ଭୋଗରାଇ, ୨୫।୫(ଡି.ଏନ.ଏ.)-ନିର୍ବାଚନ ଫଳାଫଳ ଘୋଷଣା ପରେ ଉଭୟ ଭାଜପା ଓ ବିଜେଡିର ବିଜେତା ପ୍ରାର୍ଥୀଙ୍କୁ ମନ୍ତ୍ରୀପଦ ମିଳିବା ନେଇ ଦଳୀୟ କର୍ମୀଙ୍କୁ ଚିନ୍ତା ଘାରିଛି। ଭାଜପା ପ୍ରାର୍ଥୀ ପ୍ରତାପ ଚନ୍ଦ୍ର ଷଡ଼ଙ୍ଗୀ ବାଲେଶ୍ୱର ଲୋକସଭା ଆସନରୁ ନିର୍ବାଚିତ ହେବା ପରେ ଦଳୀୟ କର୍ମୀ ଓ ନେତାଙ୍କ ମଧ୍ୟରେ ଉତ୍ସାହ ପ୍ରକାଶ ପାଇଛି। ସେମାନେ କମର୍ଦ୍ଦା ଓ ଅନ୍ୟ ସ୍ଥାନରେ ବିଜୟ ଦିବସ ପାଳନ କରିବା ସହ ପ୍ରତାପ କେନ୍ଦ୍ରରେ ମୋଦିଙ୍କ ନୂଆ ସରକାରରେ ଯେଭଳି ମନ୍ତ୍ରୀ ପଦ ପାଇବେ ସେଥିଲାଗି କର୍ମୀମାନେ ମନ୍ଦିରରେ ପୂଜା ପାଠ କରିଛନ୍ତି। ଅନୁରୂପ ଭାବେ ବାଲେଶ୍ୱର ଜିଲା ଭୋଗରାଇ ବିଧାନସଭା ଆସନ ବିଜୟୀ ବିଜେଡି ପ୍ରାର୍ଥୀ ଅନନ୍ତ ଦାସଙ୍କ ସମର୍ଥକମାନେ ବିଭିନ୍ନ ମନ୍ଦିରକୁ ଯାଇ ପୂଜାର୍ଚ୍ଚନା କରିଥିବା ଜଣାପଡିଛି। ନିର୍ବାଚନ ଫଳାଫଳ ଘୋଷଣା ପରେ ରାଜ୍ୟରେ ନୂତନ ସରକାର ଗଢିବା ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଇସ୍ତଫା ଦେଇଛନ୍ତି। ଏଥିଲାଗି ପୂର୍ବ ମନ୍ତ୍ରିମଣ୍ଡଳର ସମସ୍ତ ସଦସ୍ୟ ମଧ୍ୟ ଇସ୍ତଫା ପ୍ରଦାନ କରିଛନ୍ତି। ପୂର୍ବ ମନ୍ତ୍ରିମଣ୍ଡଳରେ ବିଜେଡିର ବରିଷ୍ଠ ନେତା ଅନନ୍ତ ମନ୍ତ୍ରୀପଦ ପାଇଥିଲେ। ଏଥର ସେ ଭୋଗରାଇ ଆସନରୁ ୪ର୍ଥ ଥର ନିର୍ବାଚିତ ହୋଇଛନ୍ତି। ଏହି ପରିପ୍ରେକ୍ଷୀରେ ତାଙ୍କ ସମର୍ଥକମାନେ ଉତ୍ସାହିତ ହୋଇ ଶନିବାର ଭୋଗରାଇର ବିଭିନ୍ନ ଦେବଦେବୀଙ୍କୁ ପୂଜାର୍ଚ୍ଚନା କରିଛନ୍ତି। ସ୍ଥାନୀୟ ସୋହରିଆ ପଞ୍ଚାୟତର ବହୁ ନେତା ଓ କର୍ମୀ ଦେହୁର୍ଦ୍ଦାସ୍ଥିତ ହନୁମାନ ମନ୍ଦିରରେ ଏକାଠି ହୋଇ ପୂଜାପାଠ କରିଥିବା ଜଣାପଡିଛି।
