ଲଣ୍ଡନ, ୨୫।୪ (ପି.ଟି.): ଭାରତୀୟ ମହିଳା କ୍ରିକେଟ ଦଳର ଇଂଲଣ୍ଡ ଗସ୍ତ ସ୍ଥଗିତ ରହିଛି। କୋଭିଡ୍-୧୯ ସଂକ୍ରମଣ କାରଣରୁ ଇଂଲଣ୍ଡ ଓ ଓ୍ବେଲ୍ସ କ୍ରିକେଟ ବୋର୍ଡ (ଇସିବି) ଜୁଲାଇ ୧ ତାରିଖ ପର୍ଯ୍ୟନ୍ତ ସବୁ ପେସାଦାର କ୍ରିକେଟ କାର୍ଯ୍ୟକଳାପକୁ ବାତିଲ କରିଥିବାରୁ ଏପରି ସ୍ଥିତି ଉପୁଜିଛି। ଜୁନ୍ ୨୫ରୁ ଭାରତୀୟ ମହିଳାଙ୍କ ଗସ୍ତ ଆରମ୍ଭ ହେବା କାର୍ଯ୍ୟକ୍ରମ ଥିଲା। ଦୁଇ ସପ୍ତାହ ବିଶିଷ୍ଟ ଏହି ଗସ୍ତରେ ଭାରତ ୪ଟି ଦିନିକିଆ ଓ ୨ଟି ଟି୨୦ ମ୍ୟାଚ୍ ଖେଳିଥାନ୍ତା ଜୁଲାଇ ୯ରେ ଗସ୍ତ ଶେଷ ହେବାର କାର୍ଯ୍ୟକ୍ରମ ଥିଲା। ଭାରତ ଟନ୍ଟନ୍ ଓ ବ୍ରିଷ୍ଟଲ୍ରେ ଦୁଇଟି ଟି୨୦ ଏବଂ ୪ ଦିନିକିଆ ଓ୍ବରସେଷ୍ଟର, ଚେମ୍ସଫୋର୍ଡ, କାଣ୍ଟେରବୁରୀ ଓ ହୋଭ୍ରେ ଖେଳିଥାନ୍ତା। ଚଳିତ ଗ୍ରୀଷ୍ମରେ ଯେତେ ସମ୍ଭବ କ୍ରିକେଟ ମ୍ୟାଚ୍ ଆୟୋଜନ କରିବାକୁ ଆମେ ଆଶାବାଦୀ ଅଛୁ। ତେବେ ସ୍ବାସ୍ଥ୍ୟ ଓ ନିରାପତ୍ତାକୁ ପ୍ରାଥମିକତା ଦିଆଯିବ ବୋଲି ଇଂଲଣ୍ଡ ଓ ଓ୍ବେଲ୍ସ କ୍ରିକେଟ ବୋର୍ଡ (ଇସିବି) ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଟମ୍ ହାରିସନ କହିଛନ୍ତି। ସରକାରଙ୍କ ନିର୍ଦ୍ଦେଶନାମା ଅନୁଯାୟୀ ଆମେ ନିଷ୍ପତ୍ତି ନେବୁ। ଖେଳିବା ପାଇଁ ସୁସ୍ଥ ପରିବେଶ ନ ହେଲା ପର୍ଯ୍ୟନ୍ତ କ୍ରିକେଟ ସମ୍ଭବ ନୁହେଁ। ଜୁଲାଇରୁ ସେପ୍ଟେମ୍ବର ପର୍ଯ୍ୟନ୍ତ ଇଂଲଣ୍ଡ ପୁରୁଷ ଓ ମହିଳା ଦଳର କାର୍ଯ୍ୟକ୍ରମ ସ୍ଥିରୀକୃତ ହେବ। ବୁଧବାର ଏକ ଅତିରିକ୍ତ ବୋର୍ଡ ବୈଠକ ବସିବା କାର୍ଯ୍ୟକ୍ରମ ରହିଛି। ଅନ୍ତର୍ଜାତୀୟ ମ୍ୟାଚ୍ଗୁଡିକର ନୂଆ କାର୍ଯ୍ୟସୂଚୀ ଧାର୍ଯ୍ୟ କରିବା ପାଇଁ ଆମର ଯୋଜନା ରହିଛି ବୋଲି ଇସିବି ତରଫରୁ କୁହାଯାଇଛି।
