ବ୍ରସେଲ୍ସ, ୨୦।୫(ଏଏଫ୍ପି): ବେଲଜିୟମ ଫୁଟବଲ କୋଚ୍ ରୋବେର୍ଟୋ ମାର୍ଟିନେଜଙ୍କ କଣ୍ଟ୍ରାକ୍ଟ ତଥା କାର୍ଯ୍ୟକାଳ ବୃଦ୍ଧି ହୋଇଛି। ୨୦୨୨ ପର୍ଯ୍ୟନ୍ତ ତାଙ୍କର ଚୁକ୍ତି ବୃଦ୍ଧି ହୋଇଛି। ଅର୍ଥାତ କାତାର ଆୟୋଜିତ ହେବାକୁ ଥିବା ୨୦୨୨ ବିଶ୍ୱକପ୍ ପର୍ଯ୍ୟନ୍ତ ସେ ଦଳର କୋଚ୍ ଦାୟିତ୍ୱରେ ରହିବେ ବୋଲି ବେଲଜିଆନ ଫୁଟବଲ ଫେଡେରେଶନ (ବିଏଫ୍ଏଫ୍) ତରଫରୁ ଘୋଷଣା କରାଯାଇଛି।
୨୦୧୬ରେ ୪୬ ବର୍ଷୀୟ ଏହି ଇଭରଟନ୍ ମ୍ୟାନେଜର ବେଲିଜିୟମ ଫୁଟବଲ ଦଳରେ ଦାୟିତ୍ୱ ନେଇଥିଲେ ଓ ୨୦୧୮ ବିଶ୍ୱକପ୍ରେ ଦଳକୁ ତୃତୀୟ ସ୍ଥାନରେ ପହଞ୍ଚାଇଥିଲେ। ସ୍ପେନ୍ର ମାର୍ଟିନେଜଙ୍କ ଚୁକ୍ତି ପ୍ରକୃତରେ ୨୦୨୦ ୟୁରୋ କପ୍ ପର୍ଯ୍ୟନ୍ତ ଥିଲା। ତେବେ କରୋନା ଭାଇରସ ମହାମାରୀ କାରଣ ପାଇଁ ଏହାକୁ ଘୁଞ୍ଚାଇ ଦିଆଯାଇଛି। ମାର୍ଟିନେଜଙ୍କ ତତ୍ତ୍ୱାବଧାନରେ ବେଲଜିୟମ ୪୩ଟି ମ୍ୟାଚ୍ ଖେଳିଛି ଓ ଦମ୍ଦାର ପ୍ରଦର୍ଶନ କରି ୩୪ଟିରେ ବିଜୟ ହାସଲ କରିବା ସହ ୩ଟିରେ ପରାଜୟବରଣ କରିଛି, ୬ଟି ମ୍ୟାଚ୍ ଡ୍ର ରହିଛି। ଏହି ଉଚ୍ଚକୋଟୀର ପ୍ରଦର୍ଶନ ବଳରେ ବେଲଜିୟମ ଫିଫା ର଼୍ୟାଙ୍କିଙ୍କର ଶୀର୍ଷ ସ୍ଥାନ ହାସଲ କରିଛି। ମାର୍ଟିନେଜ ୨୦୦୭ରେ ସ୍ବାନ୍ସି ସହିତ କୋଚିଂ କ୍ୟାରିୟର ଆରମ୍ଭ କରିଥିଲେ। ୨୦୦୯ରେ ସେ ଓ୍ବିଗାନରେ ଯୋଗ ଦେଇଥିଲେ। ୨୦୧୩ ଫା କପ୍ରେ ତାଙ୍କ ତତ୍ତ୍ୱାବଧାନରେ ଓ୍ବିଗାନ ମାଞ୍ଚେଷ୍ଟର ସିଟିକୁ ହରାଇ ଟାଇଟଲ ଜିତିଥିଲା। ଏହାପରେ ବେଲଜିୟମ ଦାୟିତ୍ୱ ନେବା ପୂର୍ବରୁ ସେ ଇଭରଟନ୍ର କୋଚ୍ ଦାୟିତ୍ୱ ସମ୍ଭାଳିଥିଲେ। ମାର୍କ ଓ୍ବିଲମୋଟ୍ସଙ୍କଠାରୁ ସେ ଦାୟିତ୍ୱ ଗ୍ରହଣ କରିଥିଲେ।
