ଭୁବନେଶ୍ୱର, ୨୪।୩(ବ୍ୟୁରୋ): ମିଡ୍ ଇଷ୍ଟ ଇଣ୍ଟିଗ୍ରେଟେଡ୍ ଷ୍ଟିଲ୍ ଲିମିଟେଡ୍କୁ ଉତ୍ତୋଳିତ ଲୁହାପଥର ବିକ୍ରି ପାଇଁ ଅନୁମତି ଦିଆଯାଉନି। ଏ ସମ୍ପର୍କରେ ଜବାବ ରଖିବା ପାଇଁ ସୋମବାର ସୁପ୍ରିମ୍କୋର୍ଟ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି। ପ୍ରଧାନ ବିଚାରପତି ଏସ୍.ଏ. ବୋବ୍ଡେ, ଜଷ୍ଟିସ୍ ଏଲ୍. ନାଗେଶ୍ୱର ରାଓ ଓ ସୂର୍ଯ୍ୟକାନ୍ତଙ୍କୁ ନେଇ ଗଠିତ ଖଣ୍ଡପୀଠ ଅନୁମତି ଦେବାରେ କାହିଁକି ବିଳମ୍ବ ହେଉଛି ସେନେଇ ଉତ୍ତର ଚାହିଁଛନ୍ତି। ଏଥିସହ ଆସନ୍ତା ୨୫ ତାରିଖ କିମ୍ବା ପରବର୍ତ୍ତୀ ତାରିଖକୁ ଶୁଣାଣି ପାଇଁ ଧାର୍ଯ୍ୟ କରିଛନ୍ତି।
ସୂଚନାଯୋଗ୍ୟ, ଉତ୍ତୋଳିତ ଲୁହା ପଥର ବିକ୍ରି ପାଇଁ ଅଧିକ ସମୟ ଦେବା ଲାଗି ମିଡ୍ ଇଷ୍ଟ ଷ୍ଟିଲ କମ୍ପାନୀ ସୁପ୍ରିମ୍କୋର୍ଟରେ ଆଦେବନ କରିଛି। ରାଜ୍ୟ ସରକାର ଅନୁମତି ଦେଉ ନ ଥିବାରୁ ତାହାକୁ ବିକ୍ରି କରାଯାଇପାରୁନାହିଁ ବୋଲି କମ୍ପାନୀ ପିଟିଶନରେ ଦର୍ଶାଇଛି। ପୂର୍ବରୁ ସୁପ୍ରିମ୍କୋର୍ଟ ଖଣି ଲିଜ୍ ନେଇଥିବା କମ୍ପାନୀଗୁଡ଼ିକୁ ସେମାନଙ୍କର ଆଇରନ୍ ଓର୍ ବିକ୍ରି କରିବା ପାଇଁ ଦୁଇମାସ ସମୟ ଦେବା ସହ ଜରିମାନା ବାବଦ ବକେୟା ରାଶି ଖଣି ବିଭାଗରେ ପୈଠ କରିବାକୁ ନିର୍ଦ୍ଦେଶ ଦେଇଥିଲେ।
ମିଡ୍ ଇଷ୍ଟ କମ୍ପାନୀ ୧୯୯୪ ମେ’ରେ ଯାଜପୁର ଡୁବୁରୀଠାରେ ପିଗ୍ ଆଇରନ୍ ଏବଂ ଇଷ୍ପାତ ପ୍ଲାଣ୍ଟ ସ୍ଥାପନ କରିବା ପାଇଁ କେନ୍ଦ୍ର ସରକାରଙ୍କଠାରୁ ଅନୁମତି ପାଇଥିଲା। ଏଥିସହ କେନ୍ଦୁଝର ଜିଲାର ବଡବିଲ୍ ନିକଟରେ ୧୦୪.୬୮ ଏକର ବିଶିଷ୍ଟ ରଏଡ଼ା ଲୁହାପଥର ଖଣି ୨୦୨୦ ମାର୍ଚ୍ଚ ପର୍ଯ୍ୟନ୍ତ ଲିଜ୍ ନେଇଥିଲା। ପୂର୍ବରୁ ସୁପ୍ରିମକୋର୍ଟ ବେଆଇନ ଖଣି ଖନନ ପାଇଁ ମିଡ୍ ଇଷ୍ଟକୁ ୯୨୪ କୋଟି ୭୫ଲକ୍ଷ ୨୪ ହଜାର ୨୮୩ ଟଙ୍କା କ୍ଷତି ପୂରଣ ବାବଦକୁ ରାଜ୍ୟ ସରକାରଙ୍କ ନିକଟରେ ୨୦୧୭ ଡିସେମ୍ବର ସୁଦ୍ଧା ଜମା କରିବାକୁ ନିର୍ଦ୍ଦେଶ ଦେଇଥିଲେ। ତେବେ ଏଯାଏ କମ୍ପାନୀ ଉକ୍ତ ଅର୍ଥ ଜମା କରି ପାରିନାହିଁ।
