ଯୋଡ଼ା,୮ା୫(ଡି.ଏନ୍.ଏ.)- କେନ୍ଦୁଝର ଜିଲା ଯୋଡ଼ା ସହରରେ ଗୁରୁବାର ୧୮ଟି ହାତୀ ପଶି ଆତଙ୍କ ଖେଳାଇଥିଲେ। ହାତୀପଲ ନିକଟସ୍ଥ ଜଙ୍ଗଲରୁ ଆସି ସହରର ଗୋପମହାନ୍ତି ହାଟିଂସ୍ଥିତ ସରକାରୀ ଉଚ୍ଚ ବିଦ୍ୟାଳୟ, ବୁଲା ସାହି, ସେଗ୍ରିଗେସନ ଅଞ୍ଚଳରେ ସନ୍ଧ୍ୟା ୭ଟା ବେଳେ ଉପଦ୍ରବ ଚଳାଇଥିଲେ। ତେବେ ହାତୀପଲ ସହରରେ ସେପରି କିଛି କ୍ଷୟକ୍ଷତି କରି ନ ଥିବା ବେଳେ ଏତେ ସଂଖ୍ୟକ ହାତୀଙ୍କୁ ଦେଖିବା ପାଇଁ ଲୋକେ ଭିଡ଼ ଜମାଇଥିଲେ। ଲକଡାଉନ୍ ଯୋଗୁ ସହରରେ ଲୋକଙ୍କ କମ୍ ଚଳପ୍ରଚଳ ଏବଂ ଖଣିଜ ପରିବହନ କାର୍ଯ୍ୟରେ ନିୟୋଜିତ ଥିବା ଯାନବାହାନ ଚଳାଚଳ କମ୍ ରହୁଥିବାରୁ ହାତୀପଲ ସହରାଭିମୁଖୀ ହୋଇଛନ୍ତି। ଏକ ଦଶନ୍ଧି ପୂର୍ବେ ସହରରେ ଏହିପରି ହାତୀ ପ୍ରବେଶ କରି ବୁଲୁଥିବା ଦେଖିବାକୁ ମିଳିଥିଲା ବୋଲି ଯୋଡ଼ା ଅଞ୍ଚଳର ଶିକ୍ଷାବିତ୍ ସୋମନାଥ ମହାନ୍ତି କହିଛନ୍ତି। ଯୋଡ଼ା ବିକାଶ ପରିଷଦର ସଭାପତି ନିରଞ୍ଜନ ବହିଦାର କୁହନ୍ତି ଯେ, ଖଣିଖାଦାନଗୁଡିକରେ ଉଚ୍ଚ ଶକ୍ତି ସମ୍ପନ୍ନ ବାରୁଦ ବିସ୍ଫୋରଣ, ଜଙ୍ଗଲକାଟ୍ ଓ ହାଇମାକ୍ସ ଲାଇଟ୍ ଯୋଗୁ ହାତୀପଲ ଜଙ୍ଗଲରେ ବିଚରଣ କରି ନ ପାରି ସହରାଭିମୁଖୀ ହେଉଛନ୍ତି। ଏ ସମ୍ପର୍କରେ ଯୋଡ଼ା ବନପାଳ ପିଅନ ନାଏକ କହିଛନ୍ତି ଯେ, ଏହି ୧୮ଟି ହାତୀ ମଧ୍ୟରେ ୪ଟି ଦନ୍ତା, ୮ଟି ମାଈ ଓ ୬ଟି ଛୁଆ ହାତୀ ଅଛନ୍ତି। ନିକଟସ୍ଥ ୧୪ ନଂ. ଓ୍ବାର୍ଡ ବିଛାକୁଣ୍ଡି ଓ ଯୋଡା ମଧ୍ୟରେ ଥିବା ଜଙ୍ଗଲରେ ଏହି ହାତୀପଲ ରହୁଥିବା ସେ ପ୍ରକାଶ କରିଛନ୍ତି। ଏହି ହାତୀପଲ ୧ ସପ୍ତାହ ହେବ ଯୋଡ଼ା ଭ୍ୟୁର ବଟନିକାଲ ପାର୍କରେ ଉପଦ୍ରବ ଚଳାଇ ବଗିଚାରେ ଥିବା ବୃକ୍ଷଲତାକୁ ଦଳିଚକଟି ନଷ୍ଟ କରି ଦେଇଥିବା ଜଣାପଡ଼ିଛି।
