ଓ୍ବିଲିଙ୍ଗଟନ,୨୬।୫: କରୋନା ଭାଇରସ ସଂକ୍ରମଣର ପ୍ରଭାବ ସବୁଠି ପଡିଥିବା ଲକ୍ଷ୍ୟ କରାଯାଇଛି। ଗଣମାଧ୍ୟମ ସଂସ୍ଥା ମଧ୍ୟ ଏଥିରୁ ବାଦ୍ ପଡିନାହିଁ। ଏବେ ନ୍ୟୁଜିଲାଣ୍ଡର ଏକ ଗଣମାଧ୍ୟମ ସଂସ୍ଥା ମାତ୍ର ୧ ଡଲାରରେ ବିକ୍ରି ହେବ ବୋଲି ଜଣାପଡିଛି। ନ୍ୟୁଜିଲାଣ୍ଡର ବଡ ଗଣମାଧ୍ୟମ ସଂସ୍ଥା ହେଉଛି ‘ଷ୍ଟଫ’। ଏହା କେତେଗୁଡିଏ ଖବର କାଗଜ ଛାପିବା ସହ ଏକ ଲୋକପ୍ରିୟ ସମାଚାର ଓ୍ବେବସାଇଟ୍ ମଧ୍ୟ ଚଲାଉଥିଲା। ଏଥିରେ ୪ଶହ ଖବରଦାତାଙ୍କ ସମେତ ପାଖାପାଖି ୯ଶହ କର୍ମଚାରୀ କାମ କରୁଥିଲେ। ହେଲେ ଏବେ ଏହି ଗଣମାଧ୍ୟମ ସଂସ୍ଥା ଉପରେ କରୋନା ମହାମାରୀର ପ୍ରଭାବ ପଡିଛି। କମ୍ପାନୀର ସିଇଓ ସିନେଡ ବାଉଚର ନିକଟରେ ଏକ ସାକ୍ଷାତ୍କାରରେ କହିଛନ୍ତି, କରୋନା ମହାମାରୀ ଯୋଗୁଁ ସଂସ୍ଥା ଉପରେ ଖୁବ୍ ପ୍ରଭାବ ପଡିଛି। ବିଜ୍ଞାପନ ନ ଆସିବା ଫଳରେ ରାଜସ୍ବ ମଧ୍ୟ କମ୍ ହୋଇଛି। ତେଣୁ ଏବେ ସେ ‘ଷ୍ଟଫ’କୁ ବିକ୍ରି କରିବାକୁ ସ୍ଥିର କରିଛନ୍ତି।
