ଭୁବନେଶ୍ୱର, ୨୮।୨(କ୍ରୀଡ଼ା ପ୍ରତିନିଧି)-ନିଜ ଲକ୍ଷ୍ୟ ପଥରେ କ୍ରମେ ଆଗକୁ ବଢ଼ୁଛନ୍ତି ଇଣ୍ଡିଆନ ସୁପରଲିଗ୍(ଆଇଏସଏଲ)ର ଓଡ଼ିଆ ତାରକା ଶୁଭମ୍ ଷଡ଼ଙ୍ଗୀ। ଜାତୀୟ ଦଳ ପକ୍ଷରୁ ପ୍ରତିନିଧିତ୍ୱ କରିବା ପ୍ରତି ଖେଳାଳିଙ୍କ ଅଭିଳାଷ ରହିଥାଏ। ଏଥିରେ ଶୁଭମ୍ ମଧ୍ୟ ବ୍ୟତିକ୍ରମ ନୁହନ୍ତି। ଜାତୀୟ ଦଳ ପକ୍ଷରୁ ଖେଳିବା ତାଙ୍କର ସ୍ବପ୍ନ ବୋଲି ପୂର୍ବରୁ ସେ ପ୍ରକାଶ କରି ସାରିଛନ୍ତି। ଏହି ଦିଗରେ ଏବେ ଗୋଟିଏ ପାଦ ଆଗେଇଛନ୍ତି ପ୍ରତିଭା ସମ୍ପନ୍ନ ଶୁଭମ୍। ଆଗାମୀ କାତାର ବିପକ୍ଷ ଫିଫା ୨୦୨୨ ବିଶ୍ୱକପ ଯୋଗ୍ୟତା ପର୍ଯ୍ୟାୟ ମ୍ୟାଚ ପାଇଁ ଶୁଭମଙ୍କୁ ଭାରତୀୟ କ୍ୟାମ୍ପରେ ସାମିଲ କରାଯାଇଛି। ଭାରତ-କାତାର ମ୍ୟାଚ ମାର୍ଚ୍ଚ ୨୬ରେ ସ୍ଥାନୀୟ କଳିଙ୍ଗ ଷ୍ଟାଡିୟମରେ ଅନୁଷ୍ଠିତ ହେବ। ତା’ ପୂର୍ବରୁ ୨୩ ଖେଳାଳିଙ୍କୁ ନେଇ ୧୮ ଦିନିଆ ଜାତୀୟ କ୍ୟାମ୍ପ ସେହି ଭୁବନେଶ୍ୱରରେ ହିଁ ମାର୍ଚ୍ଚ ୯ରୁ ଆରମ୍ଭ ହେବ। ଏହି କ୍ୟାମ୍ପ ପାଇଁ ଶୁଭମଙ୍କ ସମେତ ୧୧ ଖେଳାଳି ପ୍ରଥମଥରପାଇଁ କ୍ୟାମ୍ପରେ ସାମିଲ ହୋଇଛନ୍ତି। ସେମାନେ ହେଲେ ଲାଲେଙ୍ଗମାଓ୍ବିଆ, ଜେରି ମାଓ୍ବିମିଙ୍ଗଥାଙ୍ଗା, ଜ୍ୟାକସନ ସିଂ, ଲିଷ୍ଟନ କୋଲାକୋ, ପ୍ରତୀକ ଚୌଧାରୀ, ରଫିକ୍ ଅଲୀ ସର୍ଦ୍ଦାର, ପ୍ରଭସୁଖାନ ଗିଲ, ସୁମିତ ରାଠି, ସେରିଟନ ଫର୍ନାଣ୍ଡିଜ ଓ ଏଡଓ୍ବିନ ସିଡ୍ନୀ ଭାନ୍ସପଲ। ଆଇଏସଏଲ ସେମିଫାଇନାଲରେ ପ୍ରବେଶ କରିଥିବା ଅନ୍ୟ ୪ ଦଳର ୨୦ ଖେଳାଳି ମାର୍ଚ୍ଚ ୧୬ରୁ କ୍ୟାମ୍ପରେ ଯୋଗଦେବେ। ବାଲେଶ୍ୱର ସୋରୋ ଅଞ୍ଚଳର ଅନୀତା ଓ ପ୍ରୀତିକାନ୍ତ ଷଡ଼ଙ୍ଗୀଙ୍କ ପୁତ୍ର ଶୁଭମ୍ ବାପାଙ୍କ କର୍ମସଂସ୍ଥାନ ଯୋଗୁ ପିଲାଟି ଦିନରୁ ବାହାର ପରିବେଶରେ ବଢ଼ି ଆସିଛନ୍ତି। ଆଇଏସଏଲରେ ପୂର୍ବରୁ ଦିଲ୍ଲୀ ଡାଇନାମସ ପକ୍ଷରୁ ଖେଳି ଆସୁଥିବା ଏହି ଫୁଟବଲ ପ୍ରତିଭା ଚଳିତ ସିଜନରେ ଓଡ଼ିଶା ଏଫସି ପକ୍ଷରୁ ପ୍ରତିନିଧିତ୍ୱ କରିଥିଲେ। ପୁରା
