ଇନ୍ଦ୍ରଧନୁ ପ୍ରକୃତିର ଏକ ଅପରୂପ ଦୃଶ୍ୟ। ଖୋଲା ଆକାଶରେ ସପ୍ତରଙ୍ଗର ଏହି ଦୃଶ୍ୟ ଦେଖିବାକୁ କାହାକୁ ବା ଭଲ ନ ଲାଗେ। ତେବେ ଇନ୍ଦ୍ରଧନୁକୁ ଚାରିକାନ୍ଥ ଭିତରେ ମନୁଷ୍ୟକୃତ ଭାବେ ସୃଷ୍ଟିକରି ଜଣେ କଳାକାର ସାଉଁଟିଛନ୍ତି ଅନେକ ପ୍ରଶଂସା। ମେକ୍ସିକୋ ଜନ୍ମିତ ଗାବ୍ରିଏଲ ଦାବେ ନାମକ ଏହି କଳାକାର ନିଜ ସୃଜନାତ୍ମକ କଳାକୃତି ଲାଗି ବେଶ୍ ଚର୍ଚ୍ଚାରେ ଥା’ନ୍ତି। ଓହିଓଠାରେ ଥିବା ଗ୍ରେଟ ଗ୍ୟାଲେରି ଅଫ୍ ଟୋଲେଡୋ ମ୍ୟୁଜିୟମ୍ ଅଫ୍ ଆର୍ଟଠାରେ ସେ ଏମ୍ବ୍ରୋଡରୀ ସୂତାକୁ ବ୍ୟବହାର କରି ସୃଷ୍ଟି କରିଛନ୍ତି ଏଭଳି ଏକ କଳାକୃତି, ଯାହା ଇନ୍ଦ୍ରଧନୁର ଭ୍ରମ ସୃଷ୍ଟି କରିଥାଏ। ଗାବ୍ରିଏଲ ହଜାରେ ପ୍ରକାର ସାଧାରଣ ରଙ୍ଗିନ ଏମ୍ବ୍ରୋଡରୀ ସୂତାକୁ ଘରର ଛାତରୁ ଚଟାଣ ଯାଏ ପୁଣି ଚଟାଣରୁ ଛାତ ଯାଏ ବାରମ୍ବାର ଗୁଡାଇ ଏହି ପ୍ୟାଟର୍ନ ପ୍ରସ୍ତୁତ କରିଥିଲେ, ଯାହା ଇନ୍ଦ୍ରଧନୁର ଏକ କଳାତ୍ମକ ଦୃଶ୍ୟ ଭଳି ପ୍ରତୀୟମାନ ହେଲା। ଏହି କଳାକୃତି ସମ୍ପର୍କରେ ଗାବ୍ରିଏଲ କୁହନ୍ତି, ମନୁଷ୍ୟ ଏବଂ ପ୍ରକୃତି ମଧ୍ୟରେ ଥିବା ଦୃଢ ସମ୍ପର୍କକୁ ଦର୍ଶାଇବାକୁ ଯାଇ ସେ ଏଭଳି ଏକ କଳାକୃତି ନିର୍ମାଣ କରିବା କଥା ଚିନ୍ତା କରିଥିଲେ। ପ୍ଲେକ୍ସସ୍ ଏ-୧ ନାମକ ଏହି କଳାକୃତି ପ୍ରସ୍ତୁତ କରିବା ଲାଗି ଗାବ୍ରିଏଲଙ୍କୁ ୧୦ ଦିନ ସମୟ ଲାଗିଥିଲା ଏବଂ ଏଥିରେ ୬୦ ମାଇଲ ସୂତା ବ୍ୟବହୃତ ହୋଇଥିଲା।
