁଆ ଉପଖଣ୍ଡରେ ରକ୍ତଜନିତ ସମସ୍ୟାର ଦୂରୀକରଣ ପାଇଁ ୨୦୦୩ ମସିହାରେ ତତ୍କାଳୀନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦ୍ୱାରା ଏକ ରକ୍ତ ଭଣ୍ଡାର ଉଦ୍ଘାଟନ କରାଯାଇଥିଲା। ଏହି ଚିକିତ୍ସାଳୟ ଉପରେ ନିର୍ଭର କରୁଥିବା ଝାଡ଼ଖଣ୍ଡ, ମୟୂରଭଞ୍ଜ, ସୁନ୍ଦରଗଡ଼ ସହିତ ଚମ୍ପୁଆ, ଯୋଡ଼ା, ବଡ଼ବିଲ ଓ ଝୁମ୍ପୁରା ଅଞ୍ଚଳରୁ ରୋଗୀମାନଙ୍କୁ ଏହି ରକ୍ତ ଭଣ୍ଡାର ମାଧ୍ୟମରେ ରକ୍ତ ପ୍ରଦାନ କରାଯାଉଥିଲା। ମାତ୍ର ବର୍ତ୍ତମାନ ଏହି ରକ୍ତଭଣ୍ଡାରରେ ଅନେକ ସମୟରେ ବିଭିନ୍ନ ଗ୍ରୁପର ରକ୍ତର ଅଭାବ ରହୁଥିବା ଦାୟିତ୍ୱରେ ଥିବା ଡାକ୍ତର ଜ୍ୟୋତିରଞ୍ଜନ ମଲ୍ଲିକ ସୂଚନା ଦେଇଛନ୍ତି। ସୂଚନା ଅନୁସାରେ ରକ୍ତ ଭଣ୍ଡାର ପାଇଁ ପ୍ରତ୍ୟେକ ମାସ ୧୦୦ରୁ ୧୫୦ ରକ୍ତର ଆବଶ୍ୟକ ରହୁଥିବା ବେଳେ ମାତ୍ର ୫୦ରୁ ୬୦ ରକ୍ତ ସଂଗ୍ରହ କରାଯାଇପାରୁଛି। ଏ,ବି, ଓ+ ଗ୍ରୁପର ରକ୍ତର ଆବଶ୍ୟକତା ଅଧିକ ରହୁଥିବା ବେଳେ ଅନେକ ସମୟରେ ଗୋଟିଏ ଦୁଇଟି ରକ୍ତ ରହୁଛି। ଫଳରେ ରୋଗୀଙ୍କ ଆବଶ୍ୟକତା ପୂରଣ କରାଯାଇ ପାରୁନାହିଁ। ବିଭିନ୍ନ ସଙ୍ଗଠନ ଯଥା, ଚନ୍ଦ୍ରଶେଖର କଲେଜ, କଳିଙ୍ଗ ରି କ୍ରିଏସନ କ୍ଲବ, ସୋସିଆକ୍କ୍ବ କରଞ୍ଜିଆ, ଆକ୍ସିସ ବ୍ୟାଙ୍କ ଯୋଡା, ସମ୍ବାଦ ଆମ ଓଡ଼ିଶା, ବଡବିଲ ଶିଶୁ ମନ୍ଦିର, ଏଚ.ଡି.ଏଫ. ସି. ବ୍ୟାଙ୍କ ଯୋଡା, ଏଲଆଣ୍ଡଟି କନଷ୍ଟ୍ରକସନ୍, ବିଜୁ ଯୁବ ବାହିନୀ ଆଦି ସଙ୍ଗଠନ ପକ୍ଷରୁ ଅନେକ ସମୟରେ କ୍ୟାମ୍ପ କରାଯାଇ ରକ୍ତ ଗ୍ରହଣ କରାଯାଉଥିଲେ ମଧ୍ୟ ଏହା ଯଥେଷ୍ଟ ହୋଇପାରୁନାହଁ। ଥାଲାସେମିଆଁ, ଡେଲିଭରି ରୋଗୀ ଓ ଜରୁରିକାଳୀନ ପରିସ୍ଥିତିରେ ରୋଗୀମାନଙ୍କୁ ରକ୍ତ ଭଣ୍ଡାରରୁ ମାଗଣା ରକ୍ତ ପ୍ରଦାନ କରାଯାଉଛି। ମାତ୍ର ରୋଗୀଙ୍କୁ ନେଇ ଆସୁଥିବା ରୋଗୀଙ୍କ ସମ୍ପର୍କୀୟମାନେ ପ୍ରାୟତଃ ନିଶା ସେବନ କରୁଥିବାରୁ ତାଙ୍କ ଠାରୁ ରକ୍ତ ଗ୍ରହଣ କରାଯାଉ ନାହିଁ। ଅନ୍ୟପକ୍ଷରେ ମାସକୁ ଗୋଟିଏ କ୍ୟାମ୍ପ ଏବଂ ଏନଜିଓମାନଙ୍କ ଦ୍ୱାରା ସଚେତନତା କରାଯାଇ କ୍ୟାମ୍ପ କରାଗଲେ ଏହି ସମସ୍ୟା ଦୂର ହୋଇପାରିବ। ବର୍ଷକୁ ୭ରୁ ୮ ଗୋଟି କରାଯାଉଥିବା କ୍ୟାମ୍ପ ପରିବର୍ତ୍ତେ ୧୦ରୁ ୧୫ଟି କରାଗଲେ ରକ୍ତର ଅଭାବ ରହିବ ନାହଁି ବୋଲି ଜ୍ୟୋତିରଞ୍ଜନ ମଲ୍ଲିକ ସୂଚନା ଦେଇଛନ୍ତି।
