ଛତ୍ରପୁର,୩୧ା୧(ଡି.ଏନ୍.ଏ.)- ନୟାଗଡ ଜିଲା ଦେଇ ଯାଇଥିବା ମହାନଦୀ ଓ ଖୋର୍ଦ୍ଧା ଜିଲା ଦେଇ ଯାଇଥିବା ଶାଳିଆ ଡ୍ୟାମ୍ରୁ ଗଞ୍ଜାମ ଜିଲାକୁ ପାଣି ଅଣାଯିବ। ଏନେଇ ୨ଟି ମେଗା ଜଳ ଯୋଗାଣ ପ୍ରସ୍ତାବ ଗ୍ରାମ୍ୟ ଜଳ ଯୋଗାଣ ବିଭାଗ ପକ୍ଷରୁ ରାଜ୍ୟ ସରକାରଙ୍କୁ ପଠାଯାଇଛି। ଏହି ୨ ପ୍ରକଳ୍ପ କାର୍ଯ୍ୟକ୍ଷମ ହେଲେ ପାଣିର ଅଭାବ ଥିବା ଗଞ୍ଜାମ ଜିଲାର ଗ୍ରାମାଞ୍ଚଳକୁ ପାଣି ଯୋଗାଣ ହୋଇପାରିବ ଏବଂ ସମସ୍ୟା ସମାଧାନ ହେବ ବୋଲି କୁହାଯାଇଛି। ମିଳିଥିବା ସୂଚନା ଅନୁଯାୟୀ ନୟାଗଡ ଜିଲାର ଦଶପଲ୍ଲା ନିକଟ ମହାନଦୀରୁ ଗଞ୍ଜାମ ଜିଲାକୁ ପାଇପ୍ ଯୋଗେ ପାଣି ଅଣାଯିବ। ଉକ୍ତ ମେଗା ଜଳ ଯୋଗାଣ ପ୍ରକଳ୍ପରୁ ଜିଲାର ୭ଟି ବ୍ଲକ ଭଞ୍ଜନଗର, ବେଲଗୁଣ୍ଠା, ଆସିକା, ସୋରଡା, କବିସୂର୍ଯ୍ୟନଗର, ଜଗନ୍ନାଥପ୍ରସାଦ ଓ ପୋଲସରା ଗ୍ରାମାଞ୍ଚଳକୁ ପାଇପ୍ ଯୋଗେ ପାାଣି ଯୋଗାଣ ହେବ। ୪୩ କି.ମି. ପାଇପ୍ ବିଛାଯାଇ ଦୈନିକ ୫୯୦ ଏମ୍ଏଲ୍ଡି ପାଣି ଯୋଗାଣ କରାଯିବ ବୋଲି ସୂଚନା ଦିଆଯାଇଛି। ଏହାଦ୍ୱାରା ଉକ୍ତ ୭ ବ୍ଲକର ୪ଲକ୍ଷ ୯୬ହଜାର ଲୋକେ ଉପକୃତ ହୋଇପାରିବେ। ସେହିପରି ଗଞ୍ଜାମ ଜିଲାର ସୀମାନ୍ତ ଅଙ୍ଗାରଗାଁ ନିକଟରେ ଥିବା ଶାଳିଆ ଡ୍ୟାମ୍ରୁ ପାଣି ଆଣିବା ପାଇଁ ମେଗା ପ୍ରକଳ୍ପ ପ୍ରସ୍ତାବ ରହିଛି। ଏହି ପ୍ରକଳ୍ପରୁ ଜିଲାର ଖଲ୍ଲିକୋଟ, ବେଗୁନିଆପଡା ଓ ପୁରୁଷୋତ୍ତମପୁର ବ୍ଲକକୁ ପାଇପ୍ ଯୋଗେ ଜଳ ଯୋଗାଣ ହେବାକୁ ସ୍ଥିର ହୋଇଛି। ଏହି ପ୍ରକଳ୍ପ ଦ୍ୱାରା ଜିଲାର ୩ ଲକ୍ଷ ୨୨ ହଜାର ଲୋକେ ଉପକୃତ ହେବେ। ଦୈନିକ ଉକ୍ତ ପ୍ରକଳ୍ପରୁ ୩୮.୩୧ ଏମ୍ଏଲ୍ଡି ପାଣି ଯୋଗାଣ ହେବ ବୋଲି ସୂଚନା ଦିଆଯାଇଛି। ଆହୁରି ଜଣାଯାଇଛି ଯେ ଋଷିକୁଲ୍ୟାର କଂସାରୀଗଣ୍ଡରୁ ଛତ୍ରପୁର ଓ ରଙ୍ଗେଇଲୁଣ୍ଡା ବ୍ଲକର ଗ୍ରାମାଞ୍ଚଳକୁ ମଧ୍ୟ ପାଣି ଯୋଗାଣ ପାଇଁ ମେଗା ପ୍ରକଳ୍ପ ପ୍ରସ୍ତାବ ରହିଛି। ଏହି ପ୍ରକଳ୍ପରୁ ଦୈନିକ ୨୨ ଏମ୍ଏଲ୍ଡି ପାଣି ଯୋଗାଣ ହେବାକୁ ଥିବାବେଳେ ୨ ଲକ୍ଷ ଲୋକେ ଉପକୃତ ହେବେ ବୋଲି କୁହାଯାଇଛି।
