ଚୌଦ୍ୱାର,୧୬ା୫(ଡି.ଏନ.ଏ): ୫୫ ନମ୍ବର ଜାତୀୟ ରାଜପଥ ଚୌଦ୍ୱାର କଳିଙ୍ଗ ଛକର ବ୍ୟସ୍ତବହୁଳ ଜାଗାରେ ବସିଥିବା ଏକ ଉଚ୍ଚ ଶକ୍ତି ସମ୍ପନ୍ନ ବିଦ୍ୟୁତ୍ ଟ୍ରାନ୍ସଫର୍ମର ଦୀର୍ଘଦିନ ହେବ ମୁକୁଳା ଅବସ୍ଥାରେ ପଡ଼ିରହିଛି। ଯାହାଫଳରେ ଏହା ଏବେ ଲୋକଙ୍କ ଜୀବନ ପ୍ରତି ବିପଦ ସୃଷ୍ଟି କରିଛି। ଅନ୍ୟପଟେ ବିଭାଗୀୟ ଅଧିକାରୀ ଏଥିପ୍ରତି ଦୃଷ୍ଟି ନ ଦେଇ ଟ୍ରାନ୍ସଫର୍ମର ବସିଥିବା ପିଣ୍ଡିକୁ ପ୍ଲାଷ୍ଟର୍ କାର୍ଯ୍ୟ କରୁଥିବା ନ଼େଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି। ଟ୍ରାନ୍ସଫର୍ମର ନିକଟରେ ଏକ ମାର୍କେଟ କମ୍ପ୍ଲେକ୍ସ ଥିବାବେଳେ ଏଠାରେ ଲୋକଙ୍କ ଭିଡ଼ ଲାଗିଥାଏ। କାରୋନା ଭୂତାଣୁ ରୋକିବା ପାଇଁ କମ୍ପ୍ଲେକ୍ସ ସମ୍ମୁଖରେ ବ୍ୟବସାୟୀମାନେ କମ୍ପ୍ଲେକ୍ସ ପ୍ରବେଶ ପଥରେ ବାଉଁଶ ବାନ୍ଧିଥିବାରୁ ଲୋକେ ବିଦ୍ୟୁତ୍ ଟ୍ରାନ୍ସଫର୍ମର ନିକଟରେ ଗାଡ଼ି ରଖିବାକୁ ବାଧ୍ୟ ହେଉଛନ୍ତି। ଏଭଳି ସ୍ଥିତିରେ ବିଦ୍ୟୁତ୍ ବିଭାଗ ଟ୍ରାନ୍ସଫର୍ମରକୁ ସମ୍ପୂର୍ଣ୍ଣ ଆବଦ୍ଧ ନ କରି ପିଣ୍ଡିକୁ ସଜାଡ଼ିବାରେ ଲାଗିଛି। ତୁରନ୍ତ ବିଦ୍ୟୁତ୍ ବିଭାଗ ଏଥିପ୍ରତି ଦୃଷ୍ଟି ଦେବାପାଇଁ ସାଧାରଣରେ ଦାବି ହେଉଛି। ଏ ନେଇ ଚୌଦ୍ୱାର ସେସୁ ଏସ୍ଡିଓ ସମୀର ପଢ଼ିଆରି କୁହନ୍ତି, ଟ୍ରାନ୍ସଫର୍ମର ଚତୁଃପାର୍ଶ୍ୱ ପ୍ଲାଷ୍ଟର ପାଇଁ ବ୍ୟୟ ଅଟକଳ ସରିଥିବା ବେଳେ ଖୁବଶୀଘ୍ର କାମ ପ୍ରତି ଦୃଷ୍ଟି ଦିଆଯିବ ବୋଲି କହିଥିଲେ।
