ବାରିପଦା ଅଫିସ,୨୪ା୧- ମୟୂରଭଞ୍ଜ ଜିଲାର ଅଣରାଜନୈତିକ ଯୁବଛାତ୍ର ସଂଗଠନ ଭଞ୍ଜସେନାର ୨୨ତମ ପ୍ରତିଷ୍ଠା ଦିବସ ଗୁରୁବାର ପାଳିତ ହୋଇଯାଇଛି। ସେନାର ସଭାପତି ପିଣ୍ଟୁ ମାଇତିଙ୍କ ନେତୃତ୍ୱରେ ସକାଳେ ମଧୁବନ ସ୍ଥିତ ମା ଭୈରବୀ ମନ୍ଦିରରେ ସମସ୍ତ କର୍ମକର୍ତ୍ତା ପୂଜାର୍ଚ୍ଚନା କରିଥିଲେ। ପରେ ସହରର ବିଭିନ୍ନ ସ୍ଥାନରେ ଥିବା ବରପୁତ୍ରମାନଙ୍କ ପ୍ରତିମୂର୍ତ୍ତିରେ ପୁଷ୍ପମାଲ୍ୟ ଦେବା ସହିତ ମେଡିକାଲ କଲେଜ ଓ ଆଞ୍ଚଳିକ ପରିବହନ କାର୍ଯ୍ୟାଳୟ ପରିସରରେ ବୃକ୍ଷରୋପଣ କରାଯାଇଥିଲା। ପରେ ସାଇବିନାୟକ ମଣ୍ଡପ ଠାରେ ସେନାର ଅଧ୍ୟକ୍ଷ ସତ୍ୟସ୍ବରୁପ ଦାଶଙ୍କ ଅଧ୍ୟକ୍ଷତାରେ ଏକ ଖବରଦାତା ସମ୍ମିିଳନୀ ଆୟୋଜନ ସହ ସେନା ପକ୍ଷରୁ ଏକ ରକ୍ତଭଣ୍ଡାର ଶାଖାର ଉଦ୍ଘାଟନ କରାଯାଇଥିଲା। ଜିଲାରେ ପର୍ଯ୍ୟଟନ ଶିଳ୍ପ ପ୍ରତିଷ୍ଠା କରି ବେକାରୀ ମୁକ୍ତ ମୟୂରଭଞ୍ଜ ଗଠନ ଓ ସରକାର ମୋତେ ରୋଜଗାର ଦିଅ ନାରା ନେଇ ଆସନ୍ତା ଫେବୃୟାରୀ ମାସରୁ ଜିଲାବାସୀଙ୍କୁ ସଚେତନ କରାଯାଇ ଜନ ସମର୍ଥନ ଯୁଟାଯିବ। ଏହି ଅବସରରେ ସଚେତନତା ରଥ ମଧ୍ୟ ଜିଲା ସାରା ପରିକ୍ରମା କରିବ। ଜିଲାର ହକ ପାଇଁ ହେଉଥିବା ସେନାର ଏହି ଆନ୍ଦୋଳନରେ ଜିଲାର ଯୁବଛାତ୍ରମାନେ ସାମିଲ ହେବାକୁ ସେନାର ସଭାପତି ମାଇତି ଆହ୍ବାନ ଦେଇଥିଲେ। ଯୁବ ସଂଗଠକ କଳିଙ୍ଗ କେଶରୀ ଜେନା କାର୍ଯ୍ୟକ୍ରମର ନେତୃତ୍ୱ ନେଇଥିଲେ। ଖବରଦାତା ସମ୍ମିଳନୀରେ କାର୍ଯ୍ୟକାରୀ ଅଧ୍ୟକ୍ଷ ରାକେଶ ସିଂ, ଯୁବଛାତ୍ର ସଂଯୋଜକ ରାକେଶ ବେହେରା, ଉପସଭାପତି ପ୍ରଶାନ୍ତ ମହାକୁଡ, ସାଧାରଣ ସମ୍ପାଦକ ମାନସ ବେହେରା, ମୁଖପାତ୍ର ଜ୍ୟୋତିରଞ୍ଜନ ପୃଷ୍ଟି, ସହର ସଭାପତି ସୌମ୍ୟରଞ୍ଜନ ମିଶ୍ର, ସମ୍ପାଦକ ରାକେଶ ମହାନ୍ତି ଓ ସହର ଉପସଭାପତି ସେଖ ରାଜା ଖାନ ଓ ଛାତ୍ର ନେତା ଧନଞ୍ଜୟ ସାହୁ ପ୍ରମୁଖ ଉପସ୍ଥିତ ଥିଲେ। ଏହି କାର୍ଯ୍ୟକ୍ରମ ପରେ ଜିଲାର ବିକାଶ ଦାବି ନେଇ କେନ୍ଦ୍ର ଓ ରାଜ୍ୟ ସରକାରଙ୍କୁ ଶାନ୍ତି ପୂର୍ଣ୍ଣ ଭାବେ ଦାବି ଜଣାଇବା ଉଦ୍ଦେଶ୍ୟରେ ସେନାର ପ୍ରାୟ ୫ ହଜାର କର୍ମକର୍ତ୍ତା ଜିଲାପାଳଙ୍କ କାର୍ଯ୍ୟାଳୟରୁ ଜଗନ୍ନାଥ ମନ୍ଦିର ପର୍ଯ୍ୟନ୍ତ ମଶାଲ ଶୋଭାଯାତ୍ରା କରିଥିଲେ।
