ନୂଆପଡା ଅଫିସ,୬ା୮: ଏକ ସୁସ୍ଥ ଶିଶୁ ସୁସ୍ଥ ନାଗରିକ ହୋଇ ଗଢିତୋଳି ହୁଅନ୍ତି । ସୁସ୍ଥ ନାଗରିକ ଦେଶର ଉଜ୍ଜ୍ୱଳ ଭବିଷ୍ୟତ । ତେଣୁ ଏକ ସୁସ୍ଥ ନାଗରିକ ଗଢିବାର ଗୁରୁଦାୟୀତ୍ୱ ମା’ମାନଙ୍କ ରହିଥାଏ । ଏହା ଏତିକି ବେଳେ ସମ୍ଭବ ହେବ ଯେତେ ବେଳେ ଶିଶୁଙ୍କୁ କଷକ୍ଷୀର ଦେଇ ବଢାଇବେ । ମଙ୍ଗଳବାର ସ୍ଥାନୀୟ ଜିଲା ମୁଖ୍ୟ ଚିକିତ୍ସାଳୟ ବୈଠକ ଗୃହରେ ଅନୁଷ୍ଠିତ ବିଶ୍ୱ ସ୍ତନ୍ୟପାନ ସପ୍ତାହ ପାଳନ କାର୍ଯ୍ୟକ୍ରମରେ ଯୋଗଦେଇ ଅତିଥିମାନେ ଏହା କହିଛନ୍ତି ।
ଜିଲା ସ୍ବାସ୍ଥ୍ୟ ବିଭାଗ ଏବଂ ସ୍ଥାନୀୟ ସ୍ବେଚ୍ଛାସେବୀ ସଙ୍ଗଠନ କଦମର ମିଳିତ ଆନୁକୂଲ୍ୟରେ ଆୟୋଜିତ କାର୍ଯ୍ୟକ୍ରମରେ ଜିଲା ମୁଖ୍ୟ ଚିକିତ୍ସାଧିକାରୀ ଡା. ପ୍ରଭାସିନି ବ୍ରହ୍ମା ସଭାପତିତ୍ୱ କରିଥିବାବେଳେ ଏଡିପିଏଚଓ (ଏଫଡବ୍ଲ୍ୟୁ) ଡା. ପି.କେ.ବି. ପଟ୍ଟନାୟକ, ଡା.ଜ୍ୟୋତ୍ସ୍ନାରାଣୀ ପଟ୍ଟନାୟକ, ଏପିଡୋମିଓଲଜିଷ୍ଟ ଡା. ବି. ବି. ଜଗତ, ଏଡିପିଏଚସିଓ ରୁକ୍ମଣୀ ବେହେରା, ଏଫଏସଓ ତପସ୍ବିନୀ ବେହେରା, କଦମର ସମ୍ପାଦିକା ଯାଜ୍ଞସେନୀ ମହାପାତ୍ର ପ୍ରମୁଖ ସମ୍ମାନିତ ଅତିଥି ଭାବେ ଯୋଗଦେଇଥିଲେ। କାର୍ଯ୍ୟକ୍ରମ ପ୍ରାରମ୍ଭରେ ସ୍ବାସ୍ଥ୍ୟ କର୍ମୀ, ନର୍ସିଂ ଛାତ୍ରୀମାନଙ୍କ ଏକ ରାଲି ସହର ପରିକ୍ରମା କରିଥିଲା। ଏହାକୁ ଜିଲା ମୁଖ୍ୟ ଚିକିତ୍ସାଧିକାରୀ ଡା. ବ୍ରହ୍ମା ପତାକା ଦେଖାଇ ଶୁଭାରମ୍ଭ କରିଥିଲେ। ଶୋଭାଯାତା୍ର ସହର ପରିକ୍ରମା କରି ମା’ର ସ୍ତନ୍ୟପାନ ଉପରେ ସଚେତନତା ସୃଷ୍ଟି କରିଥିଲେ। ଏହାକୁ ରୁକ୍ମଣୀ ବେହେରା ଏବଂ ଯାଜ୍ଞସେନୀ ମହାପାତ୍ର ପରିଚାଳନା କରିଥିଲେ । ଆୟୋଜିତ ବୈଠକରେ ବକ୍ତାମାନେ ମା’ର କଷକ୍ଷୀର ପାନ ଉପରେ ବିଶେଷ ଗୁରୁତ୍ୱ ଦିଆଯାଇଥିଲା । ମା’ର କ୍ଷୀର ଶିଶୁ ପାଇଁ ଏକ ମହୌଷଧୀ ଭାବେ କାମ କରିଥାଏ। ଏହା ଦ୍ୱାରା ମା’ ସୁସ୍ଥ ରହିବା ସହ ଶିଶୁ ସୁସ୍ଥ ସବଳ ହୋଇ ବଢୁଥିବାବେଳେ ରୋଗ ପ୍ରତିରୋଧକ ଶକ୍ତି ବୃଦ୍ଧି ଘଟିଥାଏ। ଏଥିପାଇଁ ସଚେତନତାର ଆବଶ୍ୟକତା ରହିଛି ବୋଲି କହିଥିଲେ। କାର୍ଯ୍ୟକ୍ରମକୁ ଏଡିପିଏଚସିଓ ବେହେରା ପରିଚାଳନା କରିଥିଲେ। ପରିଚାଳନାରେ ସ୍ବାସ୍ଥ୍ୟ ବିଭାଗ କର୍ମଚାରୀଙ୍କ ସମେତ କଦମର କର୍ମକର୍ତ୍ତା ପ୍ରତିଭା ହୋତା, ଗୋବିନ୍ଦ ପଟେଲ, ଅର୍ଜୁନ ବରିହା, ସ୍ନେହଲତା ନନ୍ଦ, ଅନୁପମା ମହାପାତ୍ର, ମୌସୁମୀ ପଣ୍ଡା, ମନୋରମା ସାହୁ ପ୍ରମୁଖ ସହଯୋଗ କରିଥିଲେ।
