ସମ୍ବଲପୁର,୯ା୫(ବ୍ୟୁରୋ)-ସମ୍ବଲପୁର ବୁର୍ଲା ଭିମ୍ସାର ପରିସରରେ ଘରୋଇ ଆମ୍ବୁଲାନ୍ସଗୁଡିକ ପାର୍କିଂ କରିପାରିବେ ନାହିଁ। ମେଡିକାଲ କ୍ୟାମ୍ପସ ବାହାରେ ରହିବେ। ରୋଗୀ ବା ସେମାନଙ୍କ ସମ୍ପର୍କୀୟଙ୍କ ସହ ମୂଲଚାଲ କରି ପାରିବେ ନାହିଁ। ଦର ଧାର୍ଯ୍ୟ ପରେ ଆମ୍ବୁଲାନ୍ସ ରୋଗୀ କିମ୍ବା ମୃତଦେହ ନେବ। ଅଧିକ ଦର ନେଇ ପାରିବେ ନାହିଁ ବୋଲି ଭିମସାର କର୍ତ୍ତପକ୍ଷ ନିର୍ଦ୍ଦେଶ ଦେଇଛନ୍ତି। ଶନିବାର ଆମ୍ବୁଲାନ୍ସ ମାଲିକ ଓ ଚାଳକ ସଂଘ ସଦସ୍ୟମାନେ ଭିମ୍ସାର କର୍ତ୍ତୃପକ୍ଷ ଓ କେତେକ ଡାକ୍ତରଙ୍କ ସହ ଆଲୋଚନା ବେଳେ ଏହି ନିଷ୍ପତ୍ତି ହୋଇଛି।
ମେ ୪ ତାରିଖ ନୂଆପଡ଼ା ରାଜଖରିଆର ରୋଡର ସର୍ବେଶର ମାଝି ଓ ତାଙ୍କ ସ୍ତ୍ରୀ ଏବଂ ୭ ବର୍ଷର ପୁଅକୁ ଜଣେ ବ୍ୟକ୍ତି ରାତିସାରା ଆମ୍ବୁଲାନ୍ସରେ ବନ୍ଦ ରଖିଥିଲେ। ଏହାର କାରଣ ସର୍ବେଶ୍ୱର ଆମ୍ବୁଲାନ୍ସକୁ ଟଙ୍କା ଦେଇ ପାରି ନ ଥିଲେ। ଏଣୁ ଭିମ୍ସାରରୁ ଏମାନଙ୍କୁ ନେଇ ନୂଆପଡ଼ା ଯାଇଥିବା ଘରୋଇ ଆମ୍ବୁଲାନ୍ସ ପୁଣି ଭିମ୍ସାର ଫେରି ଆସିଥିଲା। ଅତି ନିର୍ଦ୍ଦୟ ଭାବେ ଆମ୍ବୁଲାନ୍ସ ଚାଳକ ସାରା ରାତି ବାପା, ମା, ଛୁଆକୁ ଗାଡି ଭିତରେ ବନ୍ଦ ରଖିଥିଲେ। ସକାଳେ ଲୋକେ ଏମାନଙ୍କୁ ଉଦ୍ଧାର କରିଥିଲେ। ଏହି ଘଟଣା ପ୍ରଘଟ ହେବା ପରେ ପୋଲିସ ସମ୍ପୃକ୍ତ ଆମ୍ବୁଲାନ୍ସ ଚାଳକ ଛୋଟେଲାଲ ଗୁପ୍ତାଙ୍କ ନାମରେ ମାମଲା ରୁଜୁ କରିଛି। ସେହି ଦିନଠାରୁ କୌଣସି ଘରୋଇ ଆମ୍ବୁଲାନ୍ସ ଭିମ୍ସାର ପରିସରକୁ ଆସିବାକୁ କର୍ତ୍ତୃପକ୍ଷ ମନା କରିଛନ୍ତି। ଏଣୁ ଘରୋଇ ଆମ୍ବୁଲାନ୍ସ ଚାଳକ ଓ ମାଲିକ କ୍ଷତିଗ୍ରସ୍ତ ହେଉଛନ୍ତି।
