ଇସଲାମାବାଦ,୧୨।୭: ପାକିସ୍ତାନ ମିଡିଆ ସେନସରଶିପ୍କୁ ନେଇ ଏକ ନୂଆ ଘଟଣା ସାମ୍ନାକୁ ଆସିଛି। ପାକିସ୍ତାନ ମୁସଲିମ ଲିଗ-ନଓ୍ବାଜ(ପିଏମ୍ଏଲ୍-ଏନ୍)ନେତା ମିରିୟମ ନଓ୍ବାଜଙ୍କ ସାକ୍ଷାତ୍କାରକୁ ପାକିସ୍ତାନ ନ୍ୟୁଜ ଚ୍ୟାନେଲ ବ୍ରଡକାଷ୍ଟ ସମୟରେ ଜୋର ଜବରଦସ୍ତ ବନ୍ଦ କରି ଦେଇଥିବା ସୂଚନା ମିଳିଛି। ହମ୍ ନ୍ୟୁଜରେ କାମ କରୁଥିବା ଜଣେ ଖବରଦାତା ଟୁଇଟ୍ କରି ଏହି ସୂଚନା ଦେଇଛନ୍ତି। ତେବେ ଚ୍ୟାନେଲ ବ୍ଲାକ ଆଉଟ୍ ହେବା ପରେ ଏହାକୁ ନେଇ ଚ୍ୟାନେଲ ପକ୍ଷରୁ ମଧ୍ୟ ଟୁଇଟ୍ କରାଯାଇଥିଲା। ହମ୍ ନ୍ୟୁଜ୍ ସ୍ବାଧିନ ଓ ଦାୟିତ୍ୱ ସମ୍ପନ୍ନ କାର୍ଯ୍ୟ ଉପରେ ବିଶ୍ୱାସ କରେ। ଚ୍ୟାନେଲ ତା’ର ନୈତିକ ମୂଲ୍ୟବୋଧ ଓ ସଂରକ୍ଷଣ ସହ ନ୍ୟାୟପାଳିକାକୁ ସମ୍ମାନ କରେ। ତେବେ ଏହି ସାକ୍ଷାତ୍କାର ନଦିମ ମଲିକଙ୍କ ଟୁଇଟର ହ୍ୟାଣ୍ଡେଲରେ ଅଛି ବୋଲି ଚ୍ୟାନେଲ ପକ୍ଷର କୁହାଯାଇଛି। ସୂଚନାଯୋଗ୍ୟ, ଏହା ପୂର୍ବରୁ ୩ ନ୍ୟୁଜ ଚ୍ୟାନେଲ ମରିୟମଙ୍କ ଖବରଦାତା ସମ୍ମିଳନୀ ପ୍ରସାରଣ କରିବାରୁ ପାକିସ୍ତାନ ଇଲୋକ୍ଟ୍ରନିକ୍ ମିଡିଆ ରେଗୁଲଟିରି ଅଥରିଟି (ପିଇଏମ୍ଆର୍ଏ)ର ନିର୍ଦ୍ଦେଶ ପରେ ଉକ୍ତ ଚ୍ୟାନେଲକୁ ଅଫ୍ ଏୟାର କରାଯାଇଥିଲା।
