ବିିଞ୍ଝାରପୁର,୨୮।୯(ଡି.ଏନ.ଏ): ବିଞ୍ଝାରପୁର ଥାନା ମଧୁସୂଦନପୁର ଗ୍ରାମର ରଥସାହିଠାରେ ଗୁରୁବାର ବିଳମ୍ବିତ ରାତିରେ ଭୟାବହ ଅଗ୍ନିକାଣ୍ଡ ଘଟିଛି। ଅଗ୍ନିକାଣ୍ଡର କାରଣ ଜଣାପଡି ନ ଥିବାବେଳେ ଏଥିରେ ଦୁଇ ପରିବାରର ୪ବଖରା ସହିତ ୨ଟି ଗାଈ, ୨ ବାଛୁରୀ, ୪ ବାଇକ୍ ଓ ସ୍କୁଟି, ନଗଦ ୫୦ ହଜାର ଟଙ୍କା ଏବଂ ଘରର ସମସ୍ତ ଆସବାବପତ୍ର ଜଳି ପାଉଁଶ ହୋଇଯାଇଛି। ଏହି ଗ୍ରାମର ସଞ୍ଜୟ କୁମାର ରଥ(୫୨)ଙ୍କ ଗୁହାଳ ଘରେ ଗୁରୁବାର ବିଳମ୍ବିତ ରାତିରେ କୌଣସି କାରଣରୁ ନିଆଁ ଲାଗି ଯାଇଥିଲା। ନିଆଁର ପ୍ରକୋପ ଏତେ ତୀବ୍ର ଥିଲା ଯେ ଚାହଁଚାହୁଁ ପଡୋଶୀ ଦିନମଜୁରିଆ ଶ୍ରେଣୀର ସୁବାସ ଚନ୍ଦ୍ର ରଥ(୩୮)ଙ୍କ ଘରକୁ ବ୍ୟାପୀ ଯାଇଥିଲା । ସୁବାସଙ୍କ ଦୁଇ ବଖରା ଓ ସଞ୍ଜୟଙ୍କ ଗୁହାଳ ଘର ସହିତ ପାଖରେ ଥିବା ଅନ୍ୟ ଏକ ବଖରା ଜଳିଯାଇଛି । ଏହି ଅଗ୍ନିକାଣ୍ଡରେ ସଞ୍ଜୟଙ୍କର ୪ଟି ଗୋରୁ, ୪ଟି ଗାଡ଼ି ଜଳିଯାଇଛି। ସେହିପରି ସୁବାସଙ୍କ ଘରର ସମସ୍ତ ଆସବାବପତ୍ର ସମେତ ଘର ଛପର ପାଇଁ ବିଭିନ୍ନ ବ୍ୟାଙ୍କରୁ ଋଣ ଆଣିଥିବା ୫୦ ହଜାରରୁ ଊର୍ଦ୍ଧ୍ୱ ଟଙ୍କା ଜଳିଯାଇଛି। ଅଗ୍ନିକାଣ୍ଡ ସମ୍ପର୍କରେ ଖବର ପାଇ ବିଞ୍ଝାରପୁର ଅଗ୍ନିଶମ ବିଭାଗର କର୍ମଚାରୀମାନେ ଘଟଣାସ୍ଥଳରେ ପହଞ୍ଚତ୍ ନିଆଁକୁ ଆୟତ୍ତ କରିଥିଲେ। ତିନି ପୁଅ ଓ ପରିବାରକୁ ନେଇ ସୁବାସ ଏବେ ପରଘରେ ମୁଣ୍ଡ ଗୁଞ୍ଜିଛନ୍ତି। ସରକାରୀସ୍ତରରେ ଏହି ଅଗ୍ନିବିପନ୍ନଙ୍କୁ ଥଇଥାନ କରାଯିବା ସହିତ ସେମାନଙ୍କୁ ତୁରନ୍ତ ସହାୟତା ଯୋଗାଇ ଦେବାକୁ ସାଧାରଣରେ ଦାବି କରାଯାଉଛି ।
